L'Asociación Cultural "Baluarte" entama'l II Certamen de Teatru "David Miguel" na villa naviega de Veiga. Esti certamen nació l'añu pasáu como homenaxe al compañeru del grupu de teatru de l'asociación, que
falleciera va cuatro años, dexando una güelga tremenda na vida cultural
de la llocalidá. L'Asociación Baluarte dempués del parón d'un par d'años, quería retomar la so actividá teatral, aquella que más-y prestaba al so compañeru.
L'ésitu de la edición del añu pasáu fue granible, asina qu'esti añu habíen dar un pasa p'alantre. Nesti segundu certamen medren les espeutatives. Primeramente, porque sube'l númberu de representaciones programaes, de 8 a 10. Y, segundo, porque s'amplía'l marcu d'aición, pasando d'una compañía de fuera la redolada a cinco.
El cartel, bien interesante, ye'l siguiente:
- 4 d'ochobre: Arizona, La Capacha de Xixón.
- 11 d'ochobre: La barca sin pescador, Odisea Teatro, d'Uviéu.
- 18 d'ochobre: Tres Sainetes (Desatraca, La Magdalena y San Roque y Los forofos), Compañía Asturiana de Comedias, de Xixón. #TNAst
- 25 d'ochobre: A la caza de la extranjera, San Tirso de Abres, d'Abres.
- 1 de payares: Anfitrión 2.11, Teatru Kumen de La Felguera.
- 8 de payares: Alpeirada nel boliche de Antón, Grupu de Teatru "Juan Manuel" d'A Caridá. #TNEo
- 15 de payares: Historia de hombres y El dineiro bon compañeiro, Pico de Faro d'A Roda. #TNEo
- 29 de payares: Esto era unha vez, Cioyo de Castropol #TNEo
- 6 d'avientu: El candidatu, Teatru Carbayín #TNAst
- 13 d'avientu: Las señoritas de Aviñón, Baluarte de Veiga.
Como pue vese, a nivel llingüísticu, pue ser ún de los certámenes que más bayura amuese: grupos qu'ufren propuestes en casteyán (La Capacha, Odisea Teatro, San Tirso de Abres, Kumen o Baluarte), amiéstense con compañíes del Centru que se presenten n'asturianu (Compañía Asturiana y Teatru Carbayín) y otres Occidentales que caltienen la so llingua eonaviega (Juan Manuel, Pico Faro y Cioyo, que torna una obra d'Oliva). Ensin dubia, esti certamen, quiciás ensin proponéselo, ye una buena muestra de la realidá llingüística d'Asturies. Pa felicitase por ello.
Por último, destacar l'escenariu de toles representaciones: esi Teatru Casino de Veiga, maravía del modernismu republicanu, que se mantién en pie gracies a la financiación privada y a asociaciones que, como Baluarte o la Sociedad de Amigos de Puerto Vega - El Casino, procuren del bon estáu d'esti edificiu de referencia.
