Vienres de charres

Esti vienres día 4 de marzu, ye día de charres sobre teatru asturianu. Y charres d'altor, polos temes de másimu interés pa cualisquier teatreru asturianu y poles persones que van desendolcales.

Antón Caamaño y José Ramón Oliva

Pa escomenzar, l'actor, direutor y doctor Antón Caamaño va esponer la so tesis Bases pa un corpus de teatru n'Asturies, dientro de les Xornaes Culturales de la Escuela Superior d'Arte Dramáticu d'Asturies. Tien interés abondo l'estudiu, porque trata de la situación actual del teatru n'Asturies, dempués de faer un esamen del desendolcu de la profesión dramática nel país, de les oportunidaes esistentes y de les perdíes, amás de les torgues qu'impiden que l'actoral puea dir más p'allá qu'una profesión de supervivencia. Pero, amás, ha destacase la importancia de que la tesis fuere presentada n'asturianu y lleída nel nuesu idioma na Universidá de Vigo. D'importancia mayúscula esta charra que va tener llugar na propia ESAD, a partir de les 13:30 hores. 

Y de tarde, a les 19:30 hores, nel Aula de Cultura de Sotrondio, l'autor José Ramón Oliva va dar otra charra, esta vuelta sobre teatru costumista asturianu y teatru popular asturianu. Un buen momentu pa establecer los parámetros definitorios de dambos conceutos, tan interrellacionaos que, dacuando, lleguen a tracamundiase y usase como sinónimu. Y como ye un tema siempre caliente pal alderique, el propiu Oliva convídanos a que l'actu acabe convertíu nuna mesa redonda, onde'l públicu puea participar. 

Porque'l teatru da pa muncho más allá qu'asistir como públicu de forma pasiva. Y porque'l teatru asturianu y d'Asturies, ha dar muncho que falar.

Lleer más...

I Concursu de Microteatru nel Horru

Esti sábadu 21 de xunu va cellebráse la fase final del I Concursu de Microteatru nel Horru: les representaciones de los cuatro testos finalistes. La iniciativa, entamada pol Ecomuséu Ca L'Asturcón d'Argüeru (Villaviciosa), escomenzó va meses cola receición de testos orixinales de microteatru qu'habíes de cumplir con dellos requisitos, como'l poder ser representaos dientro les dimensiones propies d'un horru o que'l so desendolcu ufriere una aprosimación al significáu y los usos propios del horru como elementu cultural.

Presentáronse 24 obres y fueron escotíes estes cuatro pa la so representación na final:

• Patatones, de Mercedes Verástegui, ye un sainete nel interior d'un horru ente patates dixebraes en por montones: nún tán les patates pala siembra; n'otru, les patates pa freir y cocinar; y ne últimu, les patatines coloraes. Mercedes Verástegui, madrilana residente en Xixón, preséntase, xunto a dos compañeres actrices, col Grupo de Teatro "Colombina" de Xixón y ye actriz (La estrada de Producciones Nun Tris) y direutora (Conozca usted el mundo, d'Azogue Teatro).
• Helio, de Julio Fernández Peláez de Zamora, ye un diálogo nel interior d'un horru ente Rosa y Helio, el so pa, un vieyu de 94 años que pasó tola vida semando bellotes y que va ser interpretada pol grupu vigués Anómico Teatro, que dirixe Fernández. L'autor, que ganara dellos premios lliterarios (IV Premio "Tadrón de Teatro x la Justicia"; VI Premio "El Espectáculo Teatral"; XIII Premio "Sexto Continente" de rellatu negru; y VI Premio "Ángel Ganivet" de novela) y publicara delles obres en gallego y castellán, ye'l direutor de la revista d'artes escéniques "Núa".
• La herencia, de Sergio Buelga, ye un sainete de calter costumista asturianu pa dos personaxes, Mino y Balbina, hermanos que discutirán polos términos d'una herencia, onde l'autor espeya dellos aspeutos culturales y etnográficos que-y dan forma a la pieza. Sergio Buelga lleva años puxando pola dignificación de la cultura tradicional asturiana y del so idioma, al traviés del so empeñu profesional, como animador sociocultural y cuentacuentos, y del so llabor artísticu (dientro la Compañía Asturiana de Comedias) y lliterariu (pol que llogró dellos premios como'l "Aurora Sánchez" o el "Dulce por amargo" otorgáu pola ESAD d'Asturies). Va ser representada por él y la so hermana Mar Buelga, que xuntos formen el grupu "Los nietos de Ramonita". (Siempre ye fatigoso escribir d'ún mesmu y espero que nun quedare la reseña mui arrogante)
• ¡La bolsa o la morcilla!, de Rosario Naranjo, presenta a tres personaxes dientro un horru asturianu: dos amantes enriba un montón d'henu que son sorprendíos por un lladrón metíu nun traxe negru y con una mazcara de zorru, que lleva un maletín.Va echase pol Grupo de Teatro de Chiclana de La Frontera. L'autora sevillana dedícase dende va años a la creyación y investigación lliteraria (en teatru y narrativa), trabayu qu'amiesta al de téunicu nel Ministeriu d'Economía; tamién ye redautora y correutora de testos, columnista de prensa, collabroadora en páxines lliteraries; autora de cinco noveles, numberosos rellatos, un llibru cuentos, pieces teatrales, d'ensayu, poesía... y ganadaro d'una bayura de premios (XIV Premio de Teatro Mínimo "Rafael Guerrero" o V Certamen "Creadores por la libertad y la paz" de narrativa)

Les representaciones van desendolcase entes les 16 y les 20 hores del sábadu, en cuatro pases dientro l'horru. Poro, l'aforu va tar llimitáu poles propies carauterístiques del espaciu y daquellos que quieran participar han pidir reserva (al teléfonu 985 99 90 01 o al e-mail foncalada@asturcon-museo.com). Por embargu, van ser los propios espeutadores lo que tengan la voz final nel repartu de premios, votando a aquella obra que más-yos preste.

Por otru llau, l'eventu va ser l'entamu de la Selmana d'Arte y Ecoloxía nel Ecomuséu "Ca l'Asturcón", con delles actividaes de toa mena, cola collaboración del grupu Mar Rojo Producciones. (Pa mayor información, picái nel enllaz)

Tou un apueste pola innovación teatral y la conservación natural y cultural. Nun se pue dexar pasar.

¡Ellí nos vemos!

Lleer más...

El Día del Teatru de mio

Detalle de la portada de Pesatible, de Pachín de Melás

"La escena representa l'interior de Casa Malvina de Silverio, onde vive'l so fio Velino. Trátase d'una casa de piedra tradicional asturiana, dispuesta d'izquierda a drecha de corrío, dexando a un llau los requexos. A la izquierda, puerta de cuarterón, d'accesu a una entrada con dellos preseos de llabranza y un bagul. De secute, un escañu con un armariu a un llau. Nel centru, el llar, con una mesa delantre. A la drecha, el güecu pa l'habitación, separtáu por una puerta, con una cama grande y una más pequeña a los pies y un arcón. Dos ventanes: una, nel pasiellu d'entrada, encima'l bagul xunto a la puerta; la otra, un furacu ente'l llar y l'habitación, encima una siella. La pérdida llumínica sofitará la sensación d'escuridá de los personaxes qu'entren.

L'aición correspuéndese a los caberos años del sieglu XIX y primeros del XX, nuna aldega d'un conceyu rural asturianu. Un mes d'ochobre fríu y lluviosu."

Entamu de L'abellugu

Mañana, 27 de marzu, Día Mundial del Teatru, van dame'l premiu "Dulde por Amargo" 2013 qu'el xuráu dispuestu pola Escuela Superior d'Arte Dramáticu y Profeseional de Danza del Principáu d'Asturies me concedió en setiembre del añu pasáu.

Ye la segunda edición d'esti premiu de calter estatal que tien por tema la desigualdá ente persones por razones de xeneru o identidá sesual. Dicía'l tercer, oxetivu qu'axuntaba les bases, que yera "Dar voz a les persones qu'al traviés de la escritura teatral encuentren el camín de contruyir un mundu xustu, onde toos tengamos aceutación y dignidá reconocía". Esi puntu fue'l mi finxu de salida pa decidime a participar.

Quise dar voz a unes muyeres escaecíes. Les que fueren les nuestres bisgüeles, nun momentu y nun llugar, l'Asturies rural de finales del sieglu XIX, onde les muyeres nun se plantegaben tener drechos, sinón que s'enfotaben en sobrevivir a los caprichos masculinos, pesie a ser elles les que secularmente decidíen y solucionaben les crisis familiares y del llar coles sos iniciatives. Aquella yera una Asturies matriarcal de puertes pa dientro, onde la llave la panera pasaba de suegres a nueres y l'home había dar la soldada en casa pa que l'aministrara la muyer. Por embargu, de puertes pa fuera, yeren los homes quienes decidíen, quienes facíen y desfacíen, quienes teníen la voz y yeren dueños de la palabra, quienes dictaben les lleis mundanes y divines y quienes imponíen les formes de vivir, de pensar y de sintir.

Quise dar voz a muyeres diferentes, n'edá, n'actitú, en pensamientu, en sentimentu. Adriana, Cruz, Cunda y Malvina esperimenten vides estremaes dafechu, caúna colos sos esmolecimientos, caúna coles sos esperances. Toes tienen soluciones distintes pa les mesmes realidaes. Solo nos problemes se busquen, xuniéndose, sintiéndose, sofitándose, apoyándose les unes nes otres. Ye na comprensión de les demás onde alcuentren el sitiu pa ser elles mesmes: l'aceutación, el ciñu. L'abellugu.

Quise retratar un mundu inxustu ensin adornos, con una lluz fría creadora de solombres, y una temperatura baxa que dexarase l'ambiente xeláu, y una humedá tarrecible que calara hasta los güesos. Ensin negar el so sitiu a la violencia habitual y tapecida poles voluntaes siguidores del qué dirán. Y convidóse'l miéu por si solu. Pero'l mundu inxustu ye inaguantable ensin un afalagu, ensin una bona palabra y un xestu amorosu: les pequeñes coses que faen a la xente pensar que los torgues llegarán a rescamplar dalgún día, que traen esperanza na posibilidá d'un mundu xustu.

Quise espresame na mio llingua, dame voz a min mesmu y dar voz a daquellos qu'han d'aguantase mudos. Muyeres y homes, nun mundu d'homes que s'echen en cara les diferencies. Y el xuráu reconoció-yos a les mios palabres la dignidá tantes veces negada. Adrina, Cruz, Cunda, Malvina y yo (y tou aquel que s'avere a L'abellugu) sintímonos merecedores de respetu, cerca d'esos "drechos" qu'elles nun conocíen.

Por último, quise escribir un testu teatral pa empobiname p'hacia un mundu más xustu. El teatru fueme la ferramienta más afayaiza pa dar voz a coleutivos y a individuos, pa xenerar ambientes y situaciones, y pa espresame como quería y pude, poniéndome en boca y cuerpu d'otros. El teatru, nuna vida a veces dulce, a veces amargo, empondéramos. Fai que nos aceutemos. Y fainos dignos.

Día de cellebración

Mañana, a les 18:30, nel Teatru "Alejandro Casona" de la Universidá Llaboral de Xixón, fadráse llectura del Manifiestu del Dia Mundial del Teatru de Brett Bailey, entregaránme'l premiu a min y a Adriana Segurado Méndez, autora de La Princesa Remolacha, accésit del Premiu, y acabará l'actu cola conferencia y muerta sobre la Comedia dell'Arte a cargu de la Compañía "Amethéa 24º/7º", d'Italia. (Toes estes actividaes tan integraes nes Xornaes Culturales-Día Mundial del Teatru 2014 de la ESAD.

L'Asociación de Compañías Profesionales de Teatro y Danza de Asturias (ACPTA) entregará'l Primer Premiu "ACPTA a la Iniciativa Escénica", a la Compañía "Tragaluz Títeres" y al Muséu del Títere de Samartino. Pa ello, celebrarán el Día del Teatru nel muséu sierense, onde lleerán el Manifiestu. En palabres de l'Asociación:

"Les compañíes integrantes d'ACPTA güei más que nunca naguamos qu'el 27 de marzu, Día mundial del teatru, seya un día pala esperanza, la responsabilidá y el futuru del teatru asturianu; deseyamos esi día mirar a los nuestros compañeros y compañeres."

Pola so parte, l'Asociación Foroescena aconceyóse esta mañana nel Café Dólar de la plaza Porlier d'Uviéu pa presentar un comunicáu reivindicativu de la situación de precariedá del seutor teatral profesional n'Asturies, y onde se pide la dimisión de la Conseyera de Cultura del Principáu, Ana González.

Comunicáu de l'Asociación Foroescena

Finalmente, la Federación de Teatro Amateur de Asturias (FETEAS) celebrará'l Día del Teatru faciéndo-yos un merecíu homenaxe a dos de les figures más representatives del teatru asturianu y costumista contemporaniu, Lisardo Suárez y Elisa Álvarez, del grupu "Rosario Trabanco", que comparten homenaxe con Carmen Duarte, de "Traslluz Teatro" y ex.vicepresidenta de la entidá, y con José Neira, del grupo "Trama". La cita sedrá a partir de les 19 hores, nel Hotel "Langrehotel" de La Felguera.

¡Feliz Día del Teatru pa toos!

Lleer más...

De monólogos

Escuela de Monologuismu 2014

El conceyu de Carreño y el Teatru "Prendes" de Candás, entamen un taller de monologuismu impartíu por Carlos Alba, más conocíu pol nomatu "Cellero", ún de los sos personaxes característicos.

Llego tarde con esta entrada, porque güei 5 de marzu acábase'l tiempu d'iscripción. Les places son llimitaes, anque ye de suponer que sedrán bienveníes aquelles persones hasta rellenar el cupu y que s'averen a apuntase al Centru Polivalente "La Baragaña" o llamen al númberu 985 87 24 06, hasta'l día 8 de marzu, esti sábadu, que ye cuando escomienza'l taller. 

El  taller va desendolcase nel mesmu centru municipal de "La Baragaña" de Candás, dende'l 8 de marzu hasta'l 31 de mayu, los sábados de 12 a 14 hores.

El preciu la matrícula ye de 30 euros.

Carlos Alba, nel so papel de "Cellero"

XI Concursu de Monólogos "Pepe Campos"

Pela so parte, la Sociedá de los Humanitarios de San Martín, de Morea d'Ayer, convocó otra vuelta'l so concursu de monólogos "Pepe Campos". Trátase d'un concursu lliterariu qu'empodera esti xéneru tan machacáu pola crítica, valorando'l so valir lliterariu, el so calter d'axente cultural de la tierra y el so aspeutu tradicional.

Los monólogos han ser unviaos enantes del 16 d'abril, a la see de la Sociedá de los Humanitarios (Apartáu de correos 8, 33670, Morea, Ayer), y han tratar temes d'actualidá social, política y cultural. Pinchando equí, puen alcontrase les bases completes del concursu.

Esti concursu de monólogos rinde homenaxe a Pepe Campos, escritor y poeta ayerán, que ficiera l'himnu de la Sociedá de los Humanitarios. Dende qu'en 2005 lu ganara José Antonio de Dios Rodríguez, pasaron por Morea a recoyelu escritores y monologuistes de la talla d'Inaciu Galán (4 veces, una d'elles xunto a Isaac García de l'Arada), Carlos Alba "Cellero" (2 veces), Benjamín Pérez "Benxa", José Manuel Reguero "El Maestru" o Joaquín Rodríguez Muñiz.

Lleer más...

Luciu Domiciu

Les caberes selmanes tuve metíu nun proyeutu personal que yá tenía dalgunos años en mente. Nun hai na meyor que coyer por banda daquelles idegues que se resisten, dir a la escontra de so y acabar dándo-yos forma, sobre too cuando ún duerme mal y fai de la nueche'l momentu más provechosu del día.

Estos horarios cambiaos dieron como resultáu Luciu Domiciu, una obruca pequeña onde imaxino les últimes hores d'una de les figures más controvertíes y odiaes de la historia: l'emperador romanu Nerón.

El primer contautu que tuve con esta figura tien nomes y apellíos d'actor inglés y familia multinacional, Peter Ustinov, que tamién diera vida al perintelixente detective belga, surdíu de la tiesta d'Agatha Christie, Hércules Poirot en delles películes. Pa mín, el so papel de Nerón, na película Quo vadis?, de Mervin Leroy, ye una de les cumes interpretatives del cine. Les ideges peyoratives que de Nerón ufierta esta película son les que toos conocemos: un desequilibráu incapaz, preocupáu solamente de la autoafirmación artística y sexual, que provocó l'incendiu de Roma pa ver cómo amburaba y que-yos echó la culpa a los probes Cristianos, a los que persiguió con saña.

Pa dalgunos foi'l mesmu anticristu. Y nun ye d'estrañar. La mayor parte de los historiadores romanos, primero, y cristianos, dempués, echen pestes d'esti emperador. Asina, va repitiéndose como un calcu estes idegues en delles obres escéniques, dende L'Incoronazione do Poppea, de Monteverdi, hasta la más actual Nerón, de Marc Sardá. Preparando la documentación, alcontré un testu de 2004 de la profesora de la Universidá Complutense Cristina Martín Puente, Nerón como personaje de tres tragedias españolas del siglo XX, onde se dexaba ver esti sentimientu negativu, y el difícil testu dramáticu d'Alfonso Vallejo, Nerón-Ébola, de 1998 onde'l títulu lo diz too.

Pero la idega escomenzó a cambiar pa mín nos años d'universidá, cuando cayó nes míos manes el llibru Historia y antología del teatro español de posguerra (1940-1975), de Víctor García Ruiz y Gregorio Torres Nebrera, onde se falaba de la obra Nerón-Paso, d'Alfonso Paso. El bayurosu dramaturgu facía denuncia de que la figura de Nerón nun yera más que'l frutu la sociedá romana de la dómina, al son del historiador Indro Montanelli quien, na so obra Storia di Roma. Narrata da Indro Montanelli ai ragazzi dai nove ai novant'anni (Milán, 1957), dicía aquello de "¿Y si, a lo último, Nerón fuera meyor de como la Hestoria lu describió?".

Ilustración del ABC del domingu 7 de setiembre de 1969 (de la hemeroteca dixital del mesmu periódicu) que representa, según el so pie orixinal, a "Conchita Núñez, Manuela Rodríguez, Alfonso Paso y Carlos Muñoz, intérpretes de Nerón-Paso".

Faciendo un exerciciu de crítica historiográfica, pue respondese a la entruga de Montanelli: les pestes d'aquellos historiadores romanos y cristianos veníen motivaes poles polítiques desendolcaes pol emperador; pa los primeros, xeneralmente descendientes de los senadores y aristócrates de la dómina neroniana, les midides económiques, sociales y culturales feches por Nerón d'aponderamientu a les clases populares, y que provocaron el güelpe d'estáu que lu derrocó, nun-yos prestaben un res y suburdienlu pa evitar que los nuevos emperadores repitan el modelu; pa los segundos, les persecuciones a los sos ancestros, que s'anicien nel so principáu, son suficiente motivu d'estigma.

La xente, ensin investigar, ensin tratar de caciplar por sí solo, caltién les versiones negatives pa con Nerón: asina ye daqué popular que quemare Roma, pesie a que nun fuere cierto; o que'l so gobiernu foi tiránicu, anque fuera l'emperador más popular ente los sos súbditos de clase baxa. Estes consideraciones son prexuicios.

En Luciu Domiciu prosigo'l camin d'Alfonso Paso, faciendo de les últimes hores del emperador xunto coles persones que lu queríen y lu apoyaben, un alegatu de los mesmos personaxes pola so figura, calteniendo, na medida lo posible, la moralidá propia de la sociedá romana del momentu y ensin escaecer les indicaciones que dellos historiadores nos dan de la so inconsistencia mental.

Amás, y pesie a ser una acción única y llinial, divídola en 16 escenes d'intención dramática y temática, n'atención a la división fecha por Vicens y Gil de Tejada na so La muerte de Nerón, de 1861 (y citada por Crisina Martín Puente).

Por último, configuro una aición enllena de cites a clásicos líricos y dramáticos griegos tornaos por mín de versiones ingleses y españoles, amiesto personaxes históricos (Epafroditu, Esporu, Égloga, Alexandría y Faonte) con unos secundarios inventaos, trato de desplicar los epítetos mitolóxicos usaos y cuido de tornar pallabres grieges y llatines siguiendo les normes de l'ALLA, al nun alcontrales nos míos manuales de cabecera (dexando dalgunes por imposibles, tamién ye verdá).

Espero conseguir que'l llector del testu (quiciás dalgún día, espectador) s'enfrente a los sos prexuicios pa cola figura del emperador, que lu entienda como persona nunes circunstancies históriques, sociales y personales d'esceición y que se replantegue les sos idees por sí solu. Esti ye solo un exemplu de prexuiciu calteníu, d'idega preconcibida y aceutada ensín crítica pola sociedá. Y precisamente ye esti'l sen del teatru: facer de la xente individuos críticos.

Por embargu, lloñe de les pretensiones artístiques y narratives, tará'l mío oxetivu más qu'algamáu si s'entiende esta obruca como un aporte dignu al teatru asturianu.

Lleer más...