El rey se muere

"REI.- ¡Qué'l tiempu retroceda!

MARÍA.- Qué temos fai 20 años.
REI.- ¡Qué temos na selmana pasada!
MARÍA.- ¡Qué temos ayer de tarde! ¡Tiempu, vuelve!
XULIETA.- ¡Tiempu, vuelve!
TOOS.- ¡Tiempu, vuelve! ¡Tiempu, apara!
MARGARITA.- Yá nun hai tiempu. Derritióse-y.
MÉDICO.- (Mirando pol antioyu pal cielu) ¡La so maxestá ta declarada difunta nos rexistros del Universu!
ALABARDERU.- ¡El Rei ha morrió! ¡Viva'l Rei!
MARGARITA.- ¡Calla, idiota, tabes meyor calláu!"

D'El rei muérrese, d'Eugène Ionesco

L'autor frances d'orixen rumanu Eugène Ionesco vuelve a les tables del Teatru "Jovellanos" esti domingu 13 d'abril, a les 20:30 hores, de la mano del grupu "La Peseta Teatro" de Xixón, que va representar El rey se muere.

La direición escénica d'esti montaxe cuerre a cargu de Cristina Bravo, que tuvo a bien el faer unos cuantos comentarios sobre los motivos que llevaron al grupu a acarar esta obra del másimu esponente del Teatru del Absurdu. Diz al respeutu, lo siguiente:

"Nun principiu, lo que nos movió realmente fue'l deseyu de cambiar de rexistru. Viníamos d'Antes de ti, obra sobre'l matratu de xéneru, una trexedia, por desgracia, mui cotidiana con personaxes de carne y güesu. Con esa obra yéramos mui coscientes de que nun-y dábemos un respiru al públicu. Asina que debíemos, tanto al públicu como a nosotros mesmos, esi respiru. Y el Teatru del Absurdu ufríamoslu."

Antes de ti, estrenada en marzu de 2011, valió-y un emburrión bien grande al grupu "La Peseta Teatro", porque llogró dellos premios d'importancia: nel Festival de Teatru Amateur "Ciudad de Oviedo" de 2011 recibe los galardones al meyor testu orixinal y a la meyor direición, amás de los premios a la meyor interpretación masculina, al meyor espaciu sonoru y a la meyor illuminación; fuera d'Asturies, nel Festival de Teatro Aficionado de Carrión d elos Condes, "La Peseta" recibe'l premiu a la meyor direición y el segundu premiu a la meyor obra. Por embargu, la obra yera mui dura, como corruespende a un homenaxe a eses muyeres que pasaron "pola historia con penas y ensin gloria".

Esta versión de la obra d'Ionesco, que s'estrenó en 1961 embaxo'l títulu orixinal de Le Roi se meurt, ruempe col drama, pesie a qu'espeye una realidá que bien pue correspondese cola situación social d'anguño:

"Nesta obra alcontramos ciertu paralelismu col momentu actual: "El rei muérrese y, con él, cai tol so imperiu". Nesta obra decubrimos la neglixencia, la corrupción, el totalitarismu y la desidia del poder y tamién el dexase faer de la ciudadanía..."

Pero, too ello, dende l'esperpentu distorsionáu que desixe l'absurdu de les obres d'esti autor y que supón el gran retu interpretativu: 

"Por otra parte, Ionesco preséntanos unos personaxes que son caricatures de sí mesmos (un retu pa los actores y les actrices). Por supuestu que, detras del maquillaxe y la grandilocuencia d'esos personaxes, surde l'angustia esistencial tan propia del teatru del absurdu y d'esti autor en particular. Pero Ionesco failo con un gran sentíu l'humor y plantegando situaciones realmente cómiques y ilóxiques. Solo cuando llega'l final de la obra y los actores y actrices yá sudaren lo suyo y el maquillaxe, posiblemente, yá se desdibuxare de les sos caras, solo entós, damonos cuenta de lo humanos y parecíos a nosotros que son."

Esti ye, sigún Cristina Bravo, "el plantegamientu que quise da-y a esti montaxe". Lo que va suponer un bayurosu llabor de tresformación y tresmisión, ensin dubia.

Respeuto a los elementos estilísticos, insistía-y yo na escenografía y nel vestuariu, que me paecen aspeutos mui interesantes a la hora d'interpretar una obra de Ionesco. La respuesta fala d'idegues clares na interpretación del testu y nos inevitables llímites materiales de la producción.

"En cuantes a la escenografía: mui simple, un simple tronu sobre dalgo que quiere paecese a un carrusel (yá nos prestaría tener ún de verdá, pero económicamente somos un grupu mui modestu). Para min, el carrusel simboliza a esi poder que xira y xira y s'emborracha nel so propiu xuegu, ayenu a lo que ocurre a dos palmos de les sos ñarices. Y del vestuariu: solo decite que 1000 veces que me lo preguntares, 1000 veces nun sabría que dicite. Simplemente, vilu asína dende'l principiu."

Polo tanto, tenemos cita (y espero qu'esta seya la primera de munches cites) coles caberes hores de la vida d'escesos del Rei Berenguer y de la so rebelión escontra la muerte, la realidá d'esta y la so inminencia. Y too ello, colos enfotos nidios del grupu xixonés: 

"La Peseta Teatro, con esta obra, deseya ufrir al públicu rises y reflexón, de les dos coses andamos nestos tiempos que curren bastante necesitaos."

Tola razón que-y falta al Rei (Berenguer), sóbra-y a los argumentos de "La Peseta Teatro" y de Cristina Bravo. Qu'haya rises. Y que valgan pa reflexonar.

¡Salú pal Rei moribundu!

Ficha téunica

El Rey se muere, del orixinal d'Eugène Ionesco.
Comedia absurda, d'una duración aprosimada de 90'.

Personaxes (Elencu):
Rey Berenguer I (Fernando Zapatero)
Reina Margarita  (Esperanza Munilla/Cristina Bravo)
Reina María (Saray González)
Alabardera (María Veiga)
Julieta  (Kuka Suárez/ Patricia García)
Médico (Javier Val)

Direición: Cristina Bravo

Lleer más...