Escuadra hacia la muerte

Adolfo Marsillach, M.A. Gil y Félix Navarro

Cayó nes mios manes un llibru de la coleición "Clásicos Castalia" y de marzu 1987: Escuadra hacia la muerte y La mordaza, d'Alfonso Sastre. Voi deteneme nesta entrada na primer obra (la segunda merez capítulu aparte).

Escuadra hacia la muerte narra la convivencia d'un escuadrón del bandu occidental, destacáu na primer llinia de vanguardia d'un frente de la Tercera Guerra Mundial. Un cabu despóticu llidera a cinco soldaos. Toos tienen crímenes de guerra a les sos espaldes y por eso tán destinaos nesa escuadra de castigu. L'ambiente tensu que se respira nesa casa de guardabosques dispárase polo precario de les condiciones vitales, la rixidez del mandu, les rocées ente los soldaos y les infernales guardies nocherniegues, hasta que los personaxes deseyen la llegada de la ofensiva enemiga como salida meyor a la situación.

La historia suda antibelicismu y pesimismu a partes iguales. El momentu de reconstrucción de la Europa de la postguerra Mundial y d'encrespamientu ente los Estaos Xuníos y la Unión Soviética cuando s'estrena, 1953, paez que forciaba a que la situación fuere esta. El propiu Sastre escribía diez años dempués:

"Pienso qu'escribiría Escuadra hacia la muerte d'un mou distintu. Siguiría siendo una negación de la guerra y de les sos palabres. Siguiría apuntando al corazón de los dirixentes belicistes. Pero tamién sedría una afirmación de paz, una propuesta positiva de paz."

La sensación que-y queda a ún dempués de la llectura ye'l tastu amargu de que la vida pue llegar a ser una conderga ensin xacíu cuando se depende direutamente de los intereses d'aquellos que se reserven el poder. Nun me cabe dulda de qu'esta yera la pretensión d'Alfonso Sastre al escribila, cuando trataba d'asitiar la so obra nel marcu del Manifiestu del Teatru d'Axitación Social, robláu por José María de Quinto y el propiu Sastre en 1950.

Andaben dambos a la gueta d'un Teatru Nacional de conteníu políticu y social que superase'l teatru aburguesáu y el cine d'entretenimientu y que contare col sofitu de los axentes censores y, n'últimu momentu, del Estáu, col oxetivu de llograr con "urxencia l'axitación de la vida española". Por supuestu, esti postivismu pa cola realidá del "Estau social" franquista, y tan desaveráu del so pesimismu respeuto a la situación mundial, desapaició. La obra, estrenada pol "Teatro Popular Universitario", el 18 de marzo de 1953 nes tables del teatru "María Guerrero" de Madrid, duró tres representaciones enantes de que la censura del Movimientu interrumpiese les funciones. Pesie al ésitu y el reconocimientu internacional posterior de Sastre, de la so obra y d'esta en concretu, Escuadra hacia la muerte nun volvió ser respresentada n'España hasta dempués de la muerte de Franco.

Elencu

Voi faer un aparte respeuto al elencu col qu'esta obra viere la lluz, yá va 51 años. Destaquen los nomes propios d'actores que van ser primeres figures y secundarios imprescindibles del cine y del teatru español de la cabera metá del sieglu XX. Y destaca tamién la so mocedá. (Nun voi poder faer xusticia a estos nomes nunes llinies, pero sí quiero apuntar, al menos, la so importancia y xeniu)

Pérez Puig, Miguel Ángel Gil, Juanjo Menéndez, Agustín González, Adolfo Marsillach y Fernando Guillén

Como dixe enantes, la obra fue estrenada pol grupu de "Teatro Popular Universitario" dirixíu por Gustavo Pérez Puig, con 22 años. L'añu anterior, Mihura confiaría n'él pa estrenar Tres sombreros de copa nel so debú como direutor profesional. Sedría direutor del Teatro Español y pioneru del teatru televisáu n'España, onde adaptó la esceicional Doce hombres sin piedad, de Reginald Rose, pa los Estudio 1. (Con otru elencu rellumante de capacidá interpretativa)

Nel papel del soldáu Luis Foz, atopamos al recientemente fináu Fernando Guillén, con solamente 21 años. Poco hai que dicir d'un actor de casta con más de 50 películes (a destacar Don Juan de los Infiernos, que-y dio'l Goya a la meyor Interpretación masculina en 1991, el so pasu pol cine quinqui y les interpretaciones en delles películes d'Almodóvar o Garci), que bien podría ser la cara de los espacios de teatru televisáu Novela y Estudio 1 y que yá tenía interpretao a Mihura, O'Neill, Lope de Vega, Sastre, Paso, Llopis, Faulkner, Pirandello, Rojas, Buero Vallejo, Shakespeare, Eurípides, Esquilo y Miller con menos de 25 años...

El papel del soldáu Andrés Jacob fue interpretáu por Juanjo Menéndez, con 24 años. La cara peculiar de la comedia española que interpretó más de una veintena de películas y que se prodigó en la televisión española en tolos xéneros posibles de series y de adaptaciones teatrales, tuvo una carrera sobre l'escenariu que comenzó cola Compañía d'Amparo Rivelles, siguió con una cincuentena de montaxes (d'autores clásicos y contemporanios, de drames sociales a comedies llixeres y de variedaes) y culminó alternando interpretación con direición.

Caracterizáu por dar vida en cine, teatru y televisión a caracteres eternamente cafiaos, Agustín González dio vida al soldáu Adolfo Lavin, con 22 años. Hai munchísimes razones pa dicir que fue un de los grandes, pero voi quedame col compendiu de direutores pa los que trabayó, en cine namái: Bardem, Berlanga, Neville, Forqué, Sáenz de Heredia, Gonzalo Suárez, Armiñán, Masó, Garcí, Miró, Eloy de la Iglesia, Camus, Cuerda, Fernán Gómez o Ventura Pons, ente otros en 47 películes.

Félix Navarro fue un actor de teatru, y, pesie a ser un asiduu de la televisión, tanto en series como en teatru televisáu, la so carrera filmográfica fue pequeña, polo qu'el so nome nun ye tán reconocíu. Habemos destacar les sos interpretaciones d'Estudio 1, nel Don Juan Tenorio protagonizáu por Carlos Larrañaga y Emma Cohen y como "Cipriano" en El sombrero de copa. Nesta obra interpretaba de Pedro Recke con 26 años.

(Nun se pue escaecer a Miguel Ángel Gil, qu'interpretó al cabu Goban. Ná nun sé d'esti actor, si bien el so papel yera'l desencadenante de tola aición.)

Por último, atopamos Adolfo Marsillach, como'l soldáu Javier Gadda, y con 25 años d'edá. Bayurosu actor y direutor, tantu de cine como de teatru, fue'l direutor del Teatro Español dende'l 65, y fundó'l Centro Dramático Nacional y la Compañía Nacional de Teatro Clásico.

Cuando Sastre dicía nel so Manifiestu del Teatru d'Axitación Social que quería qu'el teatru volviera a ser d'interés de la xente, de xuru que sabía que lo diba tener más fácil con elencos asina.

Lleer más...

Mensaxe del Día Mundial del Teatru 2014

El xueves 27 cellébrase'l Día Mundial del Teatru.

Tolos años, l' International Theatre Institute encárga-y a un personaxe de prestixu dientru'l mundu dramáticu que faiga de portavoz al traviés d'un mensaxe que sedrá lleíu en cada sitiu onde s'aconceye xente pa cellebrar qu'esiste'l teatru y la suerte que tenemos por poder esfrutalu.

Esti añu, el mensaxe cuerre a cargu del sudafricanu Brett Bailey (a quien, sinceramente, nun conocía, pero que dexa idegues bien prestoses como pa que lo escomience a faer).

Equí ta'l testu, tornáu al asturianu por min. Esta ye la mio contribución a esta fiesta.

Lleer más...

José Luis Gómez, académicu de la comedia

N'El Principito.

"Nun hai qu'olvidar que, enantes de qu'esistiera la palabra escrita, había milenta años d'oralidá, que fue'l mediu pol cual l'home tresmitió conocimientos, sentimientos, inquietudes durante munchos sieglos"

José Luis Gómez

L'académicu de la RAE y profesional del mundu'l teatru, José Luis Gómez, dicía estes palabres nel programa de la Cadena Ser "La ventana", nuna entrevista que-y facía'l so direutor, Carles Francino, con motivu del estrenu de ciclu de llectures dramatizaes "Cómicos de la lengua", entamáu pola istitucion normativizadora de la llingua castellana n'España.

Falaba José Luis Gómez de la importancia de la oralidá nel llinguaxe y destacaba, amás del saber dicir, del dominador de la retórica, del narrador oral, del profesional de la voz o del virtuosu de la locución, el desaniciu de funciones que l'Academia ficiere a lo llargo de los sos 300 años de vida, que tán celebrándose anguaño, pa cola palabra dicha énte la palabra escrita.

Ye normal qu'el gran defensor d'esa estaya del llinguaxe dientro d'esa istitución seya él, puesto que fue propuestu pal cargu precisamente pola so capacidá pa desendolcar el más esquisitu y esautu trabayu de pronunciación, entonación, vocalización y proyeición de la palabra sonora. Nomáu académicu'l 1 d'avientu de 2011, tomó'l cargu'l 26 de xineru del presente 2014, con un discursu tituláu Breviario de teatro para espectadores activos (recomiendo la so llectura porque nun tien desperdiciu na so defensa del teatru y del cómicu como axente del mesmu).

Semeya de Raúl de la Cruz

Y ye normal que n'él s'alcuentre'l defensor de la palabra dicha porque nunca nun publicó dengún trabayu escritu: la so obra ye inmaterial, inmediata, profunda, d'espresión y de comunicación. Emponderando los sentimientos en cada fonema. José Luis Gómez ye un actor. Meyor dicho, un cómicu.

Nun quiero ser yo quien tenga que presentar a esti actor, que dio vida a un atracador d'un estancu en Vallecas, a un Pacual Duarte reconocíu en Cannes, a dellos personaxes de Kafka, Beckett, Calderón o Brecht y a un Saint-Exupéry realcontrándose cola niñez, que tuvimos la suerte de poder ver l'añu pasáu en Xixón. Nesta entrevista por órden alfabéticu de Carles Francino, el cerebru, xestor y direutos del "Teatro de la Abadía" fala de sí mesmu meyor que naide.

Gómez como tratamientu pa los prexuicios n'Asturies

Ún de los principales prexuicios pa contra'l procesu nornalizador del idioma asturianu fue'l mantra siguiente: "los bables nun puen ser llingua porque nun tienen lliteratura". (Eso, nun primer momentu; dempués, cuando s'escomenzó a asoleyar testos nuevos ya históricos n'asturianu, resultó qu'esa lliteratura escrita nun tenía dengún valir en comparanza cola española o, cenciellamente, yera fecha nuna escritura inventada; dexando pa prau estes fataes, voi centrame nel argumentu)

Los bables, l'asturianu, tenía lliteratura escrita, por supuesto. Y de gran valir, si tenemos en cuenta lo que s'escribía nesta tierra n'otros idiomes. Pero, en comparanza cola gran bayura de la lliteratura oral, too quedaba curtio. Los cuentos y cosadielles que paseben de güelos a nietos (y de güeles a nietes, quiciás taría meyor dicho) resultaben formar la cadarma inmaterial de la tradición, que se facía visible malamente nel negru sobre'l blancu, pero qu'esporpollaba nun rellumu esmolecedor cuando s'espardía polos gargüelos de los ciegos de gaita rabil o bandurria, de los monologuistes de boina y tres chaquetes y polos cómicos que, dende les tables peripuestes nel últimu llugar de la cabera parroquia, falaben la lliteratura asturiana, el saber del pueblu.

Negar la realidá del idioma asturianu al nun querer ver la so lliteratura, pronunciada de boca a oreya, porque la miopía cerebral solo estimaba lo escrito, yera negar esi pueblu asturianu, asimilalu a la fuercia a dalgo que nun yera pero qu'había ser.

Anguaño, la RAE almite esa oralidá a la que siempre-y dio la espalda (como al teatru, y asina lo dexa dicho Gómez nel so discursu). Esperemos que n'Asturies, poniendo como referente a ún de los mayores referentes de la oralidá española actual, que ye José Luis Gómez, esi argumentu del prexuiciu dexe de dexanos en ridículo a toos. Y, cuando se sienta, apuntar al sillón Z de la RAE. Y a callar boques.

Lleer más...

De monólogos

Escuela de Monologuismu 2014

El conceyu de Carreño y el Teatru "Prendes" de Candás, entamen un taller de monologuismu impartíu por Carlos Alba, más conocíu pol nomatu "Cellero", ún de los sos personaxes característicos.

Llego tarde con esta entrada, porque güei 5 de marzu acábase'l tiempu d'iscripción. Les places son llimitaes, anque ye de suponer que sedrán bienveníes aquelles persones hasta rellenar el cupu y que s'averen a apuntase al Centru Polivalente "La Baragaña" o llamen al númberu 985 87 24 06, hasta'l día 8 de marzu, esti sábadu, que ye cuando escomienza'l taller. 

El  taller va desendolcase nel mesmu centru municipal de "La Baragaña" de Candás, dende'l 8 de marzu hasta'l 31 de mayu, los sábados de 12 a 14 hores.

El preciu la matrícula ye de 30 euros.

Carlos Alba, nel so papel de "Cellero"

XI Concursu de Monólogos "Pepe Campos"

Pela so parte, la Sociedá de los Humanitarios de San Martín, de Morea d'Ayer, convocó otra vuelta'l so concursu de monólogos "Pepe Campos". Trátase d'un concursu lliterariu qu'empodera esti xéneru tan machacáu pola crítica, valorando'l so valir lliterariu, el so calter d'axente cultural de la tierra y el so aspeutu tradicional.

Los monólogos han ser unviaos enantes del 16 d'abril, a la see de la Sociedá de los Humanitarios (Apartáu de correos 8, 33670, Morea, Ayer), y han tratar temes d'actualidá social, política y cultural. Pinchando equí, puen alcontrase les bases completes del concursu.

Esti concursu de monólogos rinde homenaxe a Pepe Campos, escritor y poeta ayerán, que ficiera l'himnu de la Sociedá de los Humanitarios. Dende qu'en 2005 lu ganara José Antonio de Dios Rodríguez, pasaron por Morea a recoyelu escritores y monologuistes de la talla d'Inaciu Galán (4 veces, una d'elles xunto a Isaac García de l'Arada), Carlos Alba "Cellero" (2 veces), Benjamín Pérez "Benxa", José Manuel Reguero "El Maestru" o Joaquín Rodríguez Muñiz.

Lleer más...

Premios llangreanos

Esta fin de selmana pasada, el conceyu de Llangréu fue protagonista por faer la entrega de dos premios: el Premiu del Ciclu de Teatru Costumista de Llangréu y los Premios de la Fundación "Marino Gutiérrez Suárez".

Galardón "Verdes Valles Mineros Asturiano 2013"

Embaxo esta denominación, la Fundación "Marino Gutiérrez Suárez" reconoz a aquelles persones o entidaes dedicaes al cuidáu de la cultura, la biodiversidá, la historia y el patrimoniu asturianu. Esti añu, el xuráu decidió otorgalu por mayoría a la candidatura apurrida por José Antonio Fueyo Menéndez: la Compañía Asturiana de Comedias.

D'esti grupu valoráronse aspeutos como la proteición y el fomentu d'actividaes tradicionales como ye'l teatru, la proyeición de les obres de los autores de teatru costumista, la so trayeutoria casi centenaria y la so proyeición internacional al traviés de les históriques representaciones en Centros Asturianos d'América y Europa.

De pie, Mar Buelga, Arsenio González, Iván Moro, Armando Felgueroso, Manuel Aller y un servidor, Sergio Buelga. Sentaes, Luisa Argüelles y Fina Rodriguez.

El vienres 28 de febreru, nel Teatru de La Felguera, Arsenio González, en representación de la Compañía, recoyó'l galardón, del que tolos componentes d'esti grupu nos sentimos tán orguyosos, encantaos col ciñu col que nos recibió Llangréu y poles palabres d'eloxu de la propia alcaldesa, María Fernández Álvarez.

Pero, ensin dubia, la meyor noticia fue la sonrisa d'Eladio Sánchez al recibilu'l domingu en Pamplona, onde se ta recuperando d'una intervención.

Eladio Sánchez, xunto a la so muyer y actriz, Pili Ibaseta, col galardón.

Ciclu de Teatru Costumista de Llangréu

Cinco grupos de teatru costumista presentaron los sos montaxes nesti certamen entamáu pol Ayuntamientu de Llangréu y pola Fundación "Marino Suárez González": Teatro "El Hórreo" de Barcia, con El trampas del vecín, el Grupu de Teatru "Carbayín" de Siero, con Les ayalgues de la marquesa, "Chanclos asgaya" d'Uviéu con Drácula ye teberganu, la Compañía Asturiana de Comedias de Xixón, coles sos tres pieces curties (Desatraca, San Roque y la Madalena y Los forofos) y l'Agrupación Artístico-Musical "Padre Coll" de La Felguera, qu'estrenaba El cantar de los pipiolos y que llevaba'l premiu al meyor montaxe del ciclu.

El cantar de los pipiolos ye una adaptación de la obra de Pedro Mario Herrero Balada de los tres inocentes, apuesta d'esta agrupación que sufrió dellos cambios la temporada pasada y que, sigún paez pol resultáu artísticu, pagó la pena el pasalos. Nueva direición (a cargu de Juan José Navarrete), apueste pola adautación d'obres non asturianes a la llingua llariega (nesti casu, a cargu de Ismael María González Arias) y un repartu de papeles más compensáu que n'anteriores montaxes, fueron los motivos del ésitu total del estrenu d'esta obra, el día 22 de febreru nel Teatru La Felguera.

El premiu recibiéronlu los felguerinos de manes del anterior grupu en algamalu, la compañía "Rosario Trabanco" de Xixón que representó, fuera de concursu, Aquellos maravillosos años.

Esti ciclu ivernal demuestra la buena salú que tien esti xéneru asturianu y la vitalidá de los sos grupos que son capaces de rexenerase y dar tan buenos frutos. Y, como exemplu, "Padre Coll". Norabona.

Lleer más...

"La camisa"

Cartel del estrenu nel Teatro Popular de Madrid

Toi realcontrándome estos díes con La camisa, de Lauro Olmo, una d'estes obres sociales indispensables pola so crítica a la sociedá española de los años 60, qu'espaeya situaciones reales d'alcoholismu, hacinamientu, problemes de perres, la emigración a Madrid...

Nun recuerdo bien cuando la lleí por primer vez. Quiciabes en tiempos de la carrera. Y, anque siempre m'imaxiné la camisa de Juan d'un blancu allumante, el llugar que tenía nel mio recuerdu yera una mezcla ente barriu de chaboles por acabar, como la zona de Xixón qu'anguaño acapara la Avenida d'El Llano mientres los años 80, y casa abarrotada, a lo El pisito. 

Pero, n'esta llectura nueva, la escena camudó pa faese más teatral, por cuenta d'Eladio Sánchez. Fai unos años enseñóme una maqueta de la escenografía del montaxe de La Camisa qu'estrenare'l Grupu Gesto, Teatro de Cámara nel Teatru Arango de Xixón, el 4 de setiempre de 1963 (lo que fala del ésitu de la obra, asoleyada en 1961 y estrenada en Madrid en 1962, y de les ganes de teatru contemporaniu qu'esistíen n'Asturies daquella). Esta reproducción a escala fízose pa una collaboración con Boni Ortiz, comisariu-organizador de la esposición "Los pioneros del Teatro de Creación en Asturias", nel Antiguu Institutu Jovellanos, mientres marzu de 2001.

Esta vez, Juan y Lola, tan alrodiu la cocina carbón y la mesa camilla de la chabolina; la señora Balbina, tiende por detrás d'esa vallina maera; y Lolo, Luis, Sebas y Ricardo, alderiquen sentaos a la mesa la terraza del chigre "Casa Paco" de parés naranxes, xusto embaxo del símbolu de Pepsi.

Escenografía d'Eladio Sánchez pa La camisa, de Lauro Olmo

Torno la descripción que fai Lauro Olmo al entamu'l primer actu:

Al llevantase'l telón, vese una cai que, depués d'ocupar horizontalmente tol  primer términu, tuerce nel estremu drecha y piérdese p'hacia'l fondu. En segundu términu, a la izquierda, y ocupando dalgo asina como la tercer parte del escenariu, vese una humilde habitación de chabola. A la drecha, una puerta. Esta da a un solar. Esti solar, menos per delantre, ta zarráu por una valla. A la drecha'l solar, la cai enrriba citada. A la drecha la cai, o seya llateral drecha del escenariu, vese "CASA PACO", la tasca. Al perdese la cai p'hacia'l fondu va dar escontra la fachada d'una casa popular de dos pisos. Ca pisu tien un corredor. El fondu de la cai correspuende col portal de la casa. P'hacia la drecha y izquierda d'esta paez cruciar otra cai. Les dos terceres partes del fondu, que ye lo que nun ocupa la fachada la casa, ye cielu rasu. Naturalmente, tolo anterior correspuende a un barriu d'estrarradiu de Madrid. Durante los tres actos caltiénse la mesma decoración.

Lleer más...

Teatru y figures rituales n'Asturies, un trabayu d'Antón Caamaño

"Son continues, dientro la hestoria del teatru y del arte, sobre too en tiempos como ésti de crisis económico, social o espiritual, les díes y veníes al ritual, a la traxedia griega, a los oríxenes. Y Asturies nun tien por qué ser un sitiu nel qu'esto nun ocurriere; les crisis y la gueta soluciones diéronse y dánse equí tamién. Y daránse, pueque. Por ello, l'estudiu asitiaráse nos entamos del Teatru n'Asturies, estes amueses etnodramátiques, o formes rituales, predecesores del teatru que güei conocemos y que, per otra banda, tienen muncho que ver col teatru contemporáneo, coles performances, ya eso. Y non únicamente  faciendo una lletura dende la hestoria o la lliteratura, o la teatraloxía, sinón dende l'analís del so efeutu concretu na sociedá onde se desendolquen, que nun ye nin más nin menos que l'asturiana d'anguaño.

El llibru pretende llamar l'atención sobre esta mena de teatru popular, poco conocida y abondo escaecía, (teatru ritual y etnodrama) y reivindicala como ún de los pegoyos onde s'afita'l Teatru Asturianu.

Contando con que'l teatru tien un aniciu de calter ritual, cosa que ta almitía polos investigadores en xeneral, l'etnodrama sedría'l momentu cuando'l teatru ta nesi pasu de lo ritual a lo espeutacular. Nun sólo se da n'Asturies; namái qu'en Zamora cuéntense más de catorce mazcaraes estremaes, y amás ye un fenómenu que ta estendío per toa Europa. Pero trátase d'analizar cuáles son los preseos y carauterístiques que, al mou de los “mitemes” que definía Levi-Strauss pa la mitoloxía, se repiten y combinen de forma particular n'Asturies dando llugar a les mazcaraes que s'analicen y que conocemos: Guirria de Ponga, Sidros de Valdesoto, Reises d'Ibias y del Valledor. Y tamién d'ufrir una hipótesis de la evolución del ritual dende los sos anicios hasta güei, basándola nos estudios realizaos hasta la fecha sobro la tema: Uría Ríu, Cabal, Iglesias Cueva y Rodríguez Hevia, I-Riguilón, Gómez Pellón, Aurelio del Llano, Menéndez Peláez...

Tamién se trata d'analizar el sintíu del etnodrama, la so función social, güei, que yá paez que perdió (o non) muncho del so significáu primixeniu."

Antón Caamaño

Con esti testu de la contraportada resume Antón Caamaño el so trabayu Teatru y figures rituales n'Asturies, que se presentó a finales de xineru nel espaciu cultural La Manzorga de Xixón. (La presentación pue atopase nesti vidiu)

Apunta a ser obra de referencia pa tratar estes espresiones dramátiques primitives propies (anque non privatives) d'Asturies y qu'anguaño se tán revitalizando: les fiestes del Aguilandu y el Guirria de San Xuan de Beleño, Os Reises de Tormaleo y Taladriz, n'Ibias, y del Valledor, n'Ayande, o los Sidros y les Comedies de Valdesoto, en Siero.

Hipótesis de trabayu

Sidros de Valdesoto

Son delles les hipótesis de trabayu que se desendolquen nesti trabayu y que traten d'establecer una definición concreta pa estes espresiones rituales. La primera, nun podía ser otra, estableceles como fechu dramáticu, dexando nidio qu'esti pue alcontrase desaveráu del aspeutu lliterariu del teatru.

 "El teatru nun ye namái que lliteratura; si qu'emplega, delles vegaes, testos dramáticos, pero ye una estaya aparte, que pue estudiase y dotase de medios pal so estudiu en concretu, como cualaquier otra disciplina."

Pa reivindicalo como ún de los finxos del teatru asturianu y llograr definilu con mayor concreición, ha dixebralo del teatru costumista, onde munchos alcuentren la única espresión del teatru llariegu, nun exerciciu de doble prexuiciu: por un llau, por considerar qu'el teatru costumista ye de menor calidá lliteraria qu'otres formes y, por otru llau y a paritr de la primer premisa, pa aseverar qu'el teatru fechu n'Asturies (y n'asturianu) nun pue valorase más que dende un puntu de vista sentimental y paternalista. Caamaño fai por ruemper esti prexuiciu desendolcando la idega espresada na siguiente frase:

"El teatru asturianu nun ye namái que teatru costumista. Pueden definise más pegoyos, y ésti ye ún d'ellos."

Pero quiciás la mayor ruptura ufrida por Caamaño seya la del sincretismu de les formes paganes col cristianismu como forma de permanencia d'estes representaciones rituales, estremándose de la corriente d'estudiu tradicional que considera'l so orixen nuna creación de sen relixosu.

"El teatru n'Occidente nun tien un aniciu relixosu, como caltienen investigadores como Menéndez Peláez, o el mesmu César Oliva. El catolicismu a lo primero prohibió estes escenificaciones rituales y más llueu atropóles pa captar fieles; esto xeneró dellos tipos de representación. Pero la corriente ritual, con cambeos, eso sí, caltiénse al traviés del tiempu hasta güei, alimentando, amás, tol procesu de sincretismu col catolicismu."

Os Reises,

Razones pa faer l'estudiu

Cuando me punxe en contautu con Antón, insistí pa que me comentara cuáles yeren les sos motivaciones pa entamar un xera d'esti tamañu. Respondióme tres razones que trescribo a continuación:

Guirria de San Xuan de Beleño

"La primera ye obvia, l'enfotu por trazar eses llínies que xunen nel colar del tiempu'l nuesu presente coles tradiciones populares, en cuantes qu'al teatru se refier, y que permiten analizar la hestoria del nuesu teatru al traviés del tiempu y la hestoria del nuesu país al traviés del teatru.

La segunda ye facer una aportación dende la discipina del Arte Dramáticu; el Teatru nun ye lliteratura, como yá dixi enantes, y los rituales tampoco son sólo materia d'estudiu de l'Antropoloxía.

Y una tercera podría ser la necesidá de, depués de que tolo referente al teatru n'Asturies tea esaniciao pola crisis económico y la curtiedá de mires ya incultura de los nuesos políticos, volver a perfacelo too, a entamar dende'l principiu, a llevantar otra vegada l'horru del teatru asturianu dende lo primero, iguando los erros nos que se cayeron nel pasáu, y ún d'ellos ye el desconocimientu y despreciu sobro lo que somos y sobro les nueses tradiciones ya hestoria."

Estes tres razones, bien estruturaes y desendolcaes, provienen d'un fechu primixeniu que mueven a Caamaño nel so llabor artísticu y d'estudiu (nun m'atrevo a dicir qu'en más estayes) y que me quedó claru al final del mensaxe onde respondía al mio requerimientu: encamentábame al so blogue La Cueva del Guirriu Antón, que tien como sotítulu "El Guirriu dexa los sos rituales y sal de la so cueva, dacuando, a echá-y una güeyada al mundu, y a dicir lo que piensa". ¿Cómo un guirriu nun va querer estudiar lo de so? ¿Cómo un guirriu nun va querer dalo a conocer al mundu?


Reseña bibliográfica 

CAAMAÑO VEGA, Antón, Teatru y figures rituales n'Asturies, Uviéu, 2014.

Ediciones La Cruz de Grado
ISBN: 978-84-942173-2-6

Impresu por Gráficas Hifer, d'Uviéu, son setenta y ún páxines. Tien portada de Gloria Caamaño y prólogu de Vicente Iglesias Cueva y Luis M. Rodríguez Hevia. Amás, apurre semeyes del Arquivu de la Tradición Oral de Xosé Ambás, de Pablo Canal y de Carlos González Ximénez.

El preciu ye de 10 € y pue alcontrase nes llibreríes La Manzorga de Xixón, Cervantes d'Uviéu, Pallabres de Caramelu, de Candás, y San Andrés d'Ayande y, por supuesto, n'internet.

Lleer más...

Premios Oh! 2014, Muestres d'interpretación de la ESAD y Lorca

"El teatru ye la Poesía que se llevanta del llibru y se fai humana. Y al faese, fala y glaya, llora y desespérase. El Teatru necesita que los personaxes qu'apaezcan n'escena lleven un traxe de Poesía y, al mesmu tiempu, que se-y vean los güesos, la sangre. Han ser tan humanos, tan espantiblemente tráxicos y ligaos a la vida con una fuercia tala, qu'enseñen les sos traiciones, que s'aprecien los sos golores y que salga a los llabios tola valentía de les sos palabres enllenes d'Amor y d'Ascos".

Federico García Lorca

Lorca ye'l dramaturgu por escelencia, aquel que fue quien pa conseguir que la poesía se ficiere diálogu natural y habitual nos personaxes del so teatru. En Lorca, les acciones son fíes de les emociones, les actitúes son siempre pasionales. Poro, nel teatru de Lorca, los personaxes son, direutamente, pasiones humanes encarnaes. Y eso fa-ylu siempre actual, siempre comprendíu, siempre necesariu.

Esta selmana tuvimos dos oportunidaes pa reconocer el trabayu de Lorca, interpretáu pola visión de la dramaturxia asturiana. Por un lláu, na Muestra d'interpretación de 3ºB de la ESAD. Por otru, el triunfu del espectáculu Mariana Pineda, del grupu "Factoría Norte" nos Premios Oh! 2014.

Muestra d'interpretación de 3ºB de la ESAD

De la mano de Joaquín Amores, punxéronse sobre les tables del centru delles escenes de dos obres de García Lorca: les cuatro primeres escenes d'Asi que pasen cinco años y delles escenes sueltes, anque manteniendo un rigor de conxuntu, de los actos finales de la sempiterna La casa de Bernarda Alba.

El fechu de que se trate d'unes pruebes evaluatories dientro del penúltimu cursu, nun restó un rispiu del valor interpretativu d'estos actores proyeutaos, ente los que destacaron Sara Teleña, nel papel d'Angustias, y Amaia Salazar, como La Poncia. Güeyu a esta nueva fornada.

Los Premios Oh! 2014

Los Premios Oh! 2014 entregáronse esti pasáu sábadu nuna gala nel Teatru Jovellanos de Xixón. Nun hubo munches sorpreses polos gallardonaos, que fueron p'aquelles compañíes que teníen más nominaciones.

Destamiente, el gran ganador de los premios fue Etelvino Vázquez y el so grupu "Factoría Norte", que garraron cuatro de los cinco Oh! pa los que taba nomináu: meyor espectáculu, por Mariana Pineda, meyor direición, pal propiu Etelvino, meyor interpretación femenina, pa Cristina Lorenzo, y meyor indumentaria o caracterización, pa Manuela Caso.

Mariana Pineda, esa obra de mocedá de Lorca, ye una historia d'amor, como nun podía ser d'otra forma nel autor, que toca dellos temes de másima actualidá: la llucha polos drechos sociales y el emponderamientu de la Muyer. Tratada dende la esperiencia d'Etelvino Vázquez y cola calidá interpretativa de Cristina Lorenzo, los premios nun ficieron otra cosa que reconocer lo obvio.

La llista de premiaos fue la siguiente:

Premio Oh! al meyor espectáculu: Mariana Pineda, de "Teatro del Norte".
Premio Oh! al meyor espectáculu infantil: El viaje de Covaletti, de "Higiénico Papel".
Premio Oh! a la meyor producción: "Paraninfo 58" por Resistencia 532
Premio Oh! a la meyor dirección: Etelvino Vázquez por Mariana Pineda.
Premio Oh! a la meyor autoría o coreografía: Sandro Cordero por Criados y bufones.
Premio Oh! a la meyor intérprete femenina: Cristina Lorenzo por Mariana Pineda.
Premio Oh! al meyor intérprete masculín: Felix Cadenaba por Litoral.
Premio Oh! al meyor diseñu d'illuminación: Pilar Velasco por Litoral.
Premio Oh! a la meyor banda sonora orixinal:Ernesto Paredano por Mis dedos tocan los días que pasan.
Premio Oh! a la meyor indumentaria o caracterización: Manuela Caso por Mariana Pineda.
Premio Oh! a la meyor escenografía: Josune Cañas, Rodolfo Antolín y Txus Plágaro por Resistencia 532.

Lleer más...

TermAst: "Terminoloxía de Teatru y Artes Escéniques"

teatreru, -a: Persona venceyada a la profesión teatral.

Esta ye la definición qu'apurre'l trabayu de Belarmino Daniel Álvarez y Antón Caamaño Vega, "Terminoloxía de Teatru y Artes Escéniques", asoleyáu por TermAst, el centru de l'Academia de la Llingua Asturiana que coordina iniciatives individuales o grupales sobre les xeres terminolóxiques venceyaes al idioma y onde tamién intervienen Softastur y el Colexu d’Inxenieros n’Informática del Principáu d’Asturies. En TermAst podemos altopar palabreros de delles estayes: d'Economía y Empresa, de Xurisdicción y Alministración, de Matemáticas, de Medicina, terminoloxía Postal, de Física, d'Educación, de Teoría de la Lliteratura, de Turismu, de Meteoroloxía y, dende'l dia 3 de febreru, de Teatru y Artes Escéniques.

La propuesta ta entamada por dos profesionales del teatru n'Asturies. Belarmino Daniel Álvarez (Madrid, 1989) ye estudiante d'Historia y direutor d'escena tituláu pola ESAD, que presentó como proyeutu de fin de carrera l'adautación de la obra del dramaturgu andaluz Juan Carlos Rubio "Arizona", miembru del coleutivu "Xareos! Xestión Cultural" y habitual de la revista "Formientu". Antón Caamaño (Xixón, 1966), actor d'amplísima trayeutoria y direutor de la compañía "Nun Tris", ta acabante d'asoleyar el llibru Teatru y Figures rituales n’Asturies, editáu por La Cruz de Grau (del que solo pueo dicir que ye "un análisis de les formes etnodramátiques asturianes y de la so función social na actualidá" y que tien un pinta interesantísima).

"Terminoloxía de Teatru y Artes Escéniques" ye un curpus de casi 1.000 términos rellaicionaos con delles estayes d'esti mundu: dende la Lliteratura dramática (estilos, temátiques, recursos lliterarios, particiones de los escritos, tipoloxía de los personaxes) a los oficios oficios téunicos que tán al rodiu d'estes Artes (escenografíes, atrezu, xastrería), pasando polos conceutos propios del faer actoral (preparación del personaxe y técniques y ferramientes espresives) y del trabayu de direición y producción. Pero tampoco nun descuida los nomes propios de los espacios físicos del teatru como llocal, de les voces propies y privatives del mundu teatral (especialmente prestosa me resulta la entrada "vermú: Sesión que s’echa al meudía o a la tardina") y d'aquellos términos que surden de la tradición teatral popular asturiana.

Los que nos presta'l teatru y lu pensamos, queremos y entendemos n'asturianu, tamos d'enhorabuena. Esti trabayu ye monumental y enllena un güecu bien grande nel procesu de normalización de la llingüa y del so usu n'asturianu. 

Sinceramente, gracies.

Lleer más...

Candidatures a los Premios Oh! 2014

El miércoles 29, por quintu añu consecutivu, l'Asociación de Compañías Profesionales de Teatro y Danza de Asturias (ACPTA) presentó la llista de finalistes a los Premios Oh!, galardones al faer dramáticu de les compañíes profesionales afincaos n'esta tierra: meyor espectáculu, meyor espectáculu infantil, meyor direición, meyor producción, meyor autor o coreógrafu, meyores intérpretes femenín y masculín, meyor diseñu d'illuminación, meyor banda sonora orixinal, meyor indumentaria o caracterización y meyor escenografía. A estos, hai que sumar l'Oh! d'honor a la persona o compañía destacada pola so relevancia o pola so trayectoria personal.

Los premios recibieron una total de 120 candidatures, más de la metá que l'añu anterior, dende quince compañíes profesionales y un total de dieciséis espectáculos van participar por ver cuál va representar a Asturies nos Premios Max. Pero esi honor, amás del destín de los premios, podrá sabese a partir de les 20 hores del día 8 de febreru, nes tables del Teatru Jovellanos de Xixón, momentu cuando escomience la gala d'entrega.

Meyor espectáculu y dirección

Tres son leos espectáculos que se reparten les nominaciones a meyor espectáculu y meyor direición (amás de sumar otres cuantes candidatures más n'otres estayes): dos compañíes de reciente creyación, "Teatro del Cuervo" y "Ververemos Teatro", y una señera "Teatro del Norte".

"Teatro del Cuervo" ye un compañía creyada alrodiu la figura del actor y director Sergio Gayol, qu'estrenaría l'espectáculu Claudia y, nel añu 2009, algamaría'l premiu Teatro Jovellanos por Gaviota 2.1, que s'estrena'l 14 de xineru de 2011 nel coliséu xixonés. La compañía ta nominada esti añu por Criados y bufones, un testu de Sandro Cordero qu'amiesta retayos d'obres de Shakespeare, pa ufrir situaciones bien bufonesques mientres un funeral. Sandro Cordero ta nomináu, por esta obra, a la meyor dirección, al meyor testu y al meyor intérprete masculín.

"Ververemos Teatro" ñaz en 2011 pol enfotu de la direutora y coreógrafa Nieves Álvarez y cuenta con un equipu surdíu de la ESADyPD. Preséntase col espectáculu Litoral, del autor Vadji Mouawad y col llibretu tornáu por Eadio de Pablo, que ta dirixíu por Cristina Suárez y que fuera galardonáu col Premiu Teatro Jovellanos 2012. Ye una obra profunda, que cuenta la búsqueda de la identidá nunca algamada. Cristina Suárez ta nominada a la meyor dirección; Felix Cadenaba, al meyor intérprete masculín; Pilar Velasco, al meyor diseñu d'illuminación; y Manuela Caso, a la meyor indumentaria o caracterización.

"Teatro del Norte" ye la obra vital d'Etelvino Vázquez. La compañía de Llugones, creyada en 1985, trabayó testos clásicos y contemporanios universales, y llevó esi trabayu por buena parte d'Europa y d'Amércia. Apostó esa temporada por una adaptación del clásicu de Lorca Mariana Pineda. Etelvino Vázquez ta nomináu a la meyor direición; Cristina Lorenzo, a la meyor interpretación femenina; Rubén Álvarez, al meyor diseñu d'illuminación; Alberto Rionda, a la meyor banda sonora orixinal; Manuela Caso, a la meyor indumentaria o caracterización; y Carlos Lorenzo, a la meyor escenografía.

Ausencia d'asturianu

La presencia de la llingua asturiana ye más bien residual. D'ente los 16 espectáculos presentaos a los premios, solo dos son n'asturianu: Llázaro de Tormes, l'apueste personal de Carlos Alba por adaptar el testu más clásicu de la picaresca, pol que ta nomináu a meyor intérprete masculín; y El pelegrín valiente, trabayu de "Nun Tris", a partir d'un testu d'Antón García, y que nun se tuvo en consideración p'acceder a dengún premiu. Dambes s'ufríen tamién en castellán.

Tamién ye significativa la inesistencia de reconocimientu dalu pa los montaxes o los testos que tengan como llingua vehicular l'asturianu, qu'invite y reconozca los méritos daquellos qu'apuesten pol idioma llariegu. Los Premios Oh! son los gallardones del fechu dramáticu profesional d'Asturies, asina que ye un fallu imperdonable esta ausencia.

Qu'el mundu profesional, salvo contaes y significaes esceiciones, dea la espalda al idioma propiu ye una mala noticia, tanto pa la llingua como pal propiu teatru profesional, y habría ser oxetu d'un análisis fonderu. Piérdese un espaciu de normalización llingüística de primer orden, que queda arrequexáu al mundu amateur; y piérdense espectadores, que vayan al teatru a sintir lo qu'en so casa se fala, a identificase colos personaxes que falen como so. Y d'esto, tanto Carlos Alba como Antón Caamaño, puen dar fe.

Lleer más...

El teatru nel Eo-Navia

Como pa otres munches estayes de la vida, la rexón Eo-Navia ye la gran desconocida nel mundu teatral asturianu, cola atención más focalizada siempre na producción dramática de la fastera central.

Por embargu, l'actividá teatral lleva un tiempu esporpollando ente dambos ríos y, corriendo'l riesgu de dexar dalgún fuera d'esta llista, podemos destacar grupos como'l de l'Asociación "San Tirso del Eo", de Santiso d'Abres, constituyíu nel añu 1988; el de l'Asociación de Mayores "Cristo del Buen Viaje" d'As Figueiras (Castropol); "Fonte da Virgen" de Mántaras (Tapia); "Aires Costumbristas" d'A Caridá (El Franco); "Casadoiro" d'Anleo (Navia), "Penedo Aballón", de Bual; "El Cioyo", de Castropol; o "Baluarte", de Veiga (Navia).

Estos grupos de teatru aficionáu tán desendolcando un importante llabor de producción d'espectáculos, que van dende'l costumismu a l'alta comedia.

Pero, amás, hai que destacar l'exerciciu de normalización llingüística que desendolquen, porque dellos grupos usen l'eonaviego como idioma vehicular, representando y adaptando obres d'ésitu que lleven a muncha xente a les salen y que vuelven a identificase cola so fala, a sintise orgullosa d'ella fuera de casa y en comuña.

Resultes de la gran ufierta llariega, hai delles iniciatives de divulgación del fechu teatral que tán dando rempuesta a la necesidá pruyente de sacar el teatru eonaviegu p'alantre. Y dos, tán rodando nesti tiempu ivernal.

El domingu pasáu, 26 de xineru, escomenzó una nueva edición d'un de los certámenes teatrales con más solera d'Asturies, los Encuentros Teatrales Elisa y Luis Villamil d'A Veiga. Yá son diecisiete les temporaes qu'el públicu veigués pue esfrutar d'una esbilla de teatru de temática diversa, entamada pola Fundación y l'Institutu d'Enseñanza Secundaria que lleven el nome de les figueres homenaxeaes.

Esti añu, los encuentros abriéronse cola representación de la comedia Un espíritu burlón, adaptación al castellán de Blithe Spirit, del oscarizáu autor inglés Sir Noël Coward, a cargu del grupu de teatru "Baluarte". Esti grupu, pola so parte, mientres la seronda l'añu 2013, organizó'l Certamen Teatral "David Miguel" nel Casino de Puerto de Vega, una auténtica ayalga arquitectónica del período de la segunda República que se caltién coles aportaciones privaes de los socios. Esti certámen supunxo un gran esfuerciu emocional pal grupu, que quiso superar con él el trauma pola pérdida del so compañeru David Miguel nun accidente de tráficu tres años enantes. Pero tamién un retu organizativu, al programar un cartel con ocho actuaciones, siete d'elles de grupos amateurs de la zona.

Dos grupos eonaviegos más acturán nestos Encuentros Teatrales Elisa y Luis Villamil: el 23 de febreru, "Casadoiro", de la parroquia naviega d'Anleo, cola obra ¡Xuaco encontróu trabayo y algo más...!; y, el 16 de marzu, "El Cioyo" de Castropol, con A difunta y outras herbas. Dambes obres son tornes al eonaviegu de testos del autor de Carbayín José Ramón Oliva.

Pero hemos detenemos nel grupu "El Cioyo", porque, amás de sacar p'alantre los sos espectáculos na so llingua llariega, tamién entamó l'añu pasáu'l Primer Certamen de Teatro "Villa del Eo", en Castropol, con tal ésitu qu'esti añu yá s'inició'l Segundu. Tolos sábados a les 20:30, dende'l día 11 de xineru, subiéronse a les tables del Casino-Teatro de Castropol, grupos de teatru, como "Carbayín" de Siero, "Casadoiro" d'Anleo y el Grupo de "Teatro Aires Costumbristas" d'A Caridá. Tovía queden por subir los gallegos "Teatro O Batan" de Cangas de Foz, cola obra Cambadelas, de Francisco Piñeiro, el día 1 de febreru, y "Teatro Pico de Faro" d'A Roda con Outros tempos de Manuel Garcia Galano, el día 8. Y, pa rematar el certamen, el día 15 acturá'l grupu organizador con A difunta y outras herbas.

La programación de los XVII Encuentros Teatrales Elisa y Luis Villamil complétase coles representaciones, toes gratuites y a les 18 hores, con grupos d'otres fasteres d'Asturies y enmarcaos dientro FETEAS: el día 2 de febrero, la Compañía Asturiana de Comedias, con Tres sainetes; el 9, Teatro "La Capacha", con Arizona, de Juan Carlos Rubio; el 16, "Telón de Fondo", con El tíu Antonín, adaptación d'El tíu Vania de Chejov, a cargu de Lluis Antón González; Las Troyanas de Eurípides, por "Kumen" Teatro, el 2 de marzu; "Trama Teatro" con Cuatro historias de alquiler, de Barrillet y Greda y adaptada por Félix Calderón, el 9; y Un Dios salvaje, de Cristina Reza, de Teatro "Contraste".

Tal bayura de grupos y d'actividaes, que se sumen a la ufierta venceyada direutamente polos conceyos, déxanos pensar que la salú del teatru del Eo-Navia ye buena y va dir a meyor. Esperemos que nun siga arrequexada entrambasgüas y salga pa otros puntos d'Asturies.

Lleer más...

Vuelvo

 

Anque en realidá nunca nun marché del teatru, de ser esi teatreru testerón, criticón, proyeutáu y de word, sobre too, de word, sí que dexé pa prau esti blogue que me dio buenes alegríes nel so momentu. Y llevaba tiempu con ganes d'entamar una nueva etapa, onde esponer otra vuelta los mios camientos sobre esta pasión de mázcares, telones, maquillaxe y lletres.

Vuelvo con ganes de faer lo que yá facía y de puxar por coses nueves, ensin pelos nes buelgues dactilares sobre'l tecláu. 

Vuelvo col enfotu d'espublizar los mis camientos pa nueves obres. 

Vuelvo pa pidir conseyu, crítica y ideguees. 

Vuelvo pa que falen conmigo aquelles persones a quienes almiro.  

Y vuelvo pa escribir de teatru y d'Asturies. Sobre too, pa eso.

Vuelvo, como la muerte del tarot, que nunca nun marchó, que siempre ta ehí, pero qu'augura camudamientos.

Lleer más...

Unes patrañes efímeres

En payares asistiera a un taller escénicu ufiertáu por FETEAS, nomáu "Curso básico de Match de Improvisación", ya impartíu pola manchega Mª Eugenia Moya Serrano, de Primer Acto Teatro. Daquello, que nun primer momentu, atalantamos más d'ún de los participante como una forma "guai" de nomar un taller d'improvisación, acabó por ser un averamientu a un espectáculu dramáticu y competitivu d'improvisación, con regles, equipos árbitros, faltes, penaltis y, sobre too, una increyible capacidá de los actores pa llevar p'apantre'l so proyeutu improvisáu. Yo quedé con ganes de muncho más.

Y nestes, llega a Xixón Impromadrid Teatro, compañía teatral que lleva años organizando el campionatu de Match n'España. Unos auténticos mostruos del arte de contar coses sintiendo al compañeru que tienes delantre en vez de tar a lo d'ún, sacando lo que tantes y tantes veces se tuviera ensayao. Otra forma de faer teatru. Y asina mos lo demostraron a la centena escasa de persones a les que se mos pasó volando la hora y media d'Corten (Las Patrañas Efímeras del Manifiesto Corten), nel Xovellanos.

Ignacio López, Ignacio Soriano y Jorge Rueda, son los que s'encarguen d'esi llabor actoral diferente, onde'l noyu del guión pasa a manes del públicu, que decide qué va pasar coles sos aportaciones. Asina, en Xixón, nació una guah.a de 17 años nomada Loreto que va a clases de danza'l vientre, una amiga pendón que respondía al nome de Jessica y a cualisquier estímulu eróticu-festivu, l'adolescente Gabi en plenu procesu de camudamientu la voz, el pa gafapasta y tortilleru, la ma que los abandonara y que ta rodiada de críos y nuna relaición que nun-y fai sentise ella mesma, un travesti que respuende al nomatu de selene69 y un porteru cotilla que tolo sabe y en tolos sitios ta. Personaxes que tuvieron vida por primer y última vez nes tables del Xovellanos.

Tamién la escenografía y el vestuariu yeren improvisaos. P'arreglar la primera taba'l grafiteru Suso33, que diba ambientando la trama colos sos trazos rápidos sobre la paleta gráfica d'un ordenador, que yeren proyeutaos nuna cámara (bien xugaben tamién coles sombres). El vestuariu corría a cargu de Tatiana de Sarabia, que se les vía y deseyaba pa siguir a los actores pol escenariu, pa dexar claru colos sos toques quién yera quién n'escena. Y, por últimu, la collaboración de Nacho Mastretta (autor de la tema, pa mín mítica, "Baile en casa de Charly") al pianu, l'armónica y, sobre too, el clarinete, pa poner un filu musical que recalcase'l llabor d'estos tres esplendidos actores.

Tener la oportunidá de ser parte del petit comité asistente a un eventu tal, irrepetible, ye un presto de los que te faen salir del teatru cola idega de que tas tocáu pol déu efímeru del efímeru buen gustu y la buena suerte fízote tar nel momentu adecuáu nel sitiu precisu. Y, por supuesto, con ganes de llegar a la cai pa xingar la cadera al son d'un clarinete.

Lleer más...

El monólogu asturianu sigún Armando Felgeroso.

Armando Felgueroso.

Si yá'l teatru asturianu tien bien de crítiques negatives, más fundamentaes en prexuicios personales y sociales que'en criterios culturales oxetivos, ún de los sos xéneros dramáticos destaca sobre cualisquier otru n'esti sen: el monólogu.

El monólogu asturianu fuera, ya inda ye anguaño, atacáu pola so actutú misóxina, sinon apediyáu direutamente de machista; pol usu desmedíu de pallabres groseres, de mal sonar al finu oyíu del bienpensante, y nun idioma non casteyanu, que sienta mal al meyorfaláu ilustráu; pola so probitú de formes llíriques en métrica y rima, que los alloñen de los cánones calderonianos ya lorquianos que marquen el buen gustu; pol so calter cómicu, que bien malo ye riise; y, sobre too, por considerar apropiaes temes de les clases sociales más baxes, ensin un enclín moralizante nin d'investigación antropolóxica. Pero estes crítiques queden solamente na piel de lo que significa'l monólogu na realidá asturiana, nun lleguen a la so cadarma porque nun-yos interesa a estos críticos rascar pa llegar dientro: conque-yos cuadre l'ideal col prexuiciu, d'aquello de que lo d'Asturies ye más rancio, más morralla, pior, yá-yos val.

Ensin embargu, el monólogu n'Asturies ye daqué más. Como pasa col teatru costumista, el monólogu cumplía una función social de divertimientu y de comunicación social, de tresmisión de los arquetipos tradicionales y privativos de la sociedá, d'una mena divertida y cercana al estratu social que-y afectaba: el pueblu llanu.

Y dende'l pueblu llanu apaez Armando Felgueroso, compañeru de la Compañía Asturiana de Comedies, y monologuista al dar vida a dos personaxes, al modernu James Corigos, un esplorador de la realidá convencional actual, y a Min de les Pieces, paisanu de siempre, de boina, xilecu y faxa y, ensin dubia'l más interesante pa mín.

Min de les Pieces en dos momentos del espectáculu

Tuve la oportunidá d'acompañar a Armando nuna charra-espectáculu que dio pa una docena de privilexaos na Escuela Superior d'Arte Dramáticu y Profesional de Danza de Xixón, el xueves día 15. Ellí nos mostró'l significáu del monólogu asturianu, la diferencia pa frente a otres muestres individuales d'espresión dramátiques non asturianes, les temes a tratar, la so diferenciación al traviés del tiempu (y tamién del sexu y la edá del intérprete), los preseos d'apoyu, l'usu correctu d'onomatopeyes nel discursu, los autores históricos y, sobre too, los diferentes personaxes y la forma de creyalos. Y, ente argumentu y argumentu, apaecía Min de les Pieces pa sofitar caún coles interpretaciones de monólogos de Marirreguera, Anxelu, Arsenio Rodríguez, el Maestru o Arsenio González (col que tuve la suerte de compartir escañu).

Nun sé si-yos quedara claro a unos estudiantes del centru qué yera una guiá o un tratante, porque nun taben avezaos a la cultura asturiana tradicional, nin qu'aquello que Min ufiertaba como rei yera, en realidá, el ñudu d'un chisqueru faciendo les vegaes de panoya colorada, porque dame que tampoco nun taben avezaos a la realidá hestórica de más p'allá de veinte años.

Pero de lo que nun tengo nin un rispiu dulda ye que, gracies a les desplicaciones d'Armando, quedó-yos nidio cómo hai que construyir un personaxe de monólogu: que tien que conocer la realidá que pise, p'averala al públicu y faer que se identifique col tipu, y caricaturizala dempués, pa poder xugar colos estremos que, faciéndolos de so, denuncia. D'esta miente, la xente que les siente, ye capaz de dixebrar ente qué ye válido pa la vida en común y qué ye lo qu'hai que dexar pa prau.

Solo aquel que furrula dende prexuicios (los que falaba enantes) ye incapaz d'alcontrase cómodu nel xuegu de los arquetipos llevaos al esperpentu. Poro, verá machismu nuna sociedá matriarcal (porque lo desconoz, porque nunca nun se detuvo a averigüalo o, si lo fizo, enterrólo porque nun-y cuadraba col prexuiciu) y escandalizarase poles groseríes, estremarase pol usu de les fórmes líriques cencielles y de riirase del idioma tradicional y propiu'l país, ensin figuarse que son trés fórmules bien articulaes pol monólogu asturianu dende abondo p'acaparar l'atención del públicu a quien van dirixíu.

Adolfo Camilo Díaz escribía nel so blogue de "Les Noticies", Les puertes de Tannhäuser (Armando, Casado, Cristina y Filadi, 19-XII-11), ente otros, sobre Armando, del apreciu profesional que-y tien (del personal, tanta buena pallabra déxalu nidiu), de lo gran monologuista que ye y d'esti proyeutu sobre'l monólogu asturianu. Yo, confírmolo puntu por puntu.

Armando Felrgoroso y el so alter ego "Min de les Pieces", xunto a otros como Cellero o Pin de la Cotolla, tan dignificando el monólogu asturianu col so trabayu d'espardimientu que, nun podía ser d'otra manera, avérase al públicu asturianu cola fórmula de siempre: una idega acompañada d'una sonrisa.

Lleer más...

Premios Aurora 2011

Los premios

El pasáu vienres 2 de setiembre, cellebróse nel teatru Prendes de Candás, la entrega de los Premios Aurora 2011, d'ente lo visto nel XXI Salón de Teatru Costumista de Candás.

La gala d'entrega de premios vióse amenizada pol montaxe "En busca del premio perdido", col guión y la interpretación d'Alain Fernández, xerente del teatru, que cuntó cola prestosa collaboración de Chema Puerto, actor del grupu "Rosario Trabanco" y Chusa Juarros, de "El Hórreo" de Barcia. Amás, el Grupu de Teatru "Carbayín" punxo d'una forma sublime el sainete "El recatéu", del mío almiradísimu compañeru Arsenio González, que punxo la nota n'asturianu a una tarde divertida pero, llamentablemente tratándose de teatro costumista asturianu, con toles demás intervenciones n'español.

Luisa Argüelles y Mar Buelga, cola reproducción a escala xigante de les estatuiyes de los premios Aurora.

Los premios tuvieron repartíos y, dexando d'entrar na so oxetividá (más que na porque esti teatru ye amateur al 100% y tol esfuerciu de tolos grupos bien merez ser premiáu), dalgunos ficieron xusticia.

El premiu al meyor direutor foi pa Lisardo Suárez, de "Rosario Trabanco", que punxo n'escena la divertía obra de José Ramón Oliva Barájoles col difuntu. Yo tuve la oportunidá de vela y reíme a mandíbula batiente col bon faer de Nines nel papel de "difuntu" y les ocurrencies del personaxe de Chema Puerto, hasta'l puntu d'aniciar un par d'ovaciones que, viéndoles xustes, foron siguíes pol respetable. Ensin embargu, al mío mou de ver, el motaxe carecía de ritmu, solo recuperáu polos continuos güelpes de risa, los actores taben mal ubicaos y una mesa de comedor en primer planu tapaba parte de l'aición de los actores que nun taben a l'altor de Nines y Puerto. Lisardo tenía, en xusticia, ún de los papeles más difíciles y distintos del Salón: facese'l muertu y aguantar les ides y veníes a les que se vía sometíu el so personaxe. Un trabayu d'espresión corporal que bien mereció'l premiu al meyor actor.

Por otra parte, y conociendo'l trabayu d'Oliva, paecióme una obra floxa respeuto a otres suyes de munchu más valir, que faen que seya anguaño l'autor más bayurosu en cantidá y calidá del repetoriu dramatúrxicu asturianu (ensin escaecer a Arsenio, claro ta). El fechu ye qu'Oliva algamó otra vuelta'l merecíu premiu al meyor autor vivu (representáu nel Salón) cola obra Alta suciedá, qu'echare col so grupu.

El premiu al meyor actor paró nes manes del uviéin Segismundo Meana, del grupu Chanclos Asgaya, que tamién algamó'l de meyor testu teatral del añu 2011 pola so obra Drácula ye teberganu. Yá toi naguando por tener el llibru del Teatru n'asturianu 2011 pa echá-y la güeyada de rigor.

Segismundo Meana y Chusa Juarros (meyor actor y actriz del Salón)

La meyor actriz fue Chusa Juarros, de "El Hórreo" de Barcia, que punxo n'escena l'obra "Vamos pal baile", de Josefina Lombán. Chusa dexó claro el so desparpaxu na mesma gala, protagonizando un baille con Alain a música de Frank Sinatra, y acabante l'eventu, dedicando una sonrisa a tou aquel que se-y acercaba. Nótase que disfruta abondo d'esti llabor y tresmítelo al públicu. Y pa un compañeru de so, Pedro Rodríguez, foi'l premiu a meyor actor secundariu. Pa rematar los premios actorales, el de meyor actriz secundaria llevolu María José Herrero, de "Padre Coll"de La Felguera, pola so maraviyosa interpretación de tarada na adaptación de la obra Lloca d'Eladio Verde.

Los premios téunicos colaron pa Xixón. Pal grupu "Traslluz" el de decoráu ya illuminación, pola obra de Carmen Duarte ¡Qué vienen los otros! Y el de vestuariu, pa mín merecidísimu (fora amor d'hermanu/compañeru), pa la Compañía Asturiana de Comedies pol Maestru Tarabica d'Eladio Verde. El trabayu d'investigación, de documentación y de diseñu que ficieron Mar Buelga y Luisa Argüelles merez la publicación como manual pa futures xeneraciones de teatreros.

Crítica

Nun voi falar más del aspeutu llingüísticu: paezme un error de bultu que nos premios d'un Salón de Teatru Costumista Asturianu nun s'use l'asturianu. Ye d'un provincianismu ablucante y somorguia'l valir d'unos testos que triunfen en buena mídia pol idioma en que se plantegaron. Llástima.

Pero sí que me voi detener nuna incongruencia d'estos premios en sí: la influyencia exóxena nes estayes actorales, que fai perder la visión diferenciadora del teatru costumista asturianu. L'erru ta nel escaezu de los niveles de personaxes propios al teatru costumista asturianu, que se suplanten por otros criterios más hollywoodienses. Désplicome.

Los premios Aurora pal elencu son cuatro: meyor actor, meyor actriz, meyor actor secundariu y meyor actriz secundaria. Ye nidio que se puen escoyer a los meyores actores del Salón: aquellos que destacaron pol so bon faer, por tener un personaxe más afayaízu o por llevantar al públicu les butaques en cada mutis. Pero paez que nun ye asina.

Pongo esti exemplu. Col mesmu valir actoral y personaxes d'igual relevancia, y dientro la mesma obra, Arsenio González foi nomináu na estaya de meyor actor y Eladio Sánchez al meyor secundariu. Ye incomprensible. Lo lóxico ye que dambos fueren candidatos al de meyor actor. Pero non. Paez que yera muncho dos candidatos del mesmu grupu y, pa nun escacese d'ún, rebaxaron-y la categoría, non al actor, pero sí al so papel, al so personaxe. Y esto ye un disparate.

Les categoríes de los personaxes nel teatru costumista asturianu tan bien diferenciaes poles carauterístiques d'edá, de repercusión nel desenllaz la obra y de comicidá o dramatismu de les aiciones y los diálogos.

Asina, alcontramos que les obres suelen xirar en torno a los personaxes dramáticos de mediana o moza edá: los galanes masculinos y les mocines o damitas femenines. Ellos son los protagonistes de los enguedeyos amorosos, de les apaiciones inesperaes o, por dicilo simplemente, de la parte "seria" de la obra. Ellos suelen tar interpretaos por actores altos, de buen porte y voz profunda; elles por actrices moces, de voz melguera y talle finu. El nivel fónicu suel buscar la diglosia más prexuiciosa, diferenciandolos con un casteyanu "dignificante", bien porque vengan de fuera, bien porque deprendan a falar bien. (Estos personaxes van en relaición direuta colos héroes y heroínes protagonistes de les películes d'aventures americanes que yeren nomaos, nos cines asturianos d'antaño, como "los mocinos" y "les mocines"; el glayíu "¡Ánimu, mocín!", en momentos de catarsis dramática sintíase de forma avezada)

El contrapuntu dánlu los cómicos, masculinos y femeninos: les sos andances suelen ser similares a les de los galanes y damitas, pero de formes más tosques y cómiques. Suelen ser criaos o fíos sin estudios, trabayaores del campu o de la mina. N'ocasiones, la obra xira en torno a so, pero los finales suelen, entós, ser inesperaos pal públicu y ablucantes pa los personaxes, que coles sos desgracies faen la risa'l respetable. El so rexistru fónicu ye d'un asturianu mui poco cultu, lo que los lleva n'ocasiones a desaxerar pallabres que causen gracia al públicu.

Por últimu (y ensín considerar a los "malditos", daquellos personaxes testimoniales y fácilmente suprimibles) atopamos a los carauterísticos: homes y muyeres. Son los vieyos y reflexen como dengún los arquetipos del pueblu asturianu, anque nin toos nin siempre en toles obres, les carauterístiques seyan uniformes, la pareya o les pareyes suelen amosar ente ellos la sabiduría popular, anque completándose con contradicciones: escontra l'amable ta l'ariscu; frente al tacañu, el xenerosu; el seriu atópase col bromista; el fatu, col llistu; y asina nuna llista cuasi inacabable d'axetivos contrapuestos. Son estos los personaxes más esperaos y los más cellebraos pol públicu y los que-yos dieron renome a los grandes actores asturianos d'ayer (Donorino García, Rosario Trabanco, José Manuel Rodríguez, la propia Aurora Sánchez...) y de güei (Arsenio González, Pili Ibaseta, Eladio Sánchez, Fina Rodríguez, Lisardo Suárez, María Elisa Álvarez...). Rares veces son los protagonistes de l'aición: el so papel ye secundariu, de sofitu a l'aición dramática y a la cómica de los mozos, porque faen les veces de conseyeros o d'enguedeyadores, facilitando o imposibilitando los amores principales colos sos quereres o les sos zunes. Por otra parte, tamién suelen ellos tener los sos flirteos amorosos o les sos engarradielles por herencies o praos. Pero son más bien pincelaes qu'espeyen la resistencia del mundu tradicional a desapaecer en manes d'ún nuevu que tien vida propia. Y esi arquetipu, amás del valir del actor y de la chispa del autor, ye'l que fai de vínculu ente la obra y l'espectador mientres el trescursu la mesma.

Asina tenemos seis estayes diferenciaes y que nun puen competir ente elles, porque tienen funciones diferentes y la vistosidá de personaxes nun ye equiparable. ¿Quién ye secundariu nuna obra costumista asturiana? ¿Un carauterísticu? ¿El mozu cómicu? ¿El galán? Yo nun tengo rempuesta. Pue falase de meyor actor, ensin especificar, sí. Pero non de secundariu, senciellamente porque nun se pue categorizar d'esa miente'l llabor actoral dientro'l teatru costumista asturianu. Eso ye daqué foriato y que cuadra mal cuando les coses se quieren faer con razón de causa y cuidando'l conteníu y la tradición d'esti tipu de teatru autóctonu.

Lleer más...