Premios Oh! 2015: toos cola carne de gallina.

Entrga del Premio Oh! 2015 al meyor espeutáculu

Carne de gallina

Allegaba a la gala d'entrega de premios como la gran favorita, con siete candidatures, y Carne de gallina, l'espeutáculu de Teatro del Cuervo, Arteatro y La Estampa Teatro, garró ná menos que cinco: meyor espeutáculu, meyor direición, meyor autor o coreógrafu, meyor intérprete masculín y meyor producción. Nun ye d'estrañar, porque'l trabayu de Maxi Rodríguez, Javier Maqua, Sergio Gayol y Sandro Cordero ye sobresaliente al consiguir tresportar una historia del cine a les tables ensin que pierda un rispiu d'intensidá, d'emoción y d'empatía col públicu.

Y quiciás seya esta el principal valir de la obra: la empatía. El públicu coneuta cola propuesta dende'l minutu ún (como lo facía na película) al vese proyeutaos los sos pruyimientos, los sos esmolecimientos y la so forma de sintir nunos personaxes arquetípicos. L'idealista, el sesudu, l'alloriada, la pragmática, el cooperador distante... hasta la solucionadora sensata, actúen, coles sos contradicciones fonderes, de manera que los espeutadores puean identificase fácilmente con ellos, porque trataríen de solucionar los sos problemes coles formes propuestes nel escenariu. 

Amás, les situaciones de tan estremes, son cómiques. Porque nun mos engañemos, la xente n'Asturies enllena los teatros cuando sabe que va riise. Y si, como ye'l casu, pa rematar dexa'l tastiu dulce de los apuros que s'igüen con xusticia, el públicu dexa la butaca col convencimientu de que mereció la pena dexar el fútbol y el "Sálvame" pa prau un par d'hores.

Y p'algamar esti efeutu, lo de menos ye l'ambiente onde s'asitia l'aición, anporque la situación de les cuenques mineres pue faer qu'empatice con elles cualisquier tipu públicu -recuerdo cuando falaba de Shirley Valentina-. Yo vila en La Felguera y la xente taba emocionao por atopase espeyao na escena; pero la mesma situación proponía Paco León en Carmina y amén, con una trama mui similar (o Oliva en Baráxoles col difuntu) y la xente entró al xuegu.

Sicasí, ye mui complicao dominar les regles del teatru costumista (sí, ye una obra costumista, ensin boina, pero con una camiseta de la discoteca "Agathas", porque toos anden a la gueta de la so Arcadia feliz y, anque nun l'algamen, porque nun esiste, alcuentren un camín pa siguir intentándolo). Y Maxi Rodríguez, Javier Maqua y Sergio Gayol conócenles. Y esa ye clave d'ésitu, que nun ye'l reconocimientu de los Premios Oh! 2015 (que tamién ye prestoso), sinón que la xente nun s'aburra de dir a ver la obra una y otra vez y que la producción tenga presente y continuidá. (El teatru costumista asturianu ye un xéneru que lleva 100 años llevando a la xente al teatru)

Norabona.

Falta d'asturianu

Esti añu, nun hubo candidatures de montaxes n'asturianu. L'idioma llariegu quedó arrequexáu a dellos guiños nos montaxes de Factoría Norte Mujer (con un llibretu que cuntó cola collaboración de Berta Piñán y un espeutáculu onde trabayó y cantó la gran Mariluz Cristóbal Caunedo) y Llumeru (espeutáculu de cai que fala d'un mundu somarín onde los personaxes tienen nomes n'asturianu), dambos premiaos (meyor interpretación femenina y meyor illuminación pal primeru; meyor indumentaria o carauterización oal segundu) y, por supuestu, a la fala amestada qu'aportaba Carne de gallina.

Escribía l'añu pasáu nesti blogue ("Candidatures a los Premios Oh! 2014", 31/1/14) ...

"Qu'el mundu profesional, salvo contaes y significaes esceiciones, dea la espalda al idioma propiu ye una mala noticia, tanto pa la llingua como pal propiu teatru profesional, y habría ser oxetu d'un análisis fonderu. Piérdese un espaciu de normalización llingüística de primer orden, que queda arrequexáu al mundu amateur; y piérdense espectadores, que vayan al teatru a sintir lo qu'en so casa se fala, a identificase colos personaxes que falen como so. Y d'esto, tanto Carlos Alba como Antón Caamaño, puen dar fe."

El seutor profesional dirá si-y paga la pena.

Llistáu de Premios

Premio Oh! al meyor espectáculu: Carne de gallina, de "Teatro del Cuervo", "Arteatro" y La Estampa Teatro.
Premio Oh! al meyor espectáculu infantil: En un lugar de la galaxia, de "Teatro del cuervo".
Premio Oh! a la meyor producción: Rosa Merás y Sergio Gayol por Carne de gallina.
Premio Oh! a la meyor dirección: Maxi Rodríguez por Carne de gallina.
Premio Oh! a la meyor autoría o coreografía: Maxi Rodríguez, Javier Maqua y Sergio Gayol por Carne de gallina.
Premio Oh! a la meyor intérprete femenina: Ana Morán por Mujer.
Premio Oh! al meyor intérprete masculín: Sandro Cordero por Carne de gallina.
Premio Oh! al meyor diseñu d'illuminación: Rafa Mojas y Eduardo Espina por Mujer.
Premio Oh! a la meyor banda sonora orixinal: Carlos José Martínez por ¿Qué te pasa Iván?
Premio Oh! a la meyor indumentaria o caracterización: Juan Hernaz y Carlos Barea por Llumeru.
Premio Oh! a la meyor escenografía: Sergio Gayol y Alejandro Hidalgo por En un lugar en la galaxia.

Lleer más...