El miércoles 20 d'agostu, a les 23 hores, l'Asociación Cultural "Les Ayalgues de Carreño" fue la encargada d'abrir el XXIV Salón de Teatru Costumista de Candás col estrenu absolutu de la obra El calendariu, de José Ramón Oliva. Pesie a ser escrita ex profeso pol autor sierense, el llabor de la direutora, l'actriz profesional Gemma de Luis Noriega, nun fue cenciella, porque había poner n'escena a ná menos que diecisiete actrices.
Oliva, tirando de la so cinefilia, proponía la siguiente trama coral: doce monxes nun conventu candasín faen marañueles pa salir p'alantre, pero fai tiempu que dexaron de ser rentables y el conventu ta a piques de tener que zarrar; la madre superiora decide sacar perres entamandu un calendariu de semeyes de les hermanes; y, a partir d'ehí, milenta enguedeyos.
De Luis contaba con un bayurosu elencu de muyeres del conceyu ente los que repartir les personaxes que, como se diz nel testu, caúna tien la so personaildá, a mou de puela Pitufa: Leni Gonsalves, como Madre Superiora; Marujina del Egido, Sor María; Lida Reduello, Sor Gloria; Meli Martínez, Sor Piedad; Mari García Riera, Sor Mercedes; Luisa Iglesias Suárez, Sor Encarnación; Cuqui Álvarez Fernández, Sor Pilar; Maribel Rodríguez Migote, Sor Sagrario; Nieves Escudero, Sor Candelaria; Gloria Salazar, Sor Dolores; Maruja Fernández, Sor Socorro; Aidé Fernández Carrocera, Sor Angélica; Cheres Quintín, Sor Lucrecia; Mari Luz Valdés, Sor Magdalena; Cary García Fraile, Cristina "la fotógrafa"; Amelia González Fernández, Marcela "l'ayudante"; y Adela Román Santos, Luisa "la periodista".
El resultáu de la combinación fue espléndidu y la obra arrancó los primeros aplausos y les primeres risotaes del Salón. Poro, el llabor d'Oliva y el de De Luis fueron recompensaos colos Premios Aurora al meyor testu dramáticu y a la meyor direición, respeutivamente.
