Esti xueves 22 de xineru, estrénase nel Teatru Palacio Valdés d'Avilés la producción de Quiquilimón y Tabló Vivant Madrid 20/80. Loco amor de cabaret, función que se repetirá'l vienres 23 nel Auditoriu de La Pola.
Va unos meses falé de la propuesta cuando se presentó un proyeutu de mecenazgu pa sacar p'alantre la producción. Pesie a que nun fueron quien p'algamar la cantidá presupuestada, el puxu de dambes productores y les ganes de faer dalgo novedoso con un xéneru, el teatru musical, tán clásicu yá, acabaron por dar buen fin a la idega.
Madrid 20/80 preséntase como "un espeutáculu musical que s'adientra nel mundiu de los cafés-cantantes, de los cafés con música en direutu. Dende una particular visión y con música de cuplé, afonda nuna España que s'alcuentra averada a la modernidá. Un viaxe al traviés la Historia y de la historia individual, que nos avera a un mundu non tan ayenu: l'individuu como ser particular".
Jesús Gago, nel papel de "Vicky", y Olga María Ramos, ficción y realidá, van convidanos a un mano a mano alrodiu'l tiempu que trescurre (la década los 20, la de los 50, la de los 80...) y nos marca, la esperanza y la desesperanza de la vida sobre les tables, el trabayu, l'arte, y la vida.
L'autoría y la direición queda a cargu de Pablo Garnacho, que fue quien pa idegar dos propuestes escenográfiques: una pa teatro y otra, quiciás la más afayaíza, por apropiada y íntima, pa cafés-teatros.
Ye una buena oportunidá pa faer un repasu de la tradición teatral española, pa esfrutar d'un momentu de suaños y cancios con más historia de la que cuenten, pa sofitar un proyeutu cultural de producción asturiana y con espeutatives estatales y, nel mio casu, p'acompañar a una amiga, como ye Olga María.
Ficha Artística y Técnica
Repartu: Olga María Ramos // Jesús Gago
Músicu acompañante: Ana Rodrigo
Autoría y Direición: Pablo S. Garnacho
Coreografía: Mar López
Rexiduría: Oscar Óliver
Espaciu Escénicu: José Luis Raymond
Ayte. Escenografia: Marta Leiva
Audiovisuales: Mayo Pimentel
Diseñu Gráficu: Helena de la Cruz
Asistencia Dramaturxa: Óscar Guedas
Vidiu y Foto: Mayo Pimentel
Produición Executiva: Rosa Garnacho y Naara Gil
Produición y Distribución: Rosa Garnacho y Pablo S. Garnacho
Una producción de: Producciones Quiquilimón y Tabló Vivant
