Esti cursu
Nesti momentu, tán últimándose los proyeutos de fin de cursu na Escuela Superior d'Arte Dramáticu d'Asturies, que se van estrenar en breve.
4ºA atrévese con un clásicu del británicu J.B. Priestley, El tiempo y los Conway, una obra estrenada allá polos años 40, que fala de les aspiraciones y frustraciones d'una saga familiar, los Conway, con unos miembros qu'actúen moviéndose pol estrechu filu de la cotidianidá de la vida, marcada pola allegría y la so consustancial y necesaria tristeza. Dirixía por Enrique Villanueva, tará interpretada por Marina Álvarez, Javier Arboleya, Beatriz Canteli, Patricia García, David López, Paula Mata, Marta Méndez y Roca Suárez, coles collaboraciones especiales de Miryam González y Jesús Prieto.
Estrenu, 29 de mayu (20:30), Teatru de la Llaboral
31 de mayu (20:15), Nuevu Teatru de La Felguera
19 de xunu, Teatru Audotoriu de La Pola
4ºB va encarar una obra del cómicu italianu Eduardo de Filippo, autor de la universal Filumena Marturano: La grande magia, nuna versión d'Eladio de Pablo que la torna como La gran ilusión. Trata'l tema de la confianza ciega nos seres queridos d'una forma atractiva y singular: nun balneariu, atopamos a la pareya formada por Calogero y la so muyer, Marta y a un magu; aprovechando un trucu, Marta y el magu escápense, quedando'l celosu Calogero pendiente d'una caxa onde'l prestidixitador-y dixo que taba la so muyer; Calogero, incapaz de creyer na infidelidá de la so muyer, creya una ilusión paralela, de la que se convencerá. El montaxe tará dirixíu por Nora López, cola asistencia de Pablo Mare y Irene Santos, y interpretáu por Javi Castro, Enrique Dueñas, Vicky Igareta, Saray M.H., Víctor Revilla, Noelia Riesgo, Ángela Tomé y Carolina Trancón.
Estrenu, 5 de xunu (20:30), Teatru de la Llaboral
12 de xunu (19:30), Centru Cultural Los Canapés d'Avilés
14 de xunu (20:15), Nuevu Teatru de La Felguera
El cursu pasáu
"Yo prometo fidelidá a los llabios de Rocky Horror Show
y a la decadencia que simbolicen, con suaños sensualesa plena lluz del día, pasadiellos eróticos
y pecaos de la carne pa toos"
Xuramentu de metamorfosis horrorita
Quiero echar la vista al pasáu añu 2013: los talleres de fin de cursu ufrieron dos obres de contraste marcáu: la reivindicativa puxa pola paz de Cruzadas, de Michel Azama, llevada a escena polos alumnos de 4ºA y la reivindicativa tresformación nes identidaes del musical The Rocky Horror Picture Show, de Richard O'Brien, qu'interpretaron los de 4ºB. Agora, unes y otros, yá son actrices y actores profesionales, con un flamante títulu qu'asina lo acredita. (He de reconoceme un horrorita matúsculu, que siempre esfrutó asgaya cola perfomance de Tim Curry y que vivió un momentu estraordinariu nel Teatru Nuevu de La Felguera cola estraordinaria interpretación de Manu Lobo; sigo convencíu de que fue un erru nun caltener montaxe tal, que triunfó en Xixón, Avilés y Oporto)
Pero tamién recordar el taller de Direición Escénica, Nosferatu, dirixíu por Inma Montes, embaxo la tutela del profesor Leopoldo García Pumarino, últimu pol momentu, d'esa disciplina, polo que'l direutor del centru, Eladio de Pablo, faló en términos de "rabia y coraje". Esti añu nun tendremos la posibilidá d'esfrutar con esi taller. Esperemos qu'en cursos vinientes se solucione.
