Imaxináivos la emisión radiofónica d'un conciertu de Dixebra, que cuenta cola presencia, en primera fila, de la presidenta de l'Academia de la Llingua, Ana Cano, vistía con un traxe de somedana diseñáu por Pertegaz, y que bailla de la mano con Javier Fernández, l'inigne presidente autonómicu, tamién de traxe de paisanu, al llau de la princesa Letizia. Y cuando Xune entona'l "Rompi, rompi, rompi'l ritmu", han cortar la retresmisión pa dar pasu a un sucesu misteriosu: la cayía d'un estrañu meteoritu nel vertederu de Cogersa. (Ye verdá que bien podía ser al revés: que cortaren la noticia del meteoritu por dar la estraña tresformación de Javier Fernández diendo a un conciertu de Dixebra)
Esti ye l'entamu d'ún de los episodios del nuevu programa de RPA "El gran teatru del mundu", dirixíu por Dolfo Camilo Díaz. Retómase con elli'l xéneru del radioteatru, que tanta bayura algamara a los nicios de les tresmisiónes radiofóniques, cuando la televisión nun yera competencia, con fitos como la versión de La guerra de los mundos de H.G. Wells fecha por Orson Welles (y que Dolfo Camilo parodia), o les radionoveles, como Ama Rosa, La saga de los Porreta o Matilde, Perico y Periquín, que teníen enganchada poles oreyes a media población española, ensin dexar de citar la figura del xixonés Juan José Plans, xunto a Narciso Ibáñez Serrador, l'auténticu modernizador temáticu de les dramatizaciones radiofóniques n'España (y que, pola so capacidá de creyación, pa min ye'l xixonés más universal de la cultura del sieglu XX).
 |
| Luis Fernández, Ana Belén León, Andrés Presumido, Silvino Torre, Antón Caamaño, Eladio de Pablo y Dolfo Camilo Díaz |
"El gran teatru del mundu" presentóse'l vienres pasáu nun actu cellebráu nún de los paraninfos de la Escuela Superior d'Arte Dramáticu, istitución que collaboró col ayerán mientres los ensayos y faciendo un cásting ente los sos alumnos, l'añu pasáu, d'onde salieron dos actrices participantes nel proyeutu. Introducida pol direutor de la ESAD y PD, Eladio de Pablo, a la presentación acudió'l direutor de comunicación de RTPA, Luis Andrés Fernández, que faló de lo prestoso d'asumir proyeutos como esti del radioteatru pal ente públicu, amás d'una esbilla d'actores y actrices participantes (Andrés Presumido, Antón Caamaño, Silvino Torre, Ana Belén León, Luis Barrera y María López).
 |
| María López, Eladio de Pablo, Ana Belén León, Luis Barrera. Silvino Torre, Antón Caamaño, Dolfo Camilo Díaz y Andrés Presumido |
Ente les declaraciones, Dolfo Camilo Díaz, qu'amás del direutor fue l'encargáu de guionizar toles histories, diba intercalando dalgunos cortes del programa. Asina, pudimos sintir la voz d'Andrés Presumido, dando vida al conferenciante del monólogu de Chèjov Sobre'l dañu que fai'l tabacu, pieza cola qu'escomenzó la emisión esti caberu sábadu 10 de mayu. Les d'Antón Caamaño, Silvino Torre y Ana Belén León´, nos sos respeutivos papeles dientro de la versión de La guerra de los mundos enantes citada. Y la de Luis Barrera y María López, actores amateurs que colaboraron en delles dramatizaciones, dando vida, ente otros, a Clarín y Ana Ozores.
Pero la llista d'actrices y actores participantes nun acaba equí. Amás, tuvieron delantre'l micro Carlos Alba "Cellero", Ladislao Arriola, Eduardo Azpiri, Katia Borlado, Olga Cuervo, Carlos Dávila, Del Río, Iván Fernández, Laura Iglesia, María del Mar López, José Ramón Oliva, Alberto Rodríguez, Aique Rodríguez, Kike Roselló, Camilo Souza y el grupu Tres Colores.
La primera temporada d'esti programa ta dividida en dos momentos: una, qu'escomenzó agora y finará en xunetu, y que tien como momentu cume la emisión de La Guerra de los mundos , de H.G. Wells y Orson Welles, en dos episodios; y otra, qu'entamará en setiembre, que xirará al rodiu de los cuatro episodios de La Rexenta, de Leopoldo Alas Clarín. Pero amás, daránse cita un grupu d'autores de nivel: l'anteriormente citáu Chèjov, Esopo, Cortázar, Conan Doyle y Bokovsky.
La primera temporada d'esti programa ta dividida en dos momentos: una, qu'escomenzó agora y finará en xunetu, y que tien como momentu cume la emisión de La Guerra de los mundos , de H.G. Wells y Orson Welles, en dos episodios; y otra, qu'entamará en setiembre, que xirará al rodiu de los cuatro episodios de La Rexenta, de Leopoldo Alas Clarín. Pero amás, daránse cita un grupu d'autores de nivel: l'anteriormente citáu Chèjov, Esopo, Cortázar, Conan Doyle y Bokovsky.
Por otru llau, el proyeutu tien como llingua vehicular l'asturianu, salvo un par de dramatizaciones en casteyán. Con ello, el teatru vuelve a amosar el so compromisu pa cola normalización de la llingua. Y más nún ente públicu, que nun cuenta con munchos espacios afayaízos pal idioma llariegu. Anque solo fuere por esto, ya sedría d'agradecer a Dolfo Camilo Díaz l'esfuerciu enorme. Pero ye que, amás, los resultaos son prestosísimos, tanto temática, como estilísticamente, lo que fala de la calidá del equipu téunicu y del valir dramáticu del equipu actoral.
La cita ye los sábados a les 22:00 hores, na RPA. Promete convertise nun clásicu.
