La promesa

Les promeses d'amor embaxo un carbayu na nueche de San Xuan son inmortales. Por más que'l namoráu marchare, por más que la namorada s'escaeciere, por más qu'un pretendiente nuevu y poderosu ronde. 

La promesa ye una zarzuela del musicólogu asturianu Eduardo Martínez Torner que s'estrenara en Madrid pel añu 1928 y que namái se punxera otra vuelta en Xixón. Yera un espeutáculu perdíu d'aquel intentu de creyación "teatru nacional/rexonal" qu'esporpolló n'Asturies a entamos del sieglu XX, que diera como resultáu una bayura de testos a la gueta los raigaños del país, que desendolcó nel costumismu, y de  trabayos de reinterpretación de xéneros en clave asturiana.

Esta tarde, a les 20:30, nel Teatru Jovellanos de Xixón, Producciones Nun Tris vuelven a echala, nuna revisión d'Antón Caamaño y Inma Rodríguez que-yos valió p'algamar el Premiu "Pachín de Melás" 2014. Camúdase l'espaciu temporal de l'aición, moviéndola p'hacia la posguerra, y camuden tamién les motivaciones viatles de los personaxes, pa faeles más polítiques, pero la trama ye la mesma: l'amor imposible qu'apaez otra vuelta nun momentu que ye tovía más imposible. Y los personaxes: dos namoraos y un terceru que vien de fuera; dos cómicos que viven les mesmes esperiencies a la so mena; y dellos carauterísticos, p'averamos al arquetipu. Y la llingua: por supuesto, l'asturiana. Y estes tres pates faen d'esta zarzuela un claru exemplu del costumismu asturianu. Asina que va furrular nes tables, emocionándonos y faciendo que queramos más.

A parte la revisión del testu, Caamaño dirixe escénicamente la obra y Rodríguez, ta como ayudante de direición y representante de la xira. Pero, amás, cuenta Nun Tris na producción con importantes collaboraciones como la del Orfeón Gijonés, que fadrá'l coru y dalgunos personaxes de repartu, embaxo la direición de Carlos José Martínez; la de Pablo Quiroga, que s'encargó de la realización vidiográfica (porque nos enteactos, van vese vídios d'anéudotes y apreciaciones del elencu); y la direición musical, del maestru Manuel Burgueras.

Ficha téunica

Cantantes: 
Nela: Vanesa R. Touza (Soprano)
Miguelón: Manuel Valiente (Barítono)
Vítor: Gaspar Braña (Tenor)
Álvaro: Carlos Rodríguez (Tenor)
Celuca: Margarita Sierra (Soprano cómica)
Silvino: Pablo L. Romero (Tenor cómico) 

Actores / Actrices:
La Melguera: Inma Rodríguez
Antona: Ana Morán
Tolina: Fernando Marrot

Coru y otros personaxes: Orfeón Gijonés

Illuminación: Andrés P. Dwyer
Realización escenografía: Gran Moming
Vestuariu: Azucena Bedia / Producciones Nun Tris
Diseñu Gráficu: Gloria Caamaño / MGLAB
Realización Videográfica: Pablo Quiroga.
Direición Coru: Carlos José Martínez 
Produición: Pablo Romero / Producciones Nun Tris 
Direición musical: Manuel Burgueras
Direición escénica y regiduría: Antón Caamaño 
Ayte. Direición: Inma Rodríguez
Representante en xira: Inma Rodríguez García
Versión del testu: Inma Rodríguez y Antón Caamaño
Produición, xestión y distribución: Producciones Nun Tris, S.L.

Lleer más...