Fin de ciclu

El 27 xineru de 2014, retomé un blogue que morriera dos años enantes por falta d'enfotu. Nesi momentu concretu, quería sacar a la lluz los mios camientos sobre'l teatru fechu n'Asturies y, sobre too, del fechu n'asturianu. Pero tamién tenía la necesidá de dar a conocer daquellos proyeutos propios y ayenos que m'interesaren, les escritures, les llectures, los enfotos, les peripecies enriba les tables y les sensaciones esperimentaes dende les butaques. 

Yera la mio intención, el compartir con aquelles persones que me son afines la mio afición pol fechu escénicu. Mui pocos amigos siguieron esta páxina nes rees sociales; mui pocos me comentaron que sabíen de la so esistencia; y muncho menos s'interesaron por ella dempués de que-yos falara d'ella (y fícelo, con toos, porque yera la mio obra y toi mui orguyosu d'ella). Ye triste querer compartir colos amigos aquelles coses que te presten y qu'estos nun te quieran oyir.

Tampoco quiero olvidar qu'un de los oxetivos d'esti blogue yera sacar a la lluz la importancia social que tuvo'l teatru n'Asturies, como forma d'ociu fechu na tierra por asturianos y p'asturianos. Pémeque hai poques espresiones culturales o d'ociu llariegues que cumplan estos tres requisitos. Pero hai otres espresiones culturales y d'ociu qu'interesen más: ¿cómo va competir el teatru asturianu con Luis Enrique, un cachopu o un conciertu del "Gijon Sound Festival"? Entiéndolo (yo tuve nel conciertu d'Aute la otra selmana).

Anque quiciás, más que ná, la mio intención cabera yera pa cola xente esmolecío, como yo, pola non reconocencia de los drechos llingüísticos de los asturfalantes y pola más que posible desapaición del idioma (de los idiomes) del país. Quería enseñar la vitalidá qu'esti xéneru-y apurrió al idioma asturianu. La música, el deporte y los xuegos o la poesía nun fueron más qu'un sofitu residual al llabor inmensu que tuvo'l teatru (grupal y individual) pa caltener la llingua asturiana viva. Namái nel teatru la xente esperaba a los tipos que falaben asturianu; namái nel teatru se sintía l'asturianu como dalgo propio y non inventao; namái nel teatru s'usaba l'asturianu con normalidá. Pero nun paeció interesar.

Bueno, claro ta. Nun ye la xente quien tien la culpa o responsabilidá última de que los míos oxetivos nun se cumplan: el trabayu taba bien fechu, pero mal orientáu. L'únicu responsable de qu'esto nun furrule nin enganchara colos más que probatibles destinatarios, ye un servidor. 

Al final, el proyeutu quedó nuna axenda d'actividaes (de dos, si contamos la reestructuración de l'Axenda y #PaLaReciella), dalgo más intensiva qu'aquelles que puen atopase na rede, pero non muncho más completa, que me llevaba unes cuantes hores selmanales que nun voi poder recuperar (multipliquen 3 hores por 101 axendes y sáquense les conclusiones) de trabayu solitariu (porque colaboración por parte del seutor teatral fue mínima, anque hai esceiciones d'intercambiu qu'agradezco) y qu'acabó por resultame d'una monotonía insoportable. Si pa min ye un callu, ¿cómo nun lo va ser pa los demás?

Asina que llegó'l momentu de poner el pieslle a esta etapa del Teatreru Asturianu. Nun digo que nun vuelva. El teatru ye parte importante de la mio vida y tolos camientos que llevaba dientro y quise sacar, tan vixentes. Pero, de momentu, marcho. 

Y esto va permitime sacar tiempu pa dedica-y a la tecla, a la butaca, a la escena, a la direición, a la llucha polos nuestros drechos y, sobre too, a la mi muyer y a la mio fía. Ná ye más importante.

Apago cola reflesión de Voltaire (que ya tenía preparada):

"Cualaquiera que condergue'l teatru, ye un enemigu del so país".

Tamién ye enemigu de mío.

Haya salú.

Lleer más...

Mensax del Día Mundial del Teatru 2016

"¿Precisamos al teatru? 

Esa ye la entruga que miles de profesionales decepcionaos del teatru y millones de persones que tán cansaos d'él se pregunten.

¿Qué precisamos del teatru?

Nestos años en que la escena ye tan insignificante, en comparanza coles places de les ciudaes y les tierres de los países, onde se tán xugando les traxedies auténtiques de la vida real.

¿Qué pasa col teatru?

Galeríes y palcos chapaos n'oru nes sales de teatru, sillones de terciopelu, nales puerques n'escenarios, voces bien pulíes de los actores, o viceversa, daqué que puede tener un aspeutu aparentemente distintu: caxes negres, enllordiaes de folla y sangre, con un montón de cuerpos desnudos rabiosos nel interior.

¿Qué ye quién a dicinos?

¡Tou!

El teatru pue dicínoslo tou.

Cómo los dioses habiten nel cielu, o cómo los presos amortecen en cueves escaecíes so tierra, o cómo la pasión pue alzanos, o cómo l'amor pue arruinanos, o cómo naide precisa una bona persona nesti mundu, o cómo reina l'engañu, o cómo la xente vive n'apartamentos, demientres los neños s’amostalguen en campos de refuxaos, o cómo toos tienen de recular de nuevu pal desiertu, o cómo día tres día nos vemos obligaos a esprendenos de les nueses persones queríes; el teatru pue dicilo tou.

El teatru siempres foi y va siguir siendo siempres.

Y agora, nestos últimos cincuenta o setenta años, ye particularmente necesariu. Porque si usté echa una güeyada a toles artes públiques, pue vese de secute lo que namái'l teatru nos da, una palabra de boca en boca, una mirada de güeyu a güeyu, un xestu de mano en mano, o de cuerpu a cuerpu.

Nun se precisa dengún intermediariu pa trabayar ente los seres humanos, que constituya'l llau más trespariente de la lluz, que nun perteneza a dengún sur o norte o este o oeste, oh non, ye la esencia de la mesma lluz, que relluma en tolos rincones del mundu, darréu reconocible por cualesquier persona, yá seya contraria o amigable escontra ella.

Y precisamos al teatru que permanez siempres distintu, precisamos teatru de munchos tipos distintos.

Sicasí, creo qu'ente toles formes y formes de teatru posibles, les sos formes arcaiques agora resulten ser les de mayor demanda. El teatru de formes rituales nun tien d'oponese artificialmente al de les naciones ”civilizaes". La Cultura secular ta siendo cada vez más capada, la llamada "información cultural" sustitúi gradualmente y suplanta a les entidaes simples, cuasi como la nuesa esperanza de que col tiempu acabe'l día.

Pero soi a velo claramente agora: el teatru ta abriendo les sos puertes de par en par. Entrada de baldre pa toos y caún.

Al diañu con aparatos y equipos, namái que tienen de dir al teatru, ocupar files enteres nel patiu butaques y nes galeríes,sentir la pallabra y mirar les imaxes en vivo!

Ye'l teatru que ta delantre d'usté, nun se desdexe y nun se pierda la oportunidá de participar nél, quiciabes la oportunidá más preciosa que tenemos nes nueses vides baldíes y azotaes.

Precisamos cada mena de teatru.

Namái qu’ hai un teatru que de xuru nun lu precisa naide, refiérome a un escenariu de xuegos políticos, un teatru de polítiques “ratoneres", un teatru de políticos, un teatru inútil de la política.

Lo qu'ensin dulda nun precisamos ye un teatru de terror cotidianu, yá seya individual o coleutivu, lo que nun precisamos ye'l teatru de calabres y sangre nes cais y places, nes capitales o nes provincies, un teatru falsu de los enfrentamientos ente relixones o grupos étnicos."

Torna al Castellán: Jorge Crespi

Versión al asturianu (sobre la torna al castellan): Antón Caamaño

Copyright © 2016 by Anatoli Vasiliev and ITI, France

Lleer más...

Vienres de charres

Esti vienres día 4 de marzu, ye día de charres sobre teatru asturianu. Y charres d'altor, polos temes de másimu interés pa cualisquier teatreru asturianu y poles persones que van desendolcales.

Antón Caamaño y José Ramón Oliva

Pa escomenzar, l'actor, direutor y doctor Antón Caamaño va esponer la so tesis Bases pa un corpus de teatru n'Asturies, dientro de les Xornaes Culturales de la Escuela Superior d'Arte Dramáticu d'Asturies. Tien interés abondo l'estudiu, porque trata de la situación actual del teatru n'Asturies, dempués de faer un esamen del desendolcu de la profesión dramática nel país, de les oportunidaes esistentes y de les perdíes, amás de les torgues qu'impiden que l'actoral puea dir más p'allá qu'una profesión de supervivencia. Pero, amás, ha destacase la importancia de que la tesis fuere presentada n'asturianu y lleída nel nuesu idioma na Universidá de Vigo. D'importancia mayúscula esta charra que va tener llugar na propia ESAD, a partir de les 13:30 hores. 

Y de tarde, a les 19:30 hores, nel Aula de Cultura de Sotrondio, l'autor José Ramón Oliva va dar otra charra, esta vuelta sobre teatru costumista asturianu y teatru popular asturianu. Un buen momentu pa establecer los parámetros definitorios de dambos conceutos, tan interrellacionaos que, dacuando, lleguen a tracamundiase y usase como sinónimu. Y como ye un tema siempre caliente pal alderique, el propiu Oliva convídanos a que l'actu acabe convertíu nuna mesa redonda, onde'l públicu puea participar. 

Porque'l teatru da pa muncho más allá qu'asistir como públicu de forma pasiva. Y porque'l teatru asturianu y d'Asturies, ha dar muncho que falar.

Lleer más...

Premios Oh! 2016. O lo que ye lo mesmo: Marga y Maxi.

Los claros protagonistes de la edición de los Premios oh! del añu 2016 fueron Marga Llano y Maxi Rodríguez, dos creadores d'auténticu valir que son quienes pa llevar les sos idegues más allá del papel y conseguir confeccionar propuestes dramátiques compleyes, qu'aporten a les tables con un discursu propiu y dispuestu a ser inxeríu  y que, dalgo que ye bien importante pa un teatru profesional, enganchen col espeutador.

Marga Llano

Marga Llano, amás de participar xunta otres compañíes, tien un proyeutu estable de producción cola compañía Escenapache, onde colabora con actores de relevancia nel espeutru televisivu asturianu, como Alberto Rodríguez, Joaquín Pajarón o Pedro Durán, que protagonicen obres de tonu humorísticu y n'asturianu, como Planeta Joselín, La loca historia de Asturias o Yo mat'e a Kennedy... pero fue sin querer, y otres que combinen esa comicidá con música, como Petit cabaret by Charlie Table o la recientemente estrenada Lo que vos dea pola gana (cola participación del gran Jerónimo Granda). El casu ye qu'Escenapache furrula bien (y na axenda d'esti blogue pue comprobase esti fechu) gracies a esa combinatoria que formen l'humor asturianu, la popularidá y el trabayu de calidá, fórmula que lleva al públicu a los teatros y qu'obliga a los programadores a contratar.

Pero siempre ha haber un retu que se salga de la fórmula. Y esti tien nome de muyer: Juana o el demonio de la curiosidad. Una obra queer, en palabres de la so autora, onde se "fala d'una muyer que tresciende la so propia condición de muyer pa cumplir col so destín; como individuu". Retu pol tema, la emponderación de la muyer, que sigue siendo mui problemáticu de tratar y pal que garra una figura histórica, Jeanne d'Arc, como exemplu de la so vixencia nesti patriarcáu actual. Y retu pol tratu d'un personaxe que, pol so atractivu, tá más que machacáu nel teatru. Pues Marga Llano déxase cubrir d'influyencies de los autores clásicos y contemporanios pa da-y el so toque femenín y faer una propuesta decisiva, contundente y imprescindible. Nun pue sorprendemos, casi dos años dempués, que'l IX Premiu Jovellanos a la Producción lu llevara esti proyeutu escénicu. Sí, pa que quede nel debe de la nuestra conciencia teatral, que la obra nun llegare a la docena de representaciones dende que s'estrenara n'avientu del 2014 nel Teatru Jovellanos.

Maxi Rodríguez

L'actor y dramaturgu, garró otra vuelta la direición escénica d'un de los sos testos. El resultáu: un nuevu ésitu. Y viendo los antecedentes, paez ser qu'aseguráu. Bien cierto ye que l'añu pasáu, Maxi Rodríguez y Teatro del Cuervo paecíen xugar sobre seguro cola adautación de Carne de gallina, títulu yá consagráu na memoria cinéfila asturiana; pero quiciás, por eso, una apuesta complicada que resultó un aciertu total, con (al menos na mio cuenta) cuatro decenes de representaciones per tol Estáu. La producción d'El callejón del gato, Crecer, ye la nueva apuesta. Y tien dellos ingredientes, como la solvencia de Maxi como autor y direutor, el desempeñu actoral de varies xeneraciones de profesionales y la esperiencia de la compañía de MacBeth y Parasoles barrocos, pa convertise nun nuevu triunfu. Al menos, el xuráu de los Premios Oh! 2016 asina lo vaticina. 

Nun viera Crecer tovía, anque sí pude siguir la so evolución nes rees sociales onde, tanto l'autor/direutor como otros miembros del elencu (Roca Suárez, Paula Mata...), s'ocuparon de da-y vida. La obra, que quedara finalista del V Certamen Iberoamericano de Teatro Infantil y Juvenil de Bilbao, estrenóse'l 31 d'ochobre nel Teatro Nuevo de La Felguera. Les crítiques punxéronla mui bien, falando d'ella como una obra que trata los conflictos interxeneracionales, onde los adultos compórtense como adolescentes y los mozos han tomar el papel d'una madurez qu'inda nun pudieron esperimentar. Una comedia agridulce que tien pinta de ser verosímil al estremu.

Los premios y los premiaos

• Meyor espeutáculu: Crecer, d'El Callejón del Gato
• Meyor espeutáculu infantil: Vientos de mar, d'Higiénico Papel Teatro
• Meyor direición: Marga Llano, por Juana o el demonio de la curiosidad
• Meyor autor o coreógrafu: Maxi Rodríguez, por Crecer, d'El Callejón del Gato
• Meyor intérprete masculín: Félix Corcuera por Crecer, d'El Callejón del Gato
• Meyor intérprete femenina: Paula Mata por Crecer, d'El Callejón del Gato
• Meyor productor: Escena Apache Acción Cultural, por Juana o el demonio de la curiosidad
• Meyor illuminación: Rubén Rayán por Juana o el demonio de la curiosidad, d'Escena Apache
• Meyor banda sonora orixinal: Mar Álvarez por Crecer, d'El Callejón del Gato
• Meyor indumentaria o carauterización: Azucena Rico por Juana o el demonio de la curiosidad, d'Escena Apache
• Meyor escenografía: Vicente V. Banciella por Juana o el demonio de la curiosidad, d'Escena Apache

El Premiu Oh! de Honor, decidíu por ACPTA, fue esti añu pal equipo téunicu del Teatru Palacio Valdés.

Insisto: falta asturianu y teatru costumista.

Nel discursu bien reivindicativu, como había de ser, David Acera, qu'actúo en nome de la Presidenta d'ACPTA como voceru de l'asociación, faló de la falta de compromisu xeneral de les distintes alministraciones asturianes pa col seutor teatral profesional del país: mínimes ayudes económiques del Principáu, que provoquen que les propuestes profesionales tean destinaes a ser "de función única", y descuidu del Circuito Asturiano de las Artes Escénicas, amás de motor cultural, creador d'empléu y arriquecimientu económicu y social. Nin un pero.

Agora bien, nel Circuítu, la presencia del asturianu ye mínima (dalguna propuesta infantil, Cellero y Nun Tris... y poco más). Entiéndolo: pa munchos nun ye "Cultura en mayúsculas". Y nun falo solo de profesionales del seutor, sinón tamién de programadores: esnobismu hai y siguirá habiendo nesta Asturies dominada pol autoodiu. 

Dicía Caamaño va poco n'Alderiques d'Asturies que los programadores de l'Axenda Didáutica preferíen obres en casteyán de grupos d'afuera que la mesma n'asturianu, de compañíes profesionales llariegues. Ye triste. 

Pero esto nun pasa col públicu adultu. La xente que va al teatru n'Asturies pide teatru n'asturianu. Y esi ñeru cúbrenlu los programadores colos grupos aficionaos. Porque esa estaya de la cultura asturiana, que nun s'estudia na Escuela d'Arte Dramáticu y en poques academies d'iniciativa privada, nomada "teatru costumista asturianu" ¡enllena les sales! Y nun mos engañemos, el programador quier, a la fin, ver los sos centros de cultura coles butaques ocupaes. Independientemente de "que bien pudieran verse reflejados en uno de los lúcidos textos costumbristas de un conocido dramaturgo asturiano", o non.

Nun tien desplicación que denguna compañía profesional apueste pol teatru costumista asturianu. Lo más averao son les propuestes d'Escenapache. Y, como dixe enriba, son ésitos de públicu. Y les compañíes profesionales han d'apurrir esi serviciu social d'averar a la xente la Cultura, pero tamién ganar perres. Prestaríame tanto que s'intentara.

Lleer más...

#AlderiquesTeatru

Esti sábadu 6 de febreru, el programa "Alderiques d'Asturies" de la cadena autonómica MuyMuy Televisión dedicaba la so emisión al teatru asturianu. Samuel Gradín, direutor y conductor del programa, contó esta vuelta con cuatro personaxes punteros dientro del teatru'l país y n'asturianu: el dramaturgu y direutor del grupu Teatru Carbayín, José Ramón Oliva; l'actor y monologuista Carlos Alba "Cellero"; el direutor del grupu Telón de Fondo, Lluis Antón González; y l'actor, direutor de Nun Tris, Antón Caamaño.

Valió p'averar al públicu a la situación actual del teatru fechu n'Asturies, prestando gran atención al d'idioma asturianu. Aldericóse sobre la importancia del teatru y de l'asturianu dientro de Cultura'l país, sobre la xestión pública y la participación de l'Alministración na programación teatral y sobre la situación del seutor profesional, del teatru costumista y de les ventayes ya inconvenientes que supón llevar a les tables un teatru pensáu n'asturianu.

Esperemos qu'esta iniciativa d'alderiques siga más tiempu, tratando tou tipu de temes nel nuestru idioma. Y, por otru llau, esperemos que'l teatru allegue a les pantalles de televisión, xera que sedría beneficiosa pal públicu, que s'averaría a un fechu cultural de primer orden, pal seutor teatral, porque atoparía un requexu bien afayaízu pa dar a conocer les sos producciones y camientos, y pa los propios productores televisivos, que cubriríen un vacíu que pue suponer un ñeru granible de públicu. A ver si la propuesta nun cai en sacu rotu.

Gran aporte pa tolos teatreros asturianos. A nun perdéselo.  

  

Lleer más...

Los siete samuráis

Acabante de ver "Los siete samuráis".

Tenía'l recuerdu de tenela vista enantes pero, salvo dalgunos flaxes, nun yera quien a recordar ná. Igual va ser que nun la viere pero tuviere na memoria delles imáxenes, que yá son icóniques de la Historia del cine (como la bandera de los seis círculos, el triángulu y el ideograma del campesín).

Plasmóme la teatralidá de Kurosawa. Desplícome:

Les composiciones d'escenes (les triangulaciones, la sumisión al espaciu, les acciones paraleles...) son más propies d'unes tables (y más d'un "hanamichi") que del cine y permiten al espeutador apreciar al milímetru les interpretaciones de tolos actores qu'apaecen en pantalla.

Les carauterizaciones estraordinaries ufren, como nel teatru tradicional xaponés, un estudiu completu de la personalidá del personaxe con un solu vistazu. Asina, los efeutos algamaos mediante les máscares del dramáticu "nō" y del cómicu "kyōgen" y coles pintures faciales "kumadori" del más conocíu "kabuki", consíguelos Kurosawa colos sos ablucantes primeros planos. El xestu conteníu del vieyu Gisaku, al comienzu la película, cuando-yos da'l conseyu a los sos vecinos de que vayan a la gueta d'unos guerreros pa protexer l'aldega, ye la viva imaxen de la contención del miéu. Un "mie" (pose que fai l'intérprete pa emponderar una emoción que quier interpretar) en toa regla.

Más: los movimientos grupales. Sobre too, nes escenes de guerra, vense unos movimientos repetitivos, propiciaos pola estratexa de defensa del argumentu. Los bandidos entren a caballu n'aldega y van d'un llau pa otru, aprovechando al llímite la plaza de la aldega; los movimientos táuticos de los campesinos convertíos en llaceros detrás del samurái de turnu; les carreres de les muyeres detrás de los bandidos malferíos... tán cortaos pol mesmu patrón de les pelees nel teatru de marionetes "bunraku" (marionetes que, de menor escala, apaecen nuna escena).

Y, por último. Falaba enantes del "hanamichi", lliteralmente "camín florío". Kurosawa inclúyelo dafechu en delles escenes y fáilu protagonista pa introducir la trama amorosa que nun pue faltar en toes les obres costumistes que se precien.

Plasmóme Kurosawa, sí, por cómo fue quien pa llevar les formes tradicionales del teatru xaponés pa que fueren reconocibles, aceutaes y almiraes por públicos de cualisquier sitiu.

Lleer más...

Comedia en bable

Fai unos díes, Eladio Sánchez, direutor de la Compañía Asturiana de Comedias, dexónos a la mio hermana y a min unos cuantos documentos antiguos del so archivu personal, esto ye, l'archivu más completu del teatru asturianu del sieglu XX.

Ente aquellos documentos, el primer cartel que se conserva de la Compañía Asturiana. De la primer Compañía Asturiana de les munches, de munchos direutores y primeros actores y actrices, qu'hubo na primera metá de la dómina pasada.

Esta Compañía Asturiana primixenia fue una de les muestres del proyeutu d'entamos del sieglu XX, onde creadores de diferentes ámbitos artísticos s'aconceyaron alrodiu del enfotu común de creyar un Teatru "Rexonal" Asturianu, onde temes y formes propies de la tradición asturiana, tanto teatral como musical, fueren revisaes y actualizaes y llevaes a la realidá polos más preparaos y afamaos intérpretes asturianos. (Nun uso'l términu "nacional", pol enclín rexonalista de los propios ideólogos del movimientu, pero tratábase d'un auténticu proyeutu de Teatru Nacional)

L'espeutáculu trátase, nun podía ser d'otra manera, d'un amiestu de teatru de corte costumista y canciones asturianes, dirixíu por Pachín de Melás, con Francisco R. Lavandera como maestru concertaor y con Isidro Carballido (nel documentu, presentáu pola errata como "Isidoro") como actor principal y direutor escénicu, y que fuera representáu nel Teatru Campoamor d'Uviéu, el 20 de xunu de 1920.

Y, tampoco podía ser d'otra manera, la redaición del programa ta pensada y argumentada n'español, pero los testos y la interpretación yera n'asturianu, dalgo indispensable pa que'l públicu a quien diba dirixío, trabayador y autóctono, s'identificara colo ufrido, y que nun quedare namái nun intentu pa les elites sociales y culturales con toles premises necesaries pa fracasar a piques d'escomenzar.

D'esta miente, desplíquense dos frases qu'apaecen nel programa: "obras en el meloso bable" y "la comedia en bable". Paternalismos aparte, nun s'usen de forma despeutiva, como va pasar más alantre, cuando autores de los 30 y 40 s'escusen por escribir nesta llingua (anque les didascalies siempre van ser n'español hasta va bienmpoco) o, más p'alantre, nos 80 o 90, por producir testos de corte costumista "non actualizaos". Non. Úsense como reclamos pa que la xente vaya a ver obres de teatru n'asturianu, coles que puen identificase ensin esfuerciu; y revisaes polo más granao de la produición asturianista, porque l'asturianu cultu y escritu nómase dende entós "bable" (dempués valdrá p'argumentar prexuicios de separtación ente llingua escrita y llingua oral...).

La "comedia en bable" esporpollará nesos años, pesie a que'l proyeutu de Teatru Rexonal Asturianu nun se consolide como finxu de referencia cultural pa la creyación y pa la crítica. Y xeneraráse un xéneru dramáticu, la Comedia Costumista Asturiana, coles sos carauterístiques propies (personaxes arquetípicos, trames emocionantes y tópiques y idioma asturianu), que trascenderá nel tiempu pa llegar hasta anguaño con un puxu similar.

Lleer más...

Entrevista al Teatreru n'El Comercio

Trescribo la entrevista que me ficiera Enrique Carballeira pa la seición de Cultura Asturiana d'"El Comercio" y "La Voz de Avilés" Alitar Asturies, asoleyada'l sábadu 22 de payares de 2014. A ver qué vos paez.

Sergio Buelga Casas (Xixón, 1979) ye'l ganador del certame de teatru de l'Academia de la Llingua Asturiana. Trabaya como animador y cuentacuentos. Nos últimos meses recibió un bon númberu de reconocimientos: dos premios dramáticos y tres por relatos curtios. Amás lleva'l Blogue d'un teatreru asturianu, que trata de l'actualidá teatral n'Asturies, poniendo'l focu de forma especial na escena en llingua asturiana.

-¿Qué significa pa usté esti premiu?

Pa empezar, ye una alegría bien grande siempre qu'a ún-y reconocen dalgún méritu, anque namás seya por saber que dalguien esfrutó colo escrito y te lo agradez. Pero que l'Academia, la institución modelu na defensa de los nuestros Drechos Llingüísticos, premie los tos enfotos d'escribir teatru n'asturianu, ye un reconocimientu mayor.

-Vemos que tien dellos premios lliterarios, teatrales y narrativos... ¿Con qué se quedaría si tuviera qu'escoyer?

Escribo obres dramátiques y cuentos porque son los xéneros que más s'afayen a la mio forma de ser y que meyor me dexen espresame. Pero soi más teatreru qu'escritor: dende va unos diez años, déxenme actuar na Compañía Asturiana de Comedias y, dende dalgo menos, escribo obres dramátiques y llevo'l "Blogue d'un teatreru asturianu". Y too n'asturianu, claro.

-¿Son importantes los premios a la hora d'espardir el trabayu de munchos autores?

Supongo que dependerá de la sonadía mediática que se-yos dea más que de los premios en sí. Toi seguru de que muncha xente va enterase d'esti galardón lleendo este llinies, porque los medios de prensa de mayor repercusión n'Asturies nun tuvieron el día la entrega. Y ye una llástima, porque los asturianos tán perdiéndose la enorme calidá lliteraria que ta xenerándose anguaño.

-Falenos de la obra premiada, ¿cuál ye l'argumentu?
Ondina Llagu y el so hermanu Marino son dos vieyos curanderos que viven nuna casa desaverada'l mundu, a onde llega Xurde Peña, un etnógrafu que ta faciendo un documental sobre oficios n'estinción. Amiesto tradición y mitoloxía, unes plizques de relixón y política y daqué de medicina tradicional con azabache y unos cuántos truenos. 

-¿Qué temes-y presten más a la hora d'escribir teatru?

Aquellos que me dexen falar de les emociones de la xente. Falé de les últimes hores de Nerón en Luciu Domiciu, de la fuercia de superación les muyeres n'El abellugu (Premiu Dulce por Amargo 2013), de les zunes de tres amigos nuna cueva en La bolera del oru (Premiu Carlos Álvarez Novoa 2014) o de la llocura los poderosos en Zanzíbar.

-¿Cómo valora l'alitar de la escena asturiana nestos momentos?
Soi de la opinión qu'el teatru n'Asturies tien un presente garantizáu y un futuru prometedor, pero porque la xente teatrero tien ganes de ganase la vida sobre les tables, más que polos sofitos esteriores. Y nótase. Toles selmanes faigo una axenda d'eventos teatrales pal blogue y pueo dicir qu'hai una enorme bayura d'espeuáculos y compañíes y que tán esporpollando sales de xestión privida qu'apurren, en conxuntu, una ufierta mui interesante. Y eso, falando namás que del ámbitu profesional. icasí, pémeque tán perdiendo la oportunidá d'esplotar la veta del teatru n'asturianu: solo un par de compañíes profesionales apuesten por ello y son aquelles que más representen. Munches desanícienlo porque nun-y ven posibilidaes de salir fuera y, dempués, malpenes faen dos o tres funciones de los sos montaxes, y n'Asturies.

-¿Recuperáremos la llingua asturiana?
Yo soi optimista porque ye una reivindicación xusta, anque seya d'una minoría. Defendes un estáu de convivencia onde haya ciudadanos de segunda que tengan qu'adautase a los privilexos d'una mayoría ye una aberración, que ta pasando agora n'Asturies, con milenta exemplos de xente a quien se-yos enllena la boca cola igualdá de drechos y la convivencia social, pero que dempués señalen col deu a quien quier usar l'asturianu con normalidá. Ye llabor de toles persones d'Asturies trabayar pa que s'igüe.

Lleer más...

XXXV Selmana de les Lletres Asturianes

Otru añu más, cellébrase la Selmana de les Lletres Asturianes ensin atalantar nin de llueñe la cooficialidá pola que los asturfalantes naguamos col enfotu de ver los nuestros drechos llingüísticos reconocíos. Mientres tantu, mientres les autoridaes y munchos de los nuestros vecinos y conocíos se caltienen na intolerancia más reaccionaria, prexuciosa y dafechu fata, solo mos queda enseñar arguyosos la bayura lliteraria ya histórica del nuestru idioma.

Esti añu 2014, con motivu del 125 aniversariu de la primera espublización d'una viñeta n'asturianu, la Selmana va tar dedicada nel cómic, presentándose'l xueves 8 de mayu na Feria del Discu y el Llibru n'Asturianu d'Avilés el tebéu Dibuxando'l camín, fechu por Ruma Barbero, Isaac del Rivero, Javier A. Marinas y Alfonso Zapico, los cuatro ganadores del Premiu "Alfonso Iglesias". Equí, el programa completu.

Y precisamente d'Alfonso Iglesias y de la vinculación del cómic col teatru quisiere falar. Fuere Alfonso Iglesias pintor y dibuxante de viñetes, siendo'l creyador de los personaxes fonderamente conocíos de Pinón, Telva y Pinín, qu'asoleyara nel periódicu Región yá polos años 30 del sieglu pasáu. Ye precisamente nesos años cuando'l teatru asturianu tien más puxu y Alfonso decide arimase a la Compañía Asturiana dirixía por José Manuel Rodríguez. Como nos diz Jesús Menéndez Peláez:

"Dende 1940, cuando preparó los decoraos de Nieve en el puerto hasta A la sombra del carbayo (1950), la escenografía d'Alfonso Iglesias acompañó en delles ocasiones los grandes ésitos de la Compañía Asturiana. Particular interés va tener la escenografía qu'Alfonso Iglesias preparó pa la so obra, Pinón y Telva, que s'estrenará en febreru de 1943; d'esta mena, les dos facetes d'Alfonso Iglesias como dramaturgu y como pintor axúntense nuna de les formes más significatives del teatru rexonal asturianu. En 1950, las Estampas Líricas Ovetenses constituin una nueva creyación escenográfica d'Alfonso Iglesias; un conxuntu d'escenes costumistes de la ciudá d'Uviéu, conocíes amién embaxo'l titulu xenéricu de A la sombra del carbayo; la puesta n'escena d'estes estampes sedrá una nueva ocasión pa que l'autor de 'Pinón' y 'Telva' puea realizar nuevos decoraos, [...]".

J. Menéndez Peláez, El Teatro Costumbrista en Asturias, Uviéu, 2004

La escenografía qu'Alfonso idea pa la so Pinón y Telva supunxo una vuelta de tuerca más a les propuestes teatrales contemporanies: los personaxes de la obra van apaeciendo de les viñetes d'un periódicu, que cuenta delles noticies protagonizaes por Pinón y Telva y que ta escolingáu d'un hórru qu'aporta les lletres "Compañía Asturiana". Alfonso xunta les sos pasiones, teatru y cómic, y les sos realidaes, vanguardia y costumismu, quiciás na escenografía más destacable de l'actividá teatral asturiana, tovía va 71 años.

(Como curiosidá, destacar que la publicidá ufrida pola Compañía Asturiana pal estrenu de Pinón y Telva apurre una caricatura de José Manuel Rodríguez como Pinón fecha pol dibuxante de cabecera'l grupu, Marola)

Por último, dicir que la obra lliteraria d'Alfonso nun queda namái na so bayurosa obra gráfica. Collabroa en radio, televisión y cine, escribe poesía y, por supuestu, teatru: amás de Pinón y Telva y A la sombra del carbayo, alcontramos el sainete cómicu El pariente d'América, la comedia Tengo una casina blanca, la estampa asturiana La noche de San Juan, la estampa llanisca Un traje de asturiana (non estrenada) y El yeye de Proaza, obra inacabada onde quiso ametar música electrónica y gaita y tonada.

Y, como nun podía ser d'otra manera, esta XXXV Selmana de les Lletres Asturianes va cuntar tamién col teatru, dafechu la espresión llitéraria que más averó la llingua asturiana a la xente, cola participacipación de Producciones "Nun Tris", a les 11:00 hores del llunes 5 de mayu, nel Teatru de Llaboral Ciudá de la Cultura de Xixón. Va ufiertase teatru pa escolinos cola representación de la obra Bastián y Bastiana.

Lleer más...

Teatru infantil pal Día del llibru

La narración d'un cuentu infantil ye una de les meyores estrataxes pa llograr una efeutiva animación a la llectura. En díes singulares, como lo ye'l día cuando se cellebra la suerte de tener al alcance de la mano una montonera llibros onde somorguiate y esfrutar con milenta histories, esta narración pónse de gala hasta convertise en cuentu dramatizáu. Asina lo entendieron delles compañíes teatrales asturianes, qu'ufren con buen criteriu teatru infantil ente'l so corpus de montaxes. Y asina lo entendieron un puñáu de conceyos, que van cellebrar esti Día'l Llibru del 2014 con teatru pa críos.

Escomienza la ufierta esta mesma tarde, día 22, cola obra ganadora del Premio Oh! 2014 al meyor espectáculu infantil: Semillas de cardamomo de "El Callejón del Gato". Sedrá a les 18 hores, nel CMI d'"El Llano", en Xixón.

Yá el Día del Llibru, la Casa Municipal de La Pola Llena abrirá les sos puertes de par en par a los pequeños tol día:

• A les 9:00, Cuentos que encajan de "Tras la puerta títeres".
• A les 11:00 y a les 12:00, Sesión de cuentos a cargu de "La sonrisa del lagarto".
• A les 13:00 y a les 17:00, Silencio, lectores trabajando de "Tras la puerta títires".

En Nava, na Casa de Cultura "Marta Portal", a les 18 hores, "Producciones Quiquilimón" representará Cuatro hojas y la máquina fabulosa.

 En "El Liceo" de Navia, a les 18 hores, "Yheppa Títeres" echará "La cartera de mi pueblo".

A les 11 de la mañana, nel Teatru Municipal de Samartín del Rei Aurelio, en L'Entregu, Romeo y Julieta por "Con Alevosía Teatro".

En Vilanova d'Ozcos, na so Casa de Cultura, a les 17 hores, Sesión de cuentos por "La sonrisa del lagarto".

Nel Teatru "Riera" de Villaviciosa, "Mar Rojo Producciones" echará Nina cocinamiedos, a partir de les 12.

La fiesta siguirá'l día 24 en Muros, en Salas y en Llangréu:

• Na Casa de Cultura de Muros, a les 10, "La sonrisa del lagarto" brindaramos la so Sesión de cuentos.
• Nel Salón d'actos de "La Veiga", a partir de les 11, Silencio, lectores trabajando de "Tras la puerta títires".
• Nel Nuevu Teatru de La Felguera, a les 10:30, "Con alevosía teatro" va representar l'espectáculu Elenita.
• Nel Teatru "Toreno" de Cangas, "El alma de la melodía" presenta El alma de la melodía versión infantil.

Y acabará'l vienres 25:

• Nel Teatru "Riera" de Villaviciosa, a les 12, "Higiénico Papel Teatro" representará Árbol.
• En "Los canapés" d'Avilés, "Teatro Plus" llevará'l so El soldadito de plomo.

Padres, profesores...
Nun hai escusa pa llevar a los neños al teatru.

Lleer más...

El bable de Tiuya.

El pasáu día 27 de marzu, el Día Internacional del Teatru, el Teatro Jovellanos de Xixón programaba Shirley Valentina, una adautación del monólogu clásicu contemporaniu del inglés Willy Rusell. Nesti casu, l'ama de casa Shirley Valentine viaxa del Liverpool ochenteru onde nació'l testu pa tomar cuerpu n'otra ama de casa, muyer de mineru y madre de familia de Tiuya.

Contaba la crítica de "El Comercio" asoleyada'l sábadu, qu'unes 300 persones esfrutaron nel coliséu xixonés coles ocurrencies y les peripecies de la agora llangreana, y cola maxistral interpretación de l'actriz Patricia Pérez. Falaba tamién de la facilidá pa estrapolar la vida d'una muyer del norte mineru inglés nuna muyer de la Cuenca minera del Nalón (daquellos que somos aficionaos al cine social británicu y irlandés, tamos más qu'avezaos a identificamos con eses problemátiques tan averaes, enantes que con otres particulares del cine español de calter social; y lo mesmo ha pasar col teatru). Y destacaba la decisión llingüística del adautador, el periodista Saúl Fernández, y, por supuesto, de Nacho Artime, el direutor y productor de la obra, que ye quien tien la última palabra nestes decisiones. Cito'l testu:

"Artime y Saúl Fernández despliquen que 'nun quisimos utilizar el bable digamos oficial porque naz el proyeutu cola idega de percorrer el Principáu. Y yá sabemos los bables que s'usen sigún onde s'habite. Asina qu'hai un soníu peculiar que bien diba poder asociase a cualisquiera ensin que se pierda la identidá d'esta muyer tamién universal'. Ye una opción."

"El Comercio", sábadu 29 de marzu.

El casu ye que la idega que me llegare a min d'esti montaxe, yá cuando s'estrenara n'Avilés pel payares pasáu, yera que la Shirley de nueso falaba na variante de Tiuya, colos xiros y los vezos d'esa llocalidá llangreana. Idega que m'afitó'l ller na páxina del Ayuntamientu de Xixón les dos notes que vienen de secute:

"Nun hai país con cierta tradición teatral, o incluso ensin ella, onde nun se conoza. Nun hai llingua, polo tanto, a la que nun fuere tornada. Y sigue y sigue creciendo su récord históricu."

"[...] y Saúl Fernández, periodista y escritor afincáu n'Avilés, que s'encargó d'adautar el testu a la realidá social y llingüística del Principáu d'Asturies."

Nesti contestu, el comentariu asoleyáu n'"El Comerciu" rinxa. Y rinxa enforma polos prexuicios que se suelten nél. Desplicareme, dixebrándolu por partes:

"nun quisimos utilizar el bable digamos oficial"

Dexando a un lláu l'usu del conceutu "bable" (con toles sos connotaciones peyoratives que tien pal idioma asturianu'l so usu, más tovía viniendo de xente que diz que lu usa), nun se pue dexar pasar l'atributu que se-y pon: "oficial". Nin el bable nin l'asturianu son llingües oficiales n'Asturies.

Pero esti fechu, que podía aceutase pola ignorancia supina del falante, en materia llingüística, nun tien pase cuando apaez detrás d'un "digamos", como un suponer pa que nos entendamos toos. Estes formes de xeneralizar sofítense nun fondu prexuiciosu, ye dicir, que repite milenta vegaes un erru como si fuera braeru, hasta que lo paez y s'aceuta, dexando de lláu les formes válides y reales, que queden amenorgaes: nesti casu, el "bable digamos oficial" torga "l'asturianu normativu", atribuyéndo-y un calter de xeneralidá que nun tien, precisamente, por motivos políticos y de zunes.

"porque naz el proyeutu cola idega de percorrer el Principáu."

Esta idega de que l'asturianu normativu nun ye quien pa faese entender n'Asturies vien de tiempu. Ye claro que la llingua d'entendimientu ha ser el casteyanu y que "l'inventu estandarizador del ALLA" (que quede claro que los autores nun dicen esto, pero despréndese d'ella) nun sirve.

Por embargu, atópense cola realidá de que quieren tornalo al asturianu, porque ye precisamente esta circunstancia lo que-y da a la obra l'adautación perfeuta al territoriu y, amás, la orixinalidá (porque, en casteyanu nun va munchu tiempu que se montó, con Verónica Forqué a la tiesta; y, si nun tengo mal entendío, la mesma productora entra n'esta xera asturiana).

La solución alcuéntrase na siguiente frase:

"Y yá sabemos los bables que s'usen sigún onde s'habite."

La bayura variantes. Hai qu'alcordase que la dialectoloxía clásica asturiana, vinculada a Alarcos y Neira, fala d'ella como la carauterística principal del bable: nun hai ún, hai milenta; poro, nun se pue creyar un estándar que los comunique, que pa eso yá usen los asturianos l'español, sinón protexer y estudiar eses fales autónomes.

El casu ye que l'estándar normativu apurríu pol ALLA contién la fala de Tiuya, faltaría más. (Si me dixeren que la nuestra Shirley Valentina fuere d'Ibias, yá sedría otru cantar) El rechazu inicial al "bable digamos oficial" cai al suelu equí y fráñase en cachinos piquiños.

De toes formes ye a destacar la idega novedosa de qu'un bable particular, el de Tiuya, ye más entendible y esportable qu'un estándar. Gracia Noriega pue escoyuntase si llee esto:

"Asina qu'hai un soníu peculiar que bien diba poder asociase a cualisquiera"


Por otru lláu, l'estandar diba ser más afayaízu pal trabayu actoral, porque l'adautación a una variante requier un trabayu de conocimientu fonderu de la realidá llingüística d'un sitiu. Vamos, qu'un teberganu pue creyer que los xiros d'una avilesina seyan de Tiuya. Pero en Tiuya puen paecer raro. Ye'l nivel fónicu, del que falaba Adolfo Camilo Díaz. (Y, polo que pude ver nel vidiu que ta colgáu en YouTube, nun lu tien; ensin qu'esto-y quite valor a una magnífica interpretación n'amestáu)

 "ensin que se pierda la identidá d'esta muyer tamién universal'."

Paez que la universalidá nun pue dase dende Asturies y con formes asturianes, y hai que xustificar el so usu y dexá-ylo perfeutamente nidio al espeutador. Vamos, que tovía nos cuesta trabayu pensar qu'una muyer de Tiuya pue ser l'espeyu onde se puen ver identificaes muyeres del restu del mundu. Tovía menos si esa muyer fala n'asturianu, qu'igual nun s'entiende n'otros sitios. Por embargu, la muyer de Liverpool, sí; esa ye cláramente universal. (A min, personalmente, estes desplicaciones danme vergoña ayeno)

Puntu final

Quiciás tea pidiendo muncho al desixir lo que s'ufierta: l'usu de la variante dialeutal de Tiuya p'adautar una obra de teatru n'inglés a una realidá concreta que se trata de retratar. ¿Quién lo diba valorar? ¿Aportaría perres al productu final? ¿Dalguien se diba dar cuenta? Ye meyor tirase a lo fácil. Pero, entós, nun me val que s'empondere a Saúl Fernández más que na midía de faer una torna y axuntar delles carauterístiques propies de les cuenques que-y dean colorín asturianu. Llamáime perfeicionista.

Con tolo dicho, toi deseyando poder dir a ver Shirley Valentina, esa muyer de mineru cafiada cola so vida qu'aprovecha qu'una amiga la convida a pasar unes vacaciones en Grecia y onde s'alcontrará otra vuelta coles ganes de vivir. Ye un cantu a la vida universal chiscáu dende una asturiana. Y magníficamente interpretao por Patricia Pérez. Y entamada con una producción asturiana detrás, colo que cuesta.

Voi permitime escacer prexuicios, zunes y tochaes, hasta que lo que fale Shirley nun seya lo que se fala en Tiuya, nin n'Avilés, nin dengún inventu académicu. Y, si me rinxa muncho, quedareme col espíritu d'una obra que bien val pa escaecer prexuicios, zunes y tochaes, porque convida a la llibertá de les persones. Anque seyan de Tiuya.

Lleer más...

Candidatures a los Premios Oh! 2014

El miércoles 29, por quintu añu consecutivu, l'Asociación de Compañías Profesionales de Teatro y Danza de Asturias (ACPTA) presentó la llista de finalistes a los Premios Oh!, galardones al faer dramáticu de les compañíes profesionales afincaos n'esta tierra: meyor espectáculu, meyor espectáculu infantil, meyor direición, meyor producción, meyor autor o coreógrafu, meyores intérpretes femenín y masculín, meyor diseñu d'illuminación, meyor banda sonora orixinal, meyor indumentaria o caracterización y meyor escenografía. A estos, hai que sumar l'Oh! d'honor a la persona o compañía destacada pola so relevancia o pola so trayectoria personal.

Los premios recibieron una total de 120 candidatures, más de la metá que l'añu anterior, dende quince compañíes profesionales y un total de dieciséis espectáculos van participar por ver cuál va representar a Asturies nos Premios Max. Pero esi honor, amás del destín de los premios, podrá sabese a partir de les 20 hores del día 8 de febreru, nes tables del Teatru Jovellanos de Xixón, momentu cuando escomience la gala d'entrega.

Meyor espectáculu y dirección

Tres son leos espectáculos que se reparten les nominaciones a meyor espectáculu y meyor direición (amás de sumar otres cuantes candidatures más n'otres estayes): dos compañíes de reciente creyación, "Teatro del Cuervo" y "Ververemos Teatro", y una señera "Teatro del Norte".

"Teatro del Cuervo" ye un compañía creyada alrodiu la figura del actor y director Sergio Gayol, qu'estrenaría l'espectáculu Claudia y, nel añu 2009, algamaría'l premiu Teatro Jovellanos por Gaviota 2.1, que s'estrena'l 14 de xineru de 2011 nel coliséu xixonés. La compañía ta nominada esti añu por Criados y bufones, un testu de Sandro Cordero qu'amiesta retayos d'obres de Shakespeare, pa ufrir situaciones bien bufonesques mientres un funeral. Sandro Cordero ta nomináu, por esta obra, a la meyor dirección, al meyor testu y al meyor intérprete masculín.

"Ververemos Teatro" ñaz en 2011 pol enfotu de la direutora y coreógrafa Nieves Álvarez y cuenta con un equipu surdíu de la ESADyPD. Preséntase col espectáculu Litoral, del autor Vadji Mouawad y col llibretu tornáu por Eadio de Pablo, que ta dirixíu por Cristina Suárez y que fuera galardonáu col Premiu Teatro Jovellanos 2012. Ye una obra profunda, que cuenta la búsqueda de la identidá nunca algamada. Cristina Suárez ta nominada a la meyor dirección; Felix Cadenaba, al meyor intérprete masculín; Pilar Velasco, al meyor diseñu d'illuminación; y Manuela Caso, a la meyor indumentaria o caracterización.

"Teatro del Norte" ye la obra vital d'Etelvino Vázquez. La compañía de Llugones, creyada en 1985, trabayó testos clásicos y contemporanios universales, y llevó esi trabayu por buena parte d'Europa y d'Amércia. Apostó esa temporada por una adaptación del clásicu de Lorca Mariana Pineda. Etelvino Vázquez ta nomináu a la meyor direición; Cristina Lorenzo, a la meyor interpretación femenina; Rubén Álvarez, al meyor diseñu d'illuminación; Alberto Rionda, a la meyor banda sonora orixinal; Manuela Caso, a la meyor indumentaria o caracterización; y Carlos Lorenzo, a la meyor escenografía.

Ausencia d'asturianu

La presencia de la llingua asturiana ye más bien residual. D'ente los 16 espectáculos presentaos a los premios, solo dos son n'asturianu: Llázaro de Tormes, l'apueste personal de Carlos Alba por adaptar el testu más clásicu de la picaresca, pol que ta nomináu a meyor intérprete masculín; y El pelegrín valiente, trabayu de "Nun Tris", a partir d'un testu d'Antón García, y que nun se tuvo en consideración p'acceder a dengún premiu. Dambes s'ufríen tamién en castellán.

Tamién ye significativa la inesistencia de reconocimientu dalu pa los montaxes o los testos que tengan como llingua vehicular l'asturianu, qu'invite y reconozca los méritos daquellos qu'apuesten pol idioma llariegu. Los Premios Oh! son los gallardones del fechu dramáticu profesional d'Asturies, asina que ye un fallu imperdonable esta ausencia.

Qu'el mundu profesional, salvo contaes y significaes esceiciones, dea la espalda al idioma propiu ye una mala noticia, tanto pa la llingua como pal propiu teatru profesional, y habría ser oxetu d'un análisis fonderu. Piérdese un espaciu de normalización llingüística de primer orden, que queda arrequexáu al mundu amateur; y piérdense espectadores, que vayan al teatru a sintir lo qu'en so casa se fala, a identificase colos personaxes que falen como so. Y d'esto, tanto Carlos Alba como Antón Caamaño, puen dar fe.

Lleer más...

El monólogu asturianu sigún Armando Felgeroso.

Armando Felgueroso.

Si yá'l teatru asturianu tien bien de crítiques negatives, más fundamentaes en prexuicios personales y sociales que'en criterios culturales oxetivos, ún de los sos xéneros dramáticos destaca sobre cualisquier otru n'esti sen: el monólogu.

El monólogu asturianu fuera, ya inda ye anguaño, atacáu pola so actutú misóxina, sinon apediyáu direutamente de machista; pol usu desmedíu de pallabres groseres, de mal sonar al finu oyíu del bienpensante, y nun idioma non casteyanu, que sienta mal al meyorfaláu ilustráu; pola so probitú de formes llíriques en métrica y rima, que los alloñen de los cánones calderonianos ya lorquianos que marquen el buen gustu; pol so calter cómicu, que bien malo ye riise; y, sobre too, por considerar apropiaes temes de les clases sociales más baxes, ensin un enclín moralizante nin d'investigación antropolóxica. Pero estes crítiques queden solamente na piel de lo que significa'l monólogu na realidá asturiana, nun lleguen a la so cadarma porque nun-yos interesa a estos críticos rascar pa llegar dientro: conque-yos cuadre l'ideal col prexuiciu, d'aquello de que lo d'Asturies ye más rancio, más morralla, pior, yá-yos val.

Ensin embargu, el monólogu n'Asturies ye daqué más. Como pasa col teatru costumista, el monólogu cumplía una función social de divertimientu y de comunicación social, de tresmisión de los arquetipos tradicionales y privativos de la sociedá, d'una mena divertida y cercana al estratu social que-y afectaba: el pueblu llanu.

Y dende'l pueblu llanu apaez Armando Felgueroso, compañeru de la Compañía Asturiana de Comedies, y monologuista al dar vida a dos personaxes, al modernu James Corigos, un esplorador de la realidá convencional actual, y a Min de les Pieces, paisanu de siempre, de boina, xilecu y faxa y, ensin dubia'l más interesante pa mín.

Min de les Pieces en dos momentos del espectáculu

Tuve la oportunidá d'acompañar a Armando nuna charra-espectáculu que dio pa una docena de privilexaos na Escuela Superior d'Arte Dramáticu y Profesional de Danza de Xixón, el xueves día 15. Ellí nos mostró'l significáu del monólogu asturianu, la diferencia pa frente a otres muestres individuales d'espresión dramátiques non asturianes, les temes a tratar, la so diferenciación al traviés del tiempu (y tamién del sexu y la edá del intérprete), los preseos d'apoyu, l'usu correctu d'onomatopeyes nel discursu, los autores históricos y, sobre too, los diferentes personaxes y la forma de creyalos. Y, ente argumentu y argumentu, apaecía Min de les Pieces pa sofitar caún coles interpretaciones de monólogos de Marirreguera, Anxelu, Arsenio Rodríguez, el Maestru o Arsenio González (col que tuve la suerte de compartir escañu).

Nun sé si-yos quedara claro a unos estudiantes del centru qué yera una guiá o un tratante, porque nun taben avezaos a la cultura asturiana tradicional, nin qu'aquello que Min ufiertaba como rei yera, en realidá, el ñudu d'un chisqueru faciendo les vegaes de panoya colorada, porque dame que tampoco nun taben avezaos a la realidá hestórica de más p'allá de veinte años.

Pero de lo que nun tengo nin un rispiu dulda ye que, gracies a les desplicaciones d'Armando, quedó-yos nidio cómo hai que construyir un personaxe de monólogu: que tien que conocer la realidá que pise, p'averala al públicu y faer que se identifique col tipu, y caricaturizala dempués, pa poder xugar colos estremos que, faciéndolos de so, denuncia. D'esta miente, la xente que les siente, ye capaz de dixebrar ente qué ye válido pa la vida en común y qué ye lo qu'hai que dexar pa prau.

Solo aquel que furrula dende prexuicios (los que falaba enantes) ye incapaz d'alcontrase cómodu nel xuegu de los arquetipos llevaos al esperpentu. Poro, verá machismu nuna sociedá matriarcal (porque lo desconoz, porque nunca nun se detuvo a averigüalo o, si lo fizo, enterrólo porque nun-y cuadraba col prexuiciu) y escandalizarase poles groseríes, estremarase pol usu de les fórmes líriques cencielles y de riirase del idioma tradicional y propiu'l país, ensin figuarse que son trés fórmules bien articulaes pol monólogu asturianu dende abondo p'acaparar l'atención del públicu a quien van dirixíu.

Adolfo Camilo Díaz escribía nel so blogue de "Les Noticies", Les puertes de Tannhäuser (Armando, Casado, Cristina y Filadi, 19-XII-11), ente otros, sobre Armando, del apreciu profesional que-y tien (del personal, tanta buena pallabra déxalu nidiu), de lo gran monologuista que ye y d'esti proyeutu sobre'l monólogu asturianu. Yo, confírmolo puntu por puntu.

Armando Felrgoroso y el so alter ego "Min de les Pieces", xunto a otros como Cellero o Pin de la Cotolla, tan dignificando el monólogu asturianu col so trabayu d'espardimientu que, nun podía ser d'otra manera, avérase al públicu asturianu cola fórmula de siempre: una idega acompañada d'una sonrisa.

Lleer más...

Premios Aurora 2011

Los premios

El pasáu vienres 2 de setiembre, cellebróse nel teatru Prendes de Candás, la entrega de los Premios Aurora 2011, d'ente lo visto nel XXI Salón de Teatru Costumista de Candás.

La gala d'entrega de premios vióse amenizada pol montaxe "En busca del premio perdido", col guión y la interpretación d'Alain Fernández, xerente del teatru, que cuntó cola prestosa collaboración de Chema Puerto, actor del grupu "Rosario Trabanco" y Chusa Juarros, de "El Hórreo" de Barcia. Amás, el Grupu de Teatru "Carbayín" punxo d'una forma sublime el sainete "El recatéu", del mío almiradísimu compañeru Arsenio González, que punxo la nota n'asturianu a una tarde divertida pero, llamentablemente tratándose de teatro costumista asturianu, con toles demás intervenciones n'español.

Luisa Argüelles y Mar Buelga, cola reproducción a escala xigante de les estatuiyes de los premios Aurora.

Los premios tuvieron repartíos y, dexando d'entrar na so oxetividá (más que na porque esti teatru ye amateur al 100% y tol esfuerciu de tolos grupos bien merez ser premiáu), dalgunos ficieron xusticia.

El premiu al meyor direutor foi pa Lisardo Suárez, de "Rosario Trabanco", que punxo n'escena la divertía obra de José Ramón Oliva Barájoles col difuntu. Yo tuve la oportunidá de vela y reíme a mandíbula batiente col bon faer de Nines nel papel de "difuntu" y les ocurrencies del personaxe de Chema Puerto, hasta'l puntu d'aniciar un par d'ovaciones que, viéndoles xustes, foron siguíes pol respetable. Ensin embargu, al mío mou de ver, el motaxe carecía de ritmu, solo recuperáu polos continuos güelpes de risa, los actores taben mal ubicaos y una mesa de comedor en primer planu tapaba parte de l'aición de los actores que nun taben a l'altor de Nines y Puerto. Lisardo tenía, en xusticia, ún de los papeles más difíciles y distintos del Salón: facese'l muertu y aguantar les ides y veníes a les que se vía sometíu el so personaxe. Un trabayu d'espresión corporal que bien mereció'l premiu al meyor actor.

Por otra parte, y conociendo'l trabayu d'Oliva, paecióme una obra floxa respeuto a otres suyes de munchu más valir, que faen que seya anguaño l'autor más bayurosu en cantidá y calidá del repetoriu dramatúrxicu asturianu (ensin escaecer a Arsenio, claro ta). El fechu ye qu'Oliva algamó otra vuelta'l merecíu premiu al meyor autor vivu (representáu nel Salón) cola obra Alta suciedá, qu'echare col so grupu.

El premiu al meyor actor paró nes manes del uviéin Segismundo Meana, del grupu Chanclos Asgaya, que tamién algamó'l de meyor testu teatral del añu 2011 pola so obra Drácula ye teberganu. Yá toi naguando por tener el llibru del Teatru n'asturianu 2011 pa echá-y la güeyada de rigor.

Segismundo Meana y Chusa Juarros (meyor actor y actriz del Salón)

La meyor actriz fue Chusa Juarros, de "El Hórreo" de Barcia, que punxo n'escena l'obra "Vamos pal baile", de Josefina Lombán. Chusa dexó claro el so desparpaxu na mesma gala, protagonizando un baille con Alain a música de Frank Sinatra, y acabante l'eventu, dedicando una sonrisa a tou aquel que se-y acercaba. Nótase que disfruta abondo d'esti llabor y tresmítelo al públicu. Y pa un compañeru de so, Pedro Rodríguez, foi'l premiu a meyor actor secundariu. Pa rematar los premios actorales, el de meyor actriz secundaria llevolu María José Herrero, de "Padre Coll"de La Felguera, pola so maraviyosa interpretación de tarada na adaptación de la obra Lloca d'Eladio Verde.

Los premios téunicos colaron pa Xixón. Pal grupu "Traslluz" el de decoráu ya illuminación, pola obra de Carmen Duarte ¡Qué vienen los otros! Y el de vestuariu, pa mín merecidísimu (fora amor d'hermanu/compañeru), pa la Compañía Asturiana de Comedies pol Maestru Tarabica d'Eladio Verde. El trabayu d'investigación, de documentación y de diseñu que ficieron Mar Buelga y Luisa Argüelles merez la publicación como manual pa futures xeneraciones de teatreros.

Crítica

Nun voi falar más del aspeutu llingüísticu: paezme un error de bultu que nos premios d'un Salón de Teatru Costumista Asturianu nun s'use l'asturianu. Ye d'un provincianismu ablucante y somorguia'l valir d'unos testos que triunfen en buena mídia pol idioma en que se plantegaron. Llástima.

Pero sí que me voi detener nuna incongruencia d'estos premios en sí: la influyencia exóxena nes estayes actorales, que fai perder la visión diferenciadora del teatru costumista asturianu. L'erru ta nel escaezu de los niveles de personaxes propios al teatru costumista asturianu, que se suplanten por otros criterios más hollywoodienses. Désplicome.

Los premios Aurora pal elencu son cuatro: meyor actor, meyor actriz, meyor actor secundariu y meyor actriz secundaria. Ye nidio que se puen escoyer a los meyores actores del Salón: aquellos que destacaron pol so bon faer, por tener un personaxe más afayaízu o por llevantar al públicu les butaques en cada mutis. Pero paez que nun ye asina.

Pongo esti exemplu. Col mesmu valir actoral y personaxes d'igual relevancia, y dientro la mesma obra, Arsenio González foi nomináu na estaya de meyor actor y Eladio Sánchez al meyor secundariu. Ye incomprensible. Lo lóxico ye que dambos fueren candidatos al de meyor actor. Pero non. Paez que yera muncho dos candidatos del mesmu grupu y, pa nun escacese d'ún, rebaxaron-y la categoría, non al actor, pero sí al so papel, al so personaxe. Y esto ye un disparate.

Les categoríes de los personaxes nel teatru costumista asturianu tan bien diferenciaes poles carauterístiques d'edá, de repercusión nel desenllaz la obra y de comicidá o dramatismu de les aiciones y los diálogos.

Asina, alcontramos que les obres suelen xirar en torno a los personaxes dramáticos de mediana o moza edá: los galanes masculinos y les mocines o damitas femenines. Ellos son los protagonistes de los enguedeyos amorosos, de les apaiciones inesperaes o, por dicilo simplemente, de la parte "seria" de la obra. Ellos suelen tar interpretaos por actores altos, de buen porte y voz profunda; elles por actrices moces, de voz melguera y talle finu. El nivel fónicu suel buscar la diglosia más prexuiciosa, diferenciandolos con un casteyanu "dignificante", bien porque vengan de fuera, bien porque deprendan a falar bien. (Estos personaxes van en relaición direuta colos héroes y heroínes protagonistes de les películes d'aventures americanes que yeren nomaos, nos cines asturianos d'antaño, como "los mocinos" y "les mocines"; el glayíu "¡Ánimu, mocín!", en momentos de catarsis dramática sintíase de forma avezada)

El contrapuntu dánlu los cómicos, masculinos y femeninos: les sos andances suelen ser similares a les de los galanes y damitas, pero de formes más tosques y cómiques. Suelen ser criaos o fíos sin estudios, trabayaores del campu o de la mina. N'ocasiones, la obra xira en torno a so, pero los finales suelen, entós, ser inesperaos pal públicu y ablucantes pa los personaxes, que coles sos desgracies faen la risa'l respetable. El so rexistru fónicu ye d'un asturianu mui poco cultu, lo que los lleva n'ocasiones a desaxerar pallabres que causen gracia al públicu.

Por últimu (y ensín considerar a los "malditos", daquellos personaxes testimoniales y fácilmente suprimibles) atopamos a los carauterísticos: homes y muyeres. Son los vieyos y reflexen como dengún los arquetipos del pueblu asturianu, anque nin toos nin siempre en toles obres, les carauterístiques seyan uniformes, la pareya o les pareyes suelen amosar ente ellos la sabiduría popular, anque completándose con contradicciones: escontra l'amable ta l'ariscu; frente al tacañu, el xenerosu; el seriu atópase col bromista; el fatu, col llistu; y asina nuna llista cuasi inacabable d'axetivos contrapuestos. Son estos los personaxes más esperaos y los más cellebraos pol públicu y los que-yos dieron renome a los grandes actores asturianos d'ayer (Donorino García, Rosario Trabanco, José Manuel Rodríguez, la propia Aurora Sánchez...) y de güei (Arsenio González, Pili Ibaseta, Eladio Sánchez, Fina Rodríguez, Lisardo Suárez, María Elisa Álvarez...). Rares veces son los protagonistes de l'aición: el so papel ye secundariu, de sofitu a l'aición dramática y a la cómica de los mozos, porque faen les veces de conseyeros o d'enguedeyadores, facilitando o imposibilitando los amores principales colos sos quereres o les sos zunes. Por otra parte, tamién suelen ellos tener los sos flirteos amorosos o les sos engarradielles por herencies o praos. Pero son más bien pincelaes qu'espeyen la resistencia del mundu tradicional a desapaecer en manes d'ún nuevu que tien vida propia. Y esi arquetipu, amás del valir del actor y de la chispa del autor, ye'l que fai de vínculu ente la obra y l'espectador mientres el trescursu la mesma.

Asina tenemos seis estayes diferenciaes y que nun puen competir ente elles, porque tienen funciones diferentes y la vistosidá de personaxes nun ye equiparable. ¿Quién ye secundariu nuna obra costumista asturiana? ¿Un carauterísticu? ¿El mozu cómicu? ¿El galán? Yo nun tengo rempuesta. Pue falase de meyor actor, ensin especificar, sí. Pero non de secundariu, senciellamente porque nun se pue categorizar d'esa miente'l llabor actoral dientro'l teatru costumista asturianu. Eso ye daqué foriato y que cuadra mal cuando les coses se quieren faer con razón de causa y cuidando'l conteníu y la tradición d'esti tipu de teatru autóctonu.

Lleer más...