El vienres, día 22 de xineru, a les 20:15, estrénase nel Teatru Palacio Valdés d'Avilés la nueva producción de Teatro del Cuervo y d'Hilo Producciones: Anónimo, de Sandro Cordero. La obra, con una duración de 70' minutos y indicada pa un públicu de 12 a 100 años, tá escrita y va ser representada en casteyán y tien como puntu de partida "la vida de Lázaro de Tormes y de les sos fortunes y alversidaes".
Esta ye la reseña de la mesma, apurrida por Teatro del Cuervo:
"Poques noveles hai na hestoria que retraten la situación social y política que tienen al rodiu de manera tan sogona, llúcida y intelixente como lo fai el Lazarillo. La obra espeya, énte too, el desencantu fonderu d'una época. Un desencanto que nos llega, eso sí, trescaláu d'humor, a veces nidiu, a veces afiláu hasta l'ensañamientu. De la mano de Lázaro de Tormes percorremos, con humor, una España gloriosa, imperial, magnífica, doliente, mísera y envilecía; onde espoxiguen los lladrones y fúndense los honraos; onde'l decente ye castigáu y l'ensinvergoña, aplaudíu.
"Entamamos asina una puesta n'escena historicista, casi arqueolóxica, como curiosu y risonderu averamientu a una épola llonxana del nuestru país, que miramos casi condescendientes, dende'l convencimientu de que ná d'eso pue volver a asoceder. Anguaño, non."
Lázaro
Dende va un tiempu, el sellu de Teatro del Cuervo ye una garantía de calidá. La productora, de la mano de Sandro Cordero y Sergio Gayol, collecha los ésitos propios d'un trabayu profesional con una factura impecable, frutu d'acarar retos y de collaborar con otres productores de nivel estatal. Asina, pudimos esfrutar les pasaes temporaes de l'adautación teatral de la película Carne de gallina, cola que triunfaron nos Premios Oh! 2015, fueron finalistes de los Premios Max y tovía siguen rodando por tol Estáu. Eso, ensin olvidar otres producciones como Ivanov, Criados y bufones y En un lugar de la galaxia, espeutáculu a destacar na ufierta pa la reciella.
Por ello, el Llázaru de Sandro Cordero, promete. Y eso que les comparaciones puen ser odioses, polo masuñao del tema. Toos tenemos na memoria el Llázaru de Tormes qu'entamó Carlos Alba en solitariu, subiéndose a un carru que facía les veces d'escenografía y de tresporte los preseos que necesitaba pa la so impresionante interpretación y col que consiguía enllenar grandes teatros y pequeñes sales municipales; pa más presto, la versión del monologuista tamién fue tornada al asturianu. Pero, a priori, los del cuervu paecen dar un pasu p'alantre, organizando una obra con más d'un personaxe (cuando Lázaro, por Carlos y el Brujo, préstase bien al monólogu), cola incorporación de títeres y con una ambientación que, polo que nos tienen acostumaos, de xuru que va treslladanos al picarescu sieglu XVI español, guardando col rabín del güeyu el presente sieglu XXI.
Ficha téunica
- Anónimo. La vida de Lazarillo de Tormes y de sus fortunas y adversidades.
- Direición y dramaturxa: Sandro Cordero
- Intérpretes: Sergio Gayol, Sandro Cordero/Alejandro Hidalgo, Rosa Merás, Beatriz Canteli
- Asesor de testu: Salvador Lorenzo Yagüe
- Ayudante de direición: Carmela Romero
- Espacio escénico: La maldita espiral y XCreativos
- Realización de la escenografía: Tois Carpintería
- Realización de títeres: Tragaluz Títeres
- Vestuariu: A2Hadas
- Illuminación: Pancho Villar
- Espaciu sonoru: Mr. Wonder
- Diseñu gráficu: La maldita espiral
- Productora: Begoña García
