El sábadu 27, a les 20 hores, el Teatru Prendes de Candás va ser l'escenariu del estrenu de Xuan Soldáu, l'últimu montaxe de Carlos Alba "Cellero", basáu nel cuentu clásicu La historia d'ún que ficiere un viaxe pa saber lo que yera'l miéu (Märchen von einem, der auszog das Fürchten zu lernen) de los Hermanos Grimm y qu'aporta a la península recopiláu nel volumen Cuentos y poesías populares andaluzas por Fernán Caballero, nomatu de la escritora Cecilia Böhl de Faber, embaxo'l títulu de Xuan ensin miéu (Juan sin miedo).
Con motivu d'esti estrenu, Cellero condedió-y al Teatreru una entrevista, onde falamos de les coraes d'esta obra y de dalguna cosa más.
Teatreru. -Estrenes "Xuan soldáu", una
adautación del cuentu clásicu "Xuan ensin mieu". ¿Por qué te dio por
esta hestoria? (¿Sacaste la idega de dalguna sesión de
"cuentacuentos"? ¿Prestábate de críu? ¿Presta-y al to guah.e?)
Carlos.- La
idea de montar Xuan Soldáu empezó ocurríseme depués de ver la película que, col
mesmu títulu, fizo Fernando Fernán Gómez nel añu 1974. Depués fui a la fonte
d'él, que fue la versión que escribió Fernán Caballero, y tamién a la gueta
d´otres recopilaciones. D'estes saqué dalgunos detallucos de la versión que fae
Italo Calvino en Cuentos populares italianos.
Teatreru.- Por embargu, saques esti cuentu d'un
ambiente infantil, pa faer que seya pa tolos públicos. ¿Cómo adautaste'l testu?
Carlos.- El
testu ye bastante fiel al de Fernán Caballero, con delles añadidures pa lo
adaptar a la técnica teatral. El facer qu'el cuentu tamién valga p'adultos ye
una idea que taba na versión de Fernán Gómez.
 |
| Fernando Fernán Gómez, nel telefilme Juan sin miedo |
Teatreru.- N'escena tas tu solu, otra vuelta. Paez
que ye la seña d'identidá de la to empresa
"Acostubaxu Teatru". ¿Ye por causa la crisis, ye porque te presta el
monólogu o ye porque tas meyor solu que mal acompañáu?
Carlos.- Como
actor yo toi abiertu a cualaquier tipu d'obra, xéneru y mediu. Pero comu
creador la mio forma d´espresión, hasta agora, ye'l espectáculu unipersonal con
base narrativa, comu'l monólogu o la xuglaría.
Teatreru.-¿Cómo ta diendo esi proyeutu de
"Acostubaxu Teatru"?
Carlos.- “Acostubaxu
Teatru” fue´l nome que nun momentu determináu-y quise dar a los mios proyectos
cuandu nellos andechara más xente. Manténgolu en dellos documentos escritos
pero la realidá fue imponiéndose, y diz que la xente conozme como “Cellero”, y
entós como “Cellero” tengo que m'anunciar.
 |
| Carlos Alba, carauterizáu como'l so personaxe "Cellero". |
Teatreru- Por embargu, nel montaxe de "Xuan
soldáu", tienes collaboradores destacaos.
Carlos.- Xuan
Soldáu fue un proyectu revesosu a la hora de lo llevar a escena. Per un llau
ye un cuentu de los que llamen “maravilloso”, con seres sobrenaturales que
desixíen el trabayu con títeres, marionetes o daqué asemeyáu. Per otru llau,
hubo que facer un trabayu curiosu de dramaturxa pa lo adaptar al llingüaxe
teatral, mayormente buscar que munchos fechos pasaren de tar narraos a ser
acciones n'escena. Pa lo primero contauté con Olga Zeceva Churchich, que fizo
la escenografía y atrezu. Pa lo segundu, con Alexander Churchich, que firma la
dirección escénica. Cola ventaya tamién de qu'ellos tán de trabayar xuntos na
so compañía, Teatro Plus.
 |
| Olga Zeceva y Alexander Churchich (drecha), Teatro Plus |
Teatreru.- Imaxino que son de les escueles
teatrales del Este, onde los Teatros Nacionales faen por preparar grandes
profesionales. N'Asturies la realidá ye mui diferente, ¿verdá?
Carlos.- En
Bulgaria´l teatru de títeres estúdiase nes escueles d´arte dramáticu, y tien
categoría de carrera universitaria. Otramanera, los horarios d´estes escueles pueden amosamos dalgo sobre la diferencia con
España: estudien dende les 9 de la mañana a les 10 de la nueche de llunes a
sábados, y hasta les 5 los domingos. Como en too, nun hai milagros: la calidá aporta
gracies al trabayu.
Teatreru.- ¿Qué introduciríes tu nel mundu teatral
asturianu p'amaeyoralu? Falo dende'l puntu de vista cultural pero, sobre too, dende
l'empresarial y corporativu.
Carlos.- Yo
nun soi empresariu de vocación, soi un profesional que pa desendolcar el so
trabayu fízose autónomu. O seya, la mio vocación ye teatral, nun ye
empresarial. El corporativismu nun me gusta res en profesión nenguna.
Otramanera, tocante a política teatral nun tengo fecho un mapa bien detalláu de
lo que me prestaría; por agora la mio idea ye mas xeneral: contra mas
democrática y reivindicativa seya una sociedá, mas va interesase la xente pol teatru y pol arte en xeneral.
Teatreru.- Yes ún de los referentes del teatru
fechu n'asturianu, qu'alternes nos montaxes col casteyán. ¿Ves futuru nel
teatru escritu, dichu,entendíu na llingua llariega? ¿Ves que la xente respuenda
con normalidá ente los montaxes n'asturianu?
Carlos.- A la
xente présten-y los montaxes n'asturianu. Otramanera'l futuru del teatru
n'asturianu ta venceyau al futuru de la llingüa.
Teatreru.- Por último, ¿que nos vamos alcontrar el
día del estrenu en Candás?
Carlos.- N'escenariu
vais ver una puertona pesllada. Ye la Puerta de la Bona Vida, y les aventures
de Xuan Soldáu pa poder pasala, engarrándose con seres comu'l Diañu Cabra
Mayor, la Bisarma… Y saliendo trunfante de les peripecies por cuenta de nun
tener mieu a nada y confiar nél mesmu.
Los neños de Candás van tener la oportunidá de ser los primeros en saber si Xuan Soldáu va ser quien a pasar la puerta, porque la obra va ser representada'l xueves pela mañana pa inaugurar la XIX Campaña de Teatru pa Escolinos.
Los demás, hemos esperar hasta'l sábadu pa ser tresportaos por Cellero a esi mundu maraviyosu de seres sobrenaturales y suaños emponderantes, como fue quien pa llevanos a la dómina de los sieglos d'Oru picarescos col so Llázaru o a tiempos más medievales, col xuglar Bandurriu.
Y, pa enriba, na llingua llariega. Oportunidaes asina nun se puen perder.
