La Peseta triunfó nos Premios del VIII Festival "Ciudad de Oviedo"

El sábadu día 20 celebróse la gala d'entrega de los Premios del VIII Festival de Teatru Amateur "Ciudad de Oviedo", organizado por FETEAS con la colaboración del Ayuntamientu capitalín.

Concurríen un total de catorce compañíes amateurs asturianes asociaes a la Federación de Teatru Amateur d'Asturies. Grupos que contribuyeron a faer un festival de lo más variáu, tocando dende'l xéneru costumista clásicu d'Eladio Verde al anováu d'Oliva, Carmen Campo, Segis Meana o Carmen Duarte, pasando pola adautación de clásicos del teatru contemporaniu como Ionesco o Salom y la puesta n'escena d'autores asturianos, como Maxi Rodríguez o Casona.

Representantes d'eses compañíes, amás de la xunta direutiva de la federación y los miembros del xuráu, aconceyáronse nel Auditoriu "Príncipe Felipe" pa la entrega los premios, que fue conducía d'una manera tan cenciella como efeutiva y divertida, pol grupu La Galerna.

Los premios fueron los siguientes:

Premiaos, miembros del xuráu, autoridaes y presentadores de la gala.

Meyor Direición: Cristina Bravo, de La Peseta Teatro; fueron nominaos Manuel Aller y Eladio Sánchez, de la Compañía Asturiana de Comedias, y José Ramón López, de Teatru Kumen.

Meyor Actriz: Silvia Sierra, de Teatro Kumen; Beatriz Barrieta, d'Odisea Teatro, y Esperanza Munilla, de La Peseta Teatro.

Meyor Actor: Fernando Zapatero, de La Peseta Teatro; Arsenio González, de la Compañía Asturiana de Comedias, Fernando Valle, del grupu Padre Coll, y Eusebio Tuya, d'Odisea Teatro.

Meyor Actriz Secundaria: Chusa Juarros, del Grupu de Teatru El Hórreo; Berta García, del Grupu Padre Coll; Ana Cristina Tolívar, d'Odisea Teatro, y María Vega, de La Peseta Teatro.

Meyor Actor Secundariu: Javier Val, de La Peseta Teatro; Miguel Ángel Peinado, del Grupu Padre Coll, y José Manuel González, de Teatru Kumen.

Meyor Escenografía: Odisea Teatro; José Manuel González y Teatro Kumen y Manuel Caño, de La Peseta Teatro.

Mejor Illuminación: José Ramón López, de Teatro Kumen; Alberto Ortiz, de La Capacha, y Odisea Teatro.

Mejor Espaciu Sonoru: Iván San Segundo, de La Máscara.

Mejor Vestuariu: El pespunte (Noelia y Kuka), de La Peseta Teatro; Teatro Kumen y Odisea Teatro.

A xuiciu del xuráu, quedaron desiertos los premios más lliterarios: el Premiu a la Meyor Idega Orixinal, el Premiu al Meyor Testu d'un Autor Vivu y el Premiu al Meyor Testu n'Asturianu d'un Autor Vivu.

P'acabar, el grupu de teatru Santa Bárbara de Llaranes llogró'l Premiu del Públicu, otorgáu poles votaciones de los asistentes al teatru Filarmónica mientres duró'l Festival.

El rei nun tá tan muertu.

María Veiga, Kuka Suárez, Cris Bravo, Manuel Caño y Fernando Zapatero (La Peseta)

El gran ganador de la xornada fue'l grupu xixonés La Peseta Teatro, que garró ná menos que cuatro premios (meyor direición, meyor actor principal, meyor actor secundariu y meyor vestuariu, amás de les nominaciones nes categoríes de meyor actriz, meyor actriz secundaria y meyor escenografía), pola versión de El rey se muere de Eugène Ionesco, qu'estrenaren nel Teatru Jovellanos, el 13 d'abril (cuando ficimos reseña d'ello nel blogue).

Ye'l premiu merecíu a un bayurosu trabayu bien fechu. La llectura personal que Cristina Bravo fai d'esti testu allocáu ye perfechamente correspondía na puesta n'escena y na interpretación del grupu actoral, too ello enmarcao nuna atmósfera escénica impecablemente absurda. Los "peseteros" llogren cola agonía del rei caprichosu treslladar al espeutador al reinu mauricientu, faciéndolu pasar por dellos estaos d'empatía, hasta pol paralelismu cola sociedá actual...

Sinceramente, espero qu'estos reconocimientos sirvan pa que La Peseta suba'l so rei a más escenarios. Dende'l so estrenu, namái fue puesta n'otres dos ocasiones: en Valdés y nel Festival d'Uviéu. Y ye bien triste qu'obres d'esta calidá tengan tantes dificultaes p'alcontrar un sitiu onde ser mostraes.

Vuelvo a glayar: "¡Salú pol rei moribundu!"

Chusa.

Juaco Fernández, Chusa Juarros y Josefina Lombán, d'El Hórreo

Chusa Juarros merez una atención aparte. El premiu del sábadu como meyor actriz secundariu ye namái qu'un reconocimientu a esta actriz qu'esporpolla talentu ellí onde se sube a les tables. Porque ye bien conocía polos sos papeles frescos y candiales dientro de les obres costumistes correndones y tan movíes que lleguen a rallar col vodevil, del grupu de teatru "El Hórreo" de Barcia. Pero ye quien pa machucar el prexuiciu vagu del encasiellamientu l'actor costumista cuando se viste cola piel de l'Angustias de La casa de Bernarda Alba con Mierescena y Teatro Casona, embaxo la direición d'Andrés Presumido.

Chusa Juarros merez una atención aparte por Actriz.

Lleer más...