.jpg)
Aquel día 25 d'abril de 2014, vienres, la primer obra yera El soldadito de plomo, de Teatro Plus. Estrenaba la etiqueta #TeatruInfantil con esta representación de títeres. Pero abría tamién l'Axenda del teatru n'Asturies, un proyeutu que buscaba ufrir la más detallada información sobre los espeutáculos programaos nel país.
Gueté por tolos requexos p'algamar información. Por supuestu, les ferramientes dixitales públiques: l'Axenda Cultural de Principáu, les páxines de los distintos conceyos y dalguna privada, como "QuéVerDeAsturias" o la occidental "QuéFemos". Pero nun yera suficiente, asina qu'había que siguir coles axendes de los periódicos y dir a los centros de cultura onde podía atopar folletos colos actos, por exemplu, del Circuitu Profesional de les Artes Escéniques del Principáu d'Asturies. Pero nun yera suficiente, asina qu'hube dir hasta los propios teatreros, na páxina dixital de FETEAS o de programadores como Ververemos y el Espacio Escénico "El Huerto", o tirando de les rees sociales, pa contautar col Espacio Aqua, el Taller de MicroTeatro o el Café Trisquel.
Anguaño, 52 entraes d'esti blogue más tarde cola etiqueta #Axenda, sé que pueo ufrir la información más completa del ámbitu de les Artes Escéniques de toa Asturies. Ye pa presumir, pero sigue tando incompleta: hai munchu teatru n'Asturies como pa que lo puea abarcar too. De toes formes, voi siguir cola xera.
¡Gracies por faelo posible!
