13/9/14

Tu, yo... y el vecín (y José Ramón Oliva)


Diríamoslo milenta veces y, con otres milenta vegaes que lo digamos, va sonar poco que José Ramón Oliva ye'l másimu esponente del xéneru dramáticu n'asturianu anguaño y vanguardia nel procesu de modernización del teatru popular d'Asturies. Pa muestra'l botón que supunxo esti Salón de Teatru Costumista de Candás, onde l'autor sierense fue lleváu a escena por "Les Ayalgues de Carreño" en El calendariu, obra pola que fue merecedora del Premiu "Aurora Sánchez" 2014 al meyor testu costumista; pol Grupu de Teatru "Refaxu" de Blimea con L'Escarmientu (que fuera'l tiempu contempoaniu nel so montaxe El pasáu, el presente y el futuru); pol Grupu de Teatru "El Hórreo" de Barcia gracies a la so adautación de La mala pata del alcalde; y, por supuestu, pol Grupu de Teatru "Carbayín" de Siero, que dirixe y onde actúa, col estrenu absolutu de la obra Tu, yo... y el vecín.

La obra, que fuera representada nel Teatru Prendes de Candás el vienres 29 d'agostu, tien como trama la historia d'un "matrimoniu mozu que ta pasando por una crisis matrimonial pergorda, fasta’l puntu de tar decidíos a separtase. El vecín, paisanu metomentoo, intenta mediar p’arreglar los problemes, mentanto van recordando les circustancies que los llevaron a esi puntu". Esta trama, aparentemente cenciella, obliga a los tres actores a encarnar hasta a doce personaxes diferentes, consiguiendo llevar al públicu ensin problemes hasta'l períodu de postguerra. Poro, nun mos confundimos muncho si decimos qu'esti ye'l braeru teatru costumista d'anovación, un teatru cómicu que toca temes d'anguaño, siguiendo formes non clásiques. Y Carbayín (y Oliva) ye'l so representante más nidiu.

Tu, yo... y el vecín recibió les meyores crítiques de tol Salón de Teatru Costumista (con un sonoru "Cum laude" atribuyíu por "La Nueva España") y pensamos que ye más que merecío. Sicasí los Premios Aurora diéron-y la espalda. Cola idea dramática, el buen faer del elencu (compuestu pol propiu Oliva, Nati Fernández y Guillermo Suárez) y el buen faer de la estaya téunica (con M.M. Balmori y M.T. Balmori al cargu del maquillax y vestuariu, Ángel Mario Ordiales d'escenógrafu, Saúl Oliva a la illuminación y el soníu y a José Ramón Oliva na direición) yá tendrá más oportunidaes de conseguir otros premios.