Ye tiempu nadaliegu y, polo tanto, d'aguilandu y tán preparandose les mazcaraes d'iviernu por tola xeografía asturiana.
Equí dexo dalgunos anunciadores carteles d'estes mazcaraes pa esta temporada, dende'l perconocíu
guirria de San Xuan de Beleño, hasta Os Reises del Valledor y los de
Tormaleo, pasando polos recién recuperaos Aguilandeiros de San Xuan de
Grao. (De los sidros y comedies hemos falar tamién, capitulu a parte)
Esti añu 2014 asoleyóse'l trabayu del guirriu Antón Caamaño Teatru y figures rituales n'Asturies (del que yá falare nel so momentu), onde puen alcontrase la descripción y el porqué d'estes manifestaciones espresives asturianes. Pero voi apurrir del llibru Castaedo y Monón. En poucas palabras de Marcelino Lozano Sol, una auténtica enciclopedia d'estos dos llugares del conceyu d'Ayande, un capitulín dedicáu a "los aguilandeiros" de Monón.
"Poles fiestes nadaliegues y pol antroiro avezaben a salir polos pueblos los aguilandeiros, un grupu persones que podíen llegar a una docena, que diven antroxaos y pidiendo l'aguilandu. Esti podía ser comida y dalguna perruca, anques esto yera bien escaso. A cambiu, ellos metíen ruíu y cantaben monsergues, parodies y romances, too de lo más variao. Esto facíenlo delantre la puerta, dempués de pidir permisu pa faelo, mui diplomáticamente, el xefe (la gocha), porque había quien nun lu quería sintir, por llutu, enfermedá o dalgo similar. Siempre escomenzaben con amabilidá y con canciones convidando pa que dieren un aguilandu curiosu.
"Sigún l'aguilandu que dieren en ca casa, terminaben cantando coses más o menos agradables; había veces que se desfacíen en afalagos y otres yeren hasta groseros. La mazcara taba relaicionada colo d'allí y los participantes diben siempre cola cara tapada. Ún yera el da escoba, porque llevaba una escoba de gorbizu; otro, el das chocas porque llevaba munchos cencerros; la carcadoira, llevaba unas cardas y facía que cardaba la llana; el maragato, llevaba una romana y facía que pesaba los salazones, embutíos, güevos o otra cosa que-y dieren d'aguilandu; el diablo, llevaba cuernos y una pala pa faer travesures; el soldáu y el galán facíen de chulos y elegantes acompañaos de les sos dames (que podíen ser homes vestíos de muyer). Dempués taba la gocha, que yera quien facía de xefe de la comparsa y que nun llevaba la cara tapada. Tamién diba un gaiteru o curdionista pa tocar el son que cantaben y baillaben. Tolo recaudao yera pa una comida bien regada con vinu, onde se comentaben les anéudotes vivíen pel recorríu. Dempués, de nueche, facíen baille y, colos banduyos enllenos, ¡a baillar toos!"
