Los ximielgos de La Cascaya

El Grupu de Teatru "La Cascaya" estrena esti sábadu 13 (20 hores), na Casa de Cultura de La Pola Llaviana, el so últimu espectáculo, Los gemelos, una revisión de la comedia del dramaturgu llatinu Plauto Menaechmi, considerada como una de les precursores nel xéneru d'enredu.

Manaechmi cuenta la historia de dos hermanos ximilegos, calcaos físicamente, nomaos Menecmo y Sosicles, perdiéndose el primeru de la mano del padre nun mercáu y adoptáu por una familia bien. L'ablucamientu del padre fai que muerra de dolor y el güelu camudá-y el nome a Sosicles pol de Menecmo. D'esta miente, dambos hermanos, separtaos, catendrán el mesmu nome y el mesmu aspeutu. L'enredu acaba de complicase cuando Sosicles (Menecmo II), yá d'adultu, decide dir a la gueta del hermanu perdíu. 

La versión de "La Cascaya", dirixía por Jairo Buelga y Olaya Suárez, ye fiel al testu de Plauto no que cinca na trama, pero tresllada la hestoria de la orixinal Epidamno a la imaxinaria Villasimplón y l'aición de la real Siracusa a la más afayaíza Pitiminí, averándola más a un espeutador que nun ha faer exercicios históricos, pa namái tener que dexase llevar pola comicidá de los diálogos y los caracteres.

"La Cascaya" inició la so andadura artística pol añu 2008, col estrenu de la obra de Darío Fo Aquí no paga nadie. Ésitu que se vio emponderáu colos montaxes posteriores Tu estás loco, Briones, Pon un idiota a la mesa, El programa de Alicia, L'apuesta los centollos (en collaboración con Kumen), los esqueches de Pastillita pastillita, el curtiumetraxe mineru La huída o la reivindicativa performance Guantánamo. Dalgunos de los sos miembros son habituales de la escena asturiana, participando en montaxes d'otros grupos y reconocíu'l so llabor con premios Aurora y Ciudad de Oviedo, ente otros; alcontramos así a Jairo Buelga, Desiree Lucena, Olaya Suárez, Zahara Ibáñez o Mario Alonso.

Una buena oportunidá pa realcontrase colos clásicos cómicos como Plauto.

Ficha artística
-Mario Alonso, Menecmo I (Pitiminí)

-Jairo Buelga, Menecmo II (Villasimplón) y vagabundu.

-Delfín Barbón, Cepillo

-Héctor Camblor, Mesenión.

-Cheli Alonso, Erotia y fada

-Desiree Lucena, Cilindra y hechicera

-Olaya Álvarez, muyer de Menecmo I

-Corsino Fernández, vieyu

-Jennifer Barbón, vagabunda

 

Ficha Téunica

-Direición: Jairo Buelga y Olaya Álvarez

-Illuminación y Soníu: Luis Camblor y Jennifer Barbón

-Vestuariu: Meli Barbón

-Material Audiovisual: Ramón Carrasco

-Escenografía: La Cascaya

-Istalación llétrica del espaciu escenicu: Nari Rozada y Pablo Amez.

Lleer más...