Esti sábadu 24 de mayu estrénase nel Teatru Nuevu de La Felguera el nuevu montaxe del grupu de Teatru Kumen: la picante, sensual y golfa Las noches perdidas. Con esti motivu, espublizo la entrevista que tuvo a bien concedeme Paula Moya, actriz y direutora escénica del grupu, que triunfó col montaxe Las troyanas en dambos aspeutos, ganando los premios a la Meyor Direición nos Festivales
“Ciudad de Oviedo” y “Ciudad d'Elx”, los premios a Meyor Actriz
Principal n'Uviéu, Elche y Dos Hermanas y, "con especial ilusión", el
Premiu Escenamateur de les Artes Escéniques 2013 a la Meyor Intérprete
Femenina.
Teatreru.- Cuéntamos un poco, cómo llegaste al teatru y cómo aparaste en Kumen.
Paula.- El mi primer acercamientu al mundu del teatru, al igual que muncha xente, fue nel colexu. Tovía guardo'l testu y recuerdo hasta la ropa que llevaba, pero creo que fue polo mal que lo pasé. ¡Qué va, aquello nun yera lo mío, yera demasiao vergoñoso! Creyi que nunca nun doba volver a subime a un escenariu. Pero, años dempués, nel institutu, escoyí la optativa de Teatru (fuxendo d'Informática, confiésolo). Un día vinieron a falanos del cursu d'Iniciación al Teatru qu'organizaba la OIJ del Ayuntamientu de Llangréu y, como toles mies compañeres s'apuntaron, ¡pues yo tamién! Ehí conocí a José Ramón López, de Teatru Kumen... y hasta agora. A lo llargo d'estos años colaboré y trabayé con munchos grupos. Actualmente amieso Teatru Kumen cola direición de grupos de teatru amateur y de Centros d'Apoyu a la Integración
Teatreru.- Yes actriz y direutora. ¿Cómo diste'l pasu d'un a
otru?
Paula.- Escomencé en Kumen nel 97, como actriz en papeles pequeños y sustituciones y, pasu énte pasu, fui garrando más responsabilidaes. La direición nun llegó hasta'l 2012, con Mejestrix contra Quasimodo. Pero yo nun di'l pasu: ¡emburriáronme!. Fue tou un retu, pero aprendí muncho col proyeutu.
Teatreru.- Dirixiste xunto a José Ramón López Las Troyanas, d'Eurípides. Tuvo que ser tou un retu pa un grupu que suel tocar temes más contemporanios.
Paula.- En Kumen nunca nun mos acaráramos a una traxedia clásica y, dempués de varios años de comedia, creyíamos que yera'l momentu. Lo más difícil de "Troyanas", na mio opinión, fue la co-direición, porque yéramos dos direutores con idegues mui distintes, Pero Ramón tenía mui claro dende'l principiu qué quería faer y cómo lo quería faer. Asina qu'él centróse más nel montaxe y l'adautación y yo, na direición actoral.
Teatreru.- Las troyanas suponen un ésitu mui importante pa Kumen, pal teatru
aficionáu n'Asturies y, supongo, que pa ti. ¿Cómo se lleva recibir tantu premiu?
Paula.-Toos, yo la primera, enfrentámonos a “Troyanas” con munchu miéu, munches duldes y munchu respetu, asina que somos los primeros sorprendíos cola rempuesta'l públicu y colos premios recibíos. Dende'l so estrenu, en mayu de 2013, "Troyanas" lleva 11 funciones. La metá d'elles fueron en Festivales, dalgunos de calter nacional, onde recibiera un total de 13 premios.
Teatreru.- Pero, a parte de los premios y el reconocimientu, ¿con qué te quedes
del clásicu d'Eurípides?
Paula.- Los premios suponen un impulsu pa siguir meyorando y esforciándonos no que faemos, pero "Troyanas" fuera tou un retu y el fechu de consiguir superalu y'a ye toa una satisfaición pa nosotros. Lo meyor ye que siguimos aprendiendo con cada función y esfrutando muncho, munchísimo. Personalmente, aprendí abondo d'Hécuba, tanto a nivel interpretativu como a nivel personal. Hécuba ye una muyer que, desgracia tres desgracia, llogra reponese y sacar fuercies de la nada pa siguir p'alantre. Y eso ye toa una lleición de vida. ¡Yá podía pegáseme un pocoñín de la fuercia d'ese muyer! Tamién tengo que destacar lo que supuso esi testu a nivel grupal. Sé que suena mui místico, pero en "Troyanas" hai momentos d'enerxía, de conexón, d'emoción real... y creo qu'eso xuniónos un poco más. Hubo un momentu que nun olvidaré nunca: un compañeru consiguió que se me parara'l corazón n'escena. Esos pequeños momentos "máxicos" son los que faen que tol esfuerciu valga la pena y, hasta agora, nunca nun los viviéramos con tanta intensidá. ¡Agora solo espero que sepamos facé-ylo llegar al públicu!
 |
| Teatru Kumen. Las troyanas. |
Teatreru.- Falamos de retos: ¿qué autor/obra/xéneru t'apatez más agora?
Paula.- Nun sabemos tar quietos, asina que yá tamos trabayando nel siguiente proyeutu: Casanova, memorias de un libertino. Trátase d'una adautación teatral de les memories de Giacomo Casanova. ¡Y eso sí que supón un retu!
Teatreru.- ¿Atrévesteríeste con teatro n'asturianu?
Trabayar con un testu n'asturianu impón respetu. Pasónos nel 2007, cuando estrenamos Actu imprevistu, de Miguel Gallego. Pol testu y la temática, paeciómos que tenía sentíu treslladar l'aición al Norte y adautala al asturianu (la obra orixinal representábase n'andaluz). Supuso un gran esfuerciu y nun fue nada fácil faenos col testu, pero l'encargáu de l'adautación diónos clases y creo que conseguimos un buen resultáu. Lo peor fue cuando empezamos a salir d'Asturies y teníamos qe representala en casteyán... ¡Tremendo!
Teatreru.- ¿Un montaxe de "Les troyanes", por exemplu, pienses que tendría
una aceutación paecía?
Paula.- ¿Las Troyanas n'asturiano? ¡Habría de trabayase muncho el testu! Pero
creo que, con trabayu previu y un enfoque adecuáu, podría resultar.
Teatreru.- ¿Cuáles son los proyeutos qu'agora tienes en mente o onde te tas yá
embarcada?
Paula.- Pues, a parte de l'adautación de Casanova, memorias de un libertino estrenamos un nuevu proyeutu'l día 24 de mayu: un espectáculu p'adultos que lleva por títulu Las noches perdidas. Un proyeutu un tanto arriesgáu, non aptu pa tolos públicos, con escenes subíes de tonu..., pero dempués de tanta traxedia, ¡pedíamoslo'l cuerpu!
Teatreru.- Por último, ¿nunca nun pensaste en dedicate profesionalmente a
esto?
 |
| Con Alevosía Teatro, Lecciones para una dama |
Paula.- ¡Claro! Sedría'l mio suañu. Y voi intentándolo poquiñín a pocu con "Con Alevosía Teatro". Pero la mio situación personal anguaño nun me permite dedica-y'l tiempu y la dedicación que desixe'l teatru profesional y tengo que conformame con ensayar un par d'hores a la selmana. Asina que, de momentu, el teatru tendrá que siguir siendo'l mio hobby. De momento.
