L'Asociación Reciella: Families pol Asturianu entama otra vuelta'l Festival d'Artes Escéniques "Escenines pa la Reciella", que va cellebrase nel Colexu Públicu Jovellanos de Xixón mientres estes vacaciones del primer trimestre escolar.
Reciella, que tien como oxetivos fundamentales la tresmisión interxeneracional del
asturianu nel ámbitu social y familiar y la enseñanza, promoción y
difusión de la llingua asturiana nes primeres edaes, asentóse como asociación en setiembre de 2012 y, dende entós, lleva organizando un buen númberu d'actividaes que tienen al asturianu como idioma vehicular.
Esti Festival "Escenines pa la Reciella" ye otra esbilla del so trabayu, onde axunta los cuatro espeutáculos infantiles, al so entender, "más interesantes que se tán faciendo nesti momentu n’Asturies", cuidando que "la importancia de que’l rexistru llingüísticu de les compañíes seya
correctu, pa que’l modelu de referencia se presente de manera natural y
seria". Too ello col enfotu de que "los neños asturfalantes, asina como los
que tienen interés y curiosidá por aprender l’idioma, tengan la
oportunidá d’asistir a actividaes qu’utilicen la llingua asturiana con
normalidá fuera del ámbitu escolar". (Sorrayáu procedente de la nota de prensa)
Paezme, ensin dubia, una de les actividaes organizaes n'Asturies más consecuentes y granibles de cuantes se llevaron a cabu esti añu. Pude faer siguimientu de la bayurosa cantidá d'espeutáculos infantiles que s'ufrieron y programáronse ensin xacíu, ensin filos conductores, ensin oxetivos amiestadores, ensin mayor interés qu'enllenar hores... como si la reciella fuera un grupu amorfu que lo traga too. Ver qu'hai xente que s'esmolez por programar actividaes infantiles con sentíu, presta. Y nun solo porque s'apurra teatru n'asturianu, que tamién. Sobre too, pola variedá (dos cuentacuentos, un teatru de solombres musicáu y un monólogu teatral) calidá de lo presentao.
Ehí va'l cartel:
- Llunes, 22 d’avientu: Coses de neños, Olga Cuervo.
- Vienres, 26 d’avientu: El cuélebre de San Llorienzu y otres histories, d'El Turnebis del Tribilín.
- Martes, 30 d'avientu: Ecolocuentos, de Carlos Alba "Cellero".
- Vienres, 2 de xineru: Árbol, Higiénico Papel Teatro.
Norabona pola iniciativa. Norabona pa la reciella y pa toos nosotros.
