Esti vienres 4 de setiembre, a les 20 hores, va cellebrase la ceremonia d'entrega de los Premios "Aurora" del XXV Salón de Teatru Costumista Asturianu de Candás, nuna ceremonia presentada y dirixía pór Alain Fernández, xestor del teatru, que se nomará "Con la gala en los talones".
El pasáu miércoles asoleyáronse les nominaciones pa los Premios "Aurora" qu'otorga'l Salón a los grupos participantes. A destacar, les siete nominaciones pa
Los Carromateros, de la Compañía Asturiana de Comedias, y les cuatro pa
El molín encarnáu, del Grupo Santa Bárbara de Llaranes.
La relaición de nominaciones quedo de la siguiente forma:
- Meyor actor. Luis Barrera, de Santa Bárbara; Joaquín Fernández, d'El Hórreo; Eladio Sánchez, de la Compañía Asturiana; y Segis Meana, de Chanclos Asgaya.
- Meyor actriz. Berta García, de Padre Coll; Chusa Juarros, d'El Horreo; Paula Moya, de Teatru Kumen; y Magdalena Díaz, d'Ensin Reparu.
- Meyor actor secundariu. Lisardo Suárez, de Rosario Trabanco; Arsenio González y Armando Felgueroso, de la Compañía Asturiana; y Román Roces, d'Ensin Reparu.
- Meyor actriz secundaria. Elisa Álvarez, de Rosario Trabanco; Josefina García, de la Compañía Asturiana; Lucía Colunga, de Xana; y Isabel Coto, de Refaxu.
- Meyor direición. Carmen Campo, de Santa Bárbara; Eladio Sánchez, de la Compañía Asturiana; Carmen Duarte, de Traslluz; y Rosa Ana Muñoz, de Xana.
- Meyor maquillaxe y vestuariu. Compañía Asturiana de Comedias, Santa Bárbara, Ensin Reparu y Refaxu.
- Meyor decoráu y illuminación. Compañía Asturiana de Comedias, Santa Bárbara, Xana y Refaxu.
Habrá dos premios que se van decidir direutamente na gala. Por un llau, el Premiu Aurora del Públicu a la Meyor Función, otorgáu polos votos de los abonaos al Salón y, quiciás, el más cotizáu de toos. Por otru, el Premiu Aurora al Meyor Testu Costumista Asturianu, escoyeta d'una esbilla de los más importantes entendíos en teatru asturianu y sofitáu por FETEAS, quien lu convoca.
Hai que destacar que'l Grupu de Teatru Carbayín, que representó El candidatu, nun entró a concursu.
Decálogu y asturianu
La organización presentó un decálogu de meyora pal Salón 2016. Ente aiciones de cai, doblar funciones los sábados, la informatización de la taquilla pa poder mercar entraes on-line, la organización de charres y alderiques sobre teatru costumista y talleres d'aspeutos téunicos xunto a FETEAS y la grabación en formatu dixital de toles obres, destaquen la inauguración de Centru de Documentación del Teatru Costumista, la tramitación de la valoración del Teatru Costumista como bien d'interés cultural y la collaboración de l'Academia de la Llingua Asturiana dientro del Concursu de Testos Teatrales, que'l Salón pretende espublizar.
Ye un gran pasu que'l Salón, escaparate principal del teatru costumista asturianu, reafirme la importancia del idioma asturianu dientro del xéneru y que tenga en consideración a la principal institución cultural y llingüística d'Asturies como sofitu a les sos idegues.
El decálogu, en sigo mesmo, merez una entrada a parte. Pero quede fecha la consideración y la norabona poles idegues.
Lleer más...
